Read NQAARIIT NE ROOG A cangatin ale 9 Bible Online

A cangatin ale 9 - NQAARIIT NE ROOG bible

A cangatin ale 9

¹«Nuun Ii-isra’el we, nan-gilooxyo! Ndiiki nu nqaañ o xuluɓ ole Yordaan, ndax qeet kaa moƴna o may a nuun, a ngup a nuun doole soo njaɓ teeru maak ke den saŋe’eena boo na eel akaa.

²Xan nu ndax xa taan axe Anak, ndefna xeet fa maak too a ndef cool, nu nanna ta layeel ee: ‹An waagu waag o xox xa taan axe Anak?›

³Xaye, fat nu and boog ee o Yaal oxe Roog nuun fa xoox um oxe ñaaƴaa mbaambir nuun nen fiɗel laa na raaɓaa. Ten na saŋikkaa a den, a xeefnoor a den mbaambir nuun, soo nu ndax a den, moocand a den no ñofu, ne ta laytuuna a nuun.

⁴Yaa o Yaal oxe Roog nuun a raxitkaa a den mbaambir nuun, ba nu lay taa kam nuun ee: ‹Kaa i njarin, ten taxu o Yaal oxe a fi boo i njang saax lene.› Coxod ne no qeet keene kañ taxu o Yaal oxe a raxit a den mbaambir nuun.

⁵Refee muk ee nu njarin mbaat a qeeñ a cofu nuun taxu nu njang saax le den, njegkin. Coxod ne no qeet keene mat fo ke o Yaal oxe Roog nuun a daaɓoox’ina fo daan nuun Abraham fa Isaak fa Yakoob taxu ta raxit a den mbaambir nuun.

⁶Fat nu and boog ee refee yee o cofel nuun taxu o Yaal oxe Roog nuun a ci a nuun saax faaxaan lene ndax nu njegkin, yaam kaa nu ndef xeet fa saƭku a qoox.»

⁷«Mbetandooxyo too ba nu mbeecit muk ne nu mbuuxnoortoogna o Yaal oxe Roog nuun kam a koƥ-a-ƥor alaa. No kaa xotitna no ñaal naa nu sutooxna saax laa Misira boo neen nu mbadiidu o mbiñ onqene kaa nu siiknooraa fo ten.

⁸No joong olaa Horeb, nu mbuuxnoora o Yaal oxe bo ta bug o saŋik a nuun yaam fuux.

⁹Ŋaay’aam took o joong olaa, ndax um daaw a alfa ƥil ake saq’ina ngiɓoor ne o Yaal oxe a dalinna fa nuun. Yoq’aam maaga ñaal qarɓeen nahik fo xa yeng den kaa ñaameeruuma, yeriim.

¹⁰O Yaal oxe Roog a cooxaxam a alfa ƥil a ƭak ake ta bindood’ina kebil ke fop ta daawinna a nuun took o joong olaa, ye ta fodna a ndeer fiɗel laa a koom alaa fo mbokatax naa.

¹¹No muukandoong ne no ñaal qarɓeen nahik ke fo xa yeng den, o Yaal oxe a cooxaxam a alfa ƥil a ƭak ake saqna ngiɓoor ne.

¹²Maaga, o Yaal oxe a layaxam ee: ‹Inooxi, ñof o fudook, yaam xeet fee wo sutoona no saax le Misira kaa laawoox. Kaa ñof o ƭap a ƭat ale joox’uuma a den, a njaw wurus, a mbi’in nitaal.›

¹³O Yaal oxe a layahinaxam ee: ‹Ga’aam ee xeet feeke wiin saƭku a qoox a ndefu.

¹⁴Ndiiki koy, xaƴaam um saŋik a den, ñuf a kon den ɗuƭ ɗuga asamaan fee soo sutit na wo xeet faa moƴna o jeg doole, a moƴ o may xeet feeke.›

¹⁵Dalfooxaam o geleeroox, fudooxiidaa, deegoox a alfa ƭak ake no ngiɓoor ne. O joong ole o mat kaa kaƥoogu ne ta fodeena fop.

¹⁶Maaga, ɗeetaam too ga’aam ee nu mbakaada, tooñ o Yaal oxe Roog nuun. Kaa nu mbi’an’u a qoox nuun o nqeel wurus fa njawe, ñof o ƭap a ƭat ale o Yaal oxe a joox’ina a nuun.

¹⁷Jooraam a alfa ƭak ake deegoox’uuma, da nduguñoox na kid nuun.»

¹⁸«Cinj kaaga, deɓooxaam a lanq mbaambir no Yaal oxe soo yoqahin maaga boo ñaal qarɓeen nahik fo xa yeng den kaa ñaameeruuma, yeriim. Fi’aam keene yaam bakaad fee nu mbi’’ina. Kaa nu mbi’’u kaa faaxeerna na kid no Yaal oxe, mbuuxnoorin tigi.

¹⁹Kaam diid’u, ye ga’uuma ne o Yaal oxe a fuuxit’ina, a say yaam nuun boo a bug o saŋik a nuun. Kaa koy, no jaf laaga itam o Yaal oxe a jaɓa a qeƭ es.

²⁰O Yaal oxe a fuuxan’a a Aaroon itam fuux ɗomu boo a bugin o saŋik, ndaa ten oo xeɗooxanaanum a koom.

²¹Jangaam o nqeel onqe garit’ina bakaad fee nuun, doxin riw, duguñin, mokandin bo tee rip soo ɓax ndaw ke na ƈufnand alaa na fudoortiidaa no joong ole.

²²Nu mbuuxnoor’ahina o Yaal oxe, ye i ndefaa Taberaa, Maasa fa Qibroot-Hatawa.

²³Ye o Yaal oxe a heblitna a nuun Kades-Barneya, a lay ee: ‹Ndetyo njang saax le ci’uuma a nuun›, kaa nu mbañ o nanan kebil ne no Yaal oxe Roog nuun. Nu ngooloox’iran too nu nanan’iran.

²⁴Naa andum a nuun, nu nananee o ñuxur no Yaal oxe.

²⁵Ye o Yaal oxe a hebooxna o saŋik a nuun, deɓooxaam boog a lanq mbaambir um soo yoq maaga boo ñaal qarɓeen nahik fo xa yeng den.

²⁶Xeɗaam o Yaal oxe yee: ‹O Yaal oxe na refkaa boo faw, ba o saŋik xeet fee jegoodoona, watoona kam o magnel of, sutin Misira na pexey o ɓay o jegu doole le wo.

²⁷Wetandooxi dag of Abraham fa Isaak fa Yakoob too ba o damit xeet fene o saƭik xoox den fo kañaan den fo pakaad den,

²⁸yaam ndik wiin we no saax le suttoona a in a lay ee: O Yaal oxe waag’atee waag o fadnik a den no saax le ta reg’ina a den, too refeerna keene sax oo kaa sib a den. Ten taxu ta sut a den, ndax ta saŋik a den kam a koƥ-a-ƥor ale.

²⁹Yaag oo toox de, xeet of fo o jeg of a ndefu, o sutit a den katil of fa maak fo a naax of ale letnooxna.› »