Read NQAARIIT NE ROOG Saŋ 1 Bible Online

Saŋ 1 - NQAARIIT NE ROOG bible

Saŋ 1

¹No mberaand naa, yaaga dara sakafulaand fa Lay fee a reeƭa. Fa Lay fee fa Roog a reeƭu, too fa Lay fee Roog sax sax a reeƭu.

²Fa Roog a reeƭu no mberaand naa.

³Roog a saktin fop. Dara kaa sakeena too reefandaand no ten jegee meen.

⁴No ten o ñoow ole a reeƭu, too o ñoow oleene reeƭu a qoolaand no wiin we.

⁵A qoolaand ale koy, kaa dalfoox o naagit dañ kam o niɓaan ole, too o niɓaan ole waag’iran o ñuf.

⁶A jeg’a sax koy o kiin oxaa Roog a luliid’ina, ta ne’el Saŋ.[1]

⁷Kaa gar’u ndax ta ref o seede, a lay ke ta andna na qoolaand ale ndax fop a mbaag o ngim na pexey fa lay um.

⁸Ten fa xoox um koy reeƭee a qoolaand aleene. Kaa gar’u soom ndax ta ref o seede, a lay ke ta andna na qoolaand ale.

⁹A qoolaand aleene koy reeƭu a tiindigil ale andoona yee kaa gar a xooland o kiin oo kiin ye ta rokiidna na adna.

¹⁰A qoolaand ale a reeƭa kam adna fee, ndaa ke adna fee a reefandeena no ten fop oo anddiran.

¹¹Kaa gar me no wiin um, da mbañin, a mbesin a cinj.

¹²Kaa koy, Roog a fi’a jam boo we njaɓuuna fop, a ngim no gon um, ta ci a den da ndefat xa ƥiy Roog

¹³axaa ndimtaandeena nen o kiin, too itam a yaaw cer gartiran mbaat buge-buge no kiin, ndaa da ngat a ngat na Roog.

¹⁴Fa Lay feene koy a xawooxa, a jegat cer no kiin, soo a gar a gen fa in, a may muut fa yirmande fo ndigil. In o mat, i nga’a o ndam um, refna o ndam onqe ta daawitna na Faap fee nen o Ƥeem o leng kut.

¹⁵Saŋ a seede’anaan a qool qac ee: «Oxeeke mat ne’oogum ye layuuma yee: ‹Oxe na reefaniidaxam hupaxam yaam yaa ta refna yaaga rimafulaandeem.› »

¹⁶I ndaawa koy no paax ke ta garitna fop, ta ref yirmande took yirmande.

¹⁷Kebil ke Roog kaa ndaawtel na Moyiis, yirmande fo ndigil a ndaawtel na Yeesu Kiristaa.

¹⁸O leng koy mosee o ga a Roog. Roog o Ƥiy o leng kut onqe rimeena, too a moƴ o mat a Faap fee, andnoorun.

¹⁹Keeke refu a ƭelem ake Saŋ a seede’antuuna ye Yaawuur we a mbodna Yeerusaleem, a lul saasadax fo Leelewi ndax da laamtin ee: «Wo o mat, an refo?»

²⁰Maaga, Saŋ a doona a den, too ɗasnee dara yee: «Refiim Kiristaa fee, o Muumucil oxe regteena.»

²¹A ndakooxaan o laamit ee: «O refangee Kiristaa fee, andum wo refu Eliya.» A laya yee: «Ha’aa, refinum.» A laamtan ee: «Ndax wo refu o Tuleer oxe?» A weera na: «Ha’aa.»

²²Ngoor kaa a layaan ee: «Coo, an refo koy? Xar i laykaa we lulna a in? Xar layo na xoox of?»

²³Saŋ a doona yee: «Mi refu o ñuxur ole na falalooxaa kam a koƥ-a-ƥor alaa yee: ‹Njofandanyo o Yaal oxe a ƭat!› Keene o mat refu ke o tuleer Esayi a yegnitna.»

²⁴We luliid’eena koy, a inoora me no Farisiya we.

²⁵A laamtaan ee: «A soƥangaa koy ee refiro Kiristaa fee, o Muumucil oxe regteena, refiro Eliya, refiro o Tuleer oxe, ñaal o yeng a jalan xar taxu o batiise’aa?»

²⁶Saŋ a doona a den ee: «Mi, mexe batiise’taa foofi. A jega koy oxaa refna a ndeer nuun, too nu andiran.

²⁷Ten refu oxe na reefaniidaxam, too fekit xa ñaaƭ um sax a jombaxam.»

²⁸Keene xaa xewit’a Betani, kaltaa o xuluɓ ole Yordaan, maa Saŋ a batiise’toogna.

²⁹No feet olaa, Saŋ a ƴooka a Yeesu ta xotiidaa maa ten. Maaga, a laya yee: «Nga’yo o Mbaal onqe Roog na watnaa bakaad adna.

³⁰Oxeene mat ne’oogum ye layuuma yee: ‹A jega oxaa na reefaniidaxam ndaa o ten hupaxam, yaam yaa ta refna yaaga rimafulaandeem.›

³¹Mosinum o and, ndaa kaam gar batiise’it foofi, ndax Isra’el a anddin.»

³²Saŋ a dakooxaan o seede’an ee: «Kaam ga Yiif le Roog a fudoortiidaa na asamaan, a saxit nen a nuukuur, soo a gar a dong took um.

³³Mosinum o and, ndaa oxe luliidaxama ndax um batiise’it foofi kaa lay’aam ee: ‹Oxe Yiif le Roog a dongkaa took um yaa ta fudooritna na asamaan refu oxe na batiise’itkaa Yiif Tedu le.›

³⁴Ga’aam, too seede’anaanum ee o ten refu o Ƥeenqe Roog.»

³⁵No feet olaa ahin Saŋ a maad’a maaga, ten fo daalbe um ɗik.

³⁶Yaa ta ga’na Yeesu a joonaa, a laya yee: «Nga’yo o Mbaal onqe Roog!»

³⁷Daalbe ɗik waa a nana a ƭelem akaaga, soo a ndeefan a Yeesu.

³⁸Yeesu a wiƈaqilooxa, a ga a den. Ye ta ga’na yee kaa ndeefanan, a laya a den ee: «Xar nu mbaaƭaa?» Ngoor kaa a ndoonaan ee: «Rabi (kaa tekit ‹o Caajangin oxe›), mam geno yee?»

³⁹A laya a den ee: «Ngaryo nga’an a qoox nuun.» A ndeta boo me ta genoogna, soo da moof fo ten ñaal naaga fop. Kaaga xe xew’a a cinj kirandax.

⁴⁰Andare fee o ndeɓ Simoŋ Piyeer a reeƭa o leng no ɗik waa nan’ina a ƭelem akaa Saŋ, too a ndeefan a Yeesu.

⁴¹Andare a eeta o fad maa Simoŋ fee o maag um, soo a layin ee: «Yegaa fo and ee i nga’a Oxe Roog a dodna.» (Kaa tekit ‹Kiristaa fee›.)

⁴²A ɓisaan maa Yeesu itam. Yaa Yeesu a ga’uuna, a layaan ee: «Wo refu Simoŋ o ƥiy Saŋ[2], ndiiki koy, feranaaxong Kefaas.» (Kaa tekit ‹o ƥil›).

⁴³No feet olaa, Yeesu a waaja a tet Galile, soo a xet fa Filip, a layin ee: «Reefaam!»

⁴⁴Filip oxe gen’a Betsayda. Andare fa Piyeer na teeru faaga a ngen’u itam.

⁴⁵Filip oo, a xeta fa Natana’el, soo a layin ee: «I nga’a oxe Moyiis a bindna no kebil ke, duleer we a lay kaa jofna no ten, ta ref Yeesu o Naanasaret oxe, o ƥiy Yoseef.»

⁴⁶Natana’el a foola, a layin ee: «Coo! Paax a waaga waag o inoor Nasaret?» Filip a doonaan ee: «Koo gari ga!»

⁴⁷Yaa Yeesu a ga’na a Natana’el a garaa me ten, a laya kaa jofna no ten ee: «Kene refu o Ii-isra’el tigi, mbi’akaan leng refee no ten.»

⁴⁸Natana’el a layaan ee: «Ndi mam andtaxamo boo layaa kene?» Yeesu a doonaan ee: «Yaaga Filip xoyafulirang, a soƥ o ref yoora ndun naa ga’oong.»

⁴⁹Natana’el a doonaan ee: «O Caajangin oxe! Wo o mat refu o Ƥeenqe Roog, ref o maad Isra’el.»

⁵⁰Yeesu a doonaan ee: «Ke layoonga yee ga’aaxoong, a soƥ o ref yoora ndun naa soom taxu o gim! Xan o ga kaa hupna keene toox de!»

⁵¹Yeesu a doona taaga yee: «No ndigil, no ndigil, xan nu nga’ataa asamaan a wetoox, soo malaaka ke Roog a ŋaayaa, a mbudooxaa me o Ƥeenqe no kiin oxe a refna.»