Read NQAARIIT NE ROOG Saŋ 12 Bible Online

Saŋ 12 - NQAARIIT NE ROOG bible

Saŋ 12

¹Yaa Xew fee na colandax ale a yoqna ñaal ɓetuu fa leng, Yeesu a fadiida Betani, me Lasaar fee ta xontooxnoor’ina a reeƭna.

²Maaga, Yeesu a jawane a put. Marta diƈiid’u, Lasaar fo lakas a ndeer fo ten.

³Mari a janga ngap liibar ƭuumooxel seeru tigi kaa ne’eena naar, soo a ɗuumin na caf ake Yeesu. Cinj kaaga, a fortita a den wiil um. A ndok ale a naag’a sur fo tuñ pelu.

⁴O leng no daalbe waa ten ne’eena Yudaa o Iskariyot oxe, too a ref oxe na ɓoxotkaa a Yeesu a laya yee:

⁵«Mee ndax ƭuumooxel keene a waag’e o jikoor ngap xa qanjar teemeed tadik, soo a dimle’tikel rool we?»

⁶O nanangaa ta haptaa kaaga, reeƭee yee rool we ngaal’un. Ne ta reeƭna o kuuɗ, a xotaa na xaaliis o ndeerte nqe den ta geekoogna tax’u ta layan.

⁷Yeesu a laya yee: «Xaƴeen ta fi’in ndiiki ta refik qendandir o dal es.

⁸Rool we owe fa nuun bes fuu refna, ndaa mi o mat, refkiim fa nuun boo faw.»

⁹Yaawuur mayu a nana yee Yeesu oxaa Betani, too a ngara maaga, refee koy soom yaam Yeesu, ndaa ndax da nga a Lasaar fee ta xontooxnoor’ina.

¹⁰Saasadax maak waa a ngukra, a mbaaƭaa maa da mbaritna a Lasaar itam,

¹¹yaam kaa jeg’u Yaawuur mayu waa nqaƴoogna a den, a ngimat na Yeesu yaam o ten.

¹²No feet olaa, yaa mayu no waa ngar’ina na xew faa a nanna yee Yeesu oxe garaa Yeerusaleem,

¹³a njanga a naaq keec, a mbod mbaambir um a simatan too a layaa yee: «Hoosiyana! Oxe na garaa no gon le no Yaal oxe a hela simatel, ten fee o Maad Isra’el!»

¹⁴Yeesu a janga o mol o mbaam, a ŋaayin, ne a Pind a Tedu ke a layitna yee:

¹⁵«Siyoŋ, o ndoog onqe, koo ba o diid, o maad of oxey a garaa, a ŋaay no mol o mbaam.»

¹⁶Pitik, daalbe we and’ee ke keene a tekitna, ndaa yaa Yeesu a rokna no ndam um, a mbetandooxa yee a Pind akeene ten a ne’oogu, too a fadnan’e a den.

¹⁷Fop waa ndeeƭna fa Yeesu yaa ta xoyna a Lasaar na mboy alaa, a xontooxnoorin, a seede’anaan.

¹⁸Mayu a ngara me ten yaam a yeg o anddiloor oleene ta fi’’ina.

¹⁹Farisiya we a layra yee: «Nu nga’a, i nqotitkee teen dara, yaam adna fee fop fo ten a yoonu.»

²⁰A jeg’a koy Geegeres waa ngar’ina Yeerusaleem na xew faa, a mbaɗooxiid a Roog.

²¹A ngara maa Filip fee genna Betsayda no jegel olaa Galile, a nqeɗooxin ee: «Yaal mbind! In de, Yeesu i soxla’u.»

²²Filip a reta a layin a Andare, da yoon den ɗik, a njo’tin a Yeesu.

²³Yeesu a laya a den ee: «Waxtu fee o Ƥeenqe no kiin oxe a wareena o ɓoxot o ndam a fadiida.

²⁴No ndigil, no ndigil, mexe layaa a nuun ee: A refangee kaa mbep a uupoox a lanq boo a xon, sang um a yoqaa, ndaa a xonangaa, a naaga o saqaa xa tim xa mayu.

²⁵Oxuu fexna o ñoow um xan a ñakin, ndaa oxuu fexeeruuna na adna feeke, xan a geekanin o ñoow o fagkeer ole.

²⁶Oxuu na dagooxaxam, fat a reefaam. Muu refuuma, maaga o tag es a refkaa. Oxuu na dagooxaxam, xan Faap es a niwin.»

²⁷«Ndiiki koy, jaaxɗaam tigi. Kaa koy, xar um laykaa? Ndax kaam laykaa yee: Faap, muclaam na waxtu feeke? Mee ndax keene taxu um gar na waxtu fene!

²⁸Faap, ɓoxoti gon of o ndam ndiiki!» Maaga, a jega o ñuxur olaa inoorna na asamaan, a lay ee: «Ɓoxotaanum o ndam, too xam dakooxin o ɓoxot o ndam!»

²⁹Leng-leng no wiin waa nanna o ñuxur olaaga a laya yee: «Ƭuuɗ oo!» Lakas we yee: «Malaaka layu fo ten.»

³⁰Yeesu a laya yee: «Refee yee mi o ñuxur oleene a garanu, nuun o mat a garanu.

³¹Ndiiki koy, adna feeke a hate’e, o maad adna feeke a deɓel tafil.

³²Mi koy, boo andoona yee yoɗteem no lanq ke, xam qic wiin we fop na mi.»

³³Kaa lay’u keene, ndax ta lalit ne ta xonitkaa.

³⁴Wiin we a ndoona yee: «No kebil ke, kaa i njang ee Kiristaa fee, o Muumucil oxe regteena, boo faw a ñoowkaa. Yaaga koy, nam waago o layit ee xan o Ƥeenqe no kiin oxe a yoɗel? An refu o Ƥeenqe no kiin oxeene o ne’aa?»

³⁵Yeesu a laya a den ee: «A qoolaand ale miñkatee dara a ndeer nuun. Yaaga koy, ñaaƴyo ye nu maadna o njegaa a qoolaand, ndax o niɓaan ole ɓislooxkee a nuun. Oxe na ñaaƴaa no niɓaan kat, andee me ta jofaa.

³⁶Ye a qoolaand ale a refna fa nuun, ngimyo na qoolaand ale, ndax nu ndef xa teɓandoong a qoolaand.» Yeesu a laya keene, soo a ret a ɗas a den.

³⁷Ke Yeesu a fi’’ina fi xa anddiloor xa mayu na kid den fop oo, taxee Yaawuur we a ngim no ten.

³⁸Ke o tuleer oxaa ne’eena Esayi a lay’ina a fadnooxa: «O Yaal oxe, an gimu waare in? An o Yaal oxe a lalu katil a ñamaak um?»

³⁹Mbaag’ee o ngim. Esayi a lay’ahina yee:

⁴⁰«Kaa Roog a fuuland a den, a ŋajnoor a den, yaam ndik da nga’it a kid den, a andit a qeeñ den, soo da saktooxiid me mi, um wodand a den.»

⁴¹Keene kaa Esayi a lay’un, yaa ta ga’na o ndam onqaa Yeesu, a lay kaa jofna no ten.

⁴²Ndeer aa-adax waa sax, mayu a ngima no ten, ndaa o leng na den weejil’ee o ngim um yaam Farisiya we. Kaa saɗaroogu o sutel mbind a qeƭ ne da adooxan’ina.

⁴³Kaa o ngidim no wiin we a moƴan’u a den o ngidim Roog.

⁴⁴Yeesu a laya a maak ee: «Oxuu gimna na mi, refee yee na mi a gimu, ndaa no xe luliidaxama.

⁴⁵Ga’axama itam, a ga’a oxe luliidaxama.

⁴⁶Kaam gar na adna feeke nen a qoolaand, ndax oxuu gimna na mi, genkee no niɓaan ole.

⁴⁷Oxuu nanna a ƭelem es, too gayee a den, refee yee mi hate’un. Hate ɓisiidiraam na adna fee. Kaam gar kañ, ndax adna fee a muc.

⁴⁸Oxuu jaɓeeraxama, gimee fa lay es, a jega o kaahate. Fa lay fee yegnituuma na hate’kaa na bes fa mbalakaand faa,

⁴⁹yaam ke layuuma fop, xottinum na xoox es. Faap fee luliidaxama, simaxam ke waruuma o lay fo ke waruuma o yegnit.

⁵⁰Andaam koy xil ee kebil um, o ñoow o fagkeer ole a ɓisiidaa. Ten taxu ke layuuma fop, ne Faap fee a laytaxama o ten, laytanum.»