Read NQAARIIT NE ROOG Saŋ 14 Bible Online

Saŋ 14 - NQAARIIT NE ROOG bible

Saŋ 14

¹«Ba nu njaaxiɗ, ngimyo na Roog, ngim na mi.

²Xa moofand xa mayu xaay no mbind Faap es. Kaaga a jeg’angee, laykooginum a nuun. Kaam jagandankaa a nuun koy maa nu moofna.

³Boo retuuma, boo nu njeg maa nu moofna, xam nomtooxiid, xot a nuun, ndax me um refkaa, nu ndef maaga nuun itam.

⁴Nu anda a ƭat ale na ɓisaa me um jofaa.»

⁵Tomaa a layaan ee: «O Yaal oxe kat, i andee me o jofaa. Nam i mbaagu o andit a ƭat ale koy?»

⁶Yeesu a doonaan ee: «Mi refu a ƭat ale fo ndigil ne fo o ñoow ole. O leng waagee o fad me Faap fee, too reeftee na mi.

⁷Nu and’angaam, nu andkooga itam a Faap es. No ke xotitna ndiiki koy, nu andaan, too nu nga’aan.»

⁸Filip a layaan ee: «O Yaal oxe, lali a in a Faap fee, too kaaga xan a dey a in.»

⁹Yeesu a doonaan ee: «Filip, yaa refuuma fa nuun boo ndiik, too andiraamo! Oxuu ga’axama, Faap fee a ga’u. Nam waagaxamo o layit boog ee: ‹Lali a in a Faap fee?›

¹⁰Kaa gimiro yee mexey na Faap fee, Faap fee a ref na mi? Ke um layaa a nuun, xottinum na xoox es, too ke um fi’aa, Faap fee refna na mi na fi’an.

¹¹Nu mbara o ngim ee mexey na Faap fee, too Faap fee, oxey na mi. Nu ngimangee keene sax boog, nu ngim yaam a pi es.

¹²No ndigil, no ndigil, mexe layaa a nuun ee: Oxuu gimna na mi, xan a waag o fi a pi ake um fi’aa. Xan a fi kupun sax, yaam mexey retaa maa Faap faa.

¹³Kuu nu nqeɗna no gon es, xam fi’in, ndax no Ƥeenqe, Faap fee a ɓoxotel o ndam.

¹⁴Nu nqeɗangaa tig no gon es, xam fi’anin a nuun.»

¹⁵«Nu mbexangaam, fat nu ngay ke hebluuma a nuun.

¹⁶Mi koy, xam xeɗ a Faap fee, ta ci a nuun o Yaayaal oxaa na refkaa fa nuun boo faw.

¹⁷O Yaayaal oxeene refu Yiif le Roog saqna ndigil ne, ndaa o kiin adna waagiran o jaɓ, yaam ga’iran too andiran. Nuun o mat, nu andaan, yaam fa nuun a genu, too xan a ref na nuun.

¹⁸Xaƴkiim a nuun xa baan. Xam gar me nuun.

¹⁹Miñkatee dara, adna fee nga’katiraam, ndaa nuun, xan nu nga’aam, yaam mexe ñoowaa, too nuun itam xan nu ñoow.

²⁰A koom nu and ee mexey na Faap es, nu ndef na mi, um ref na nuun.

²¹Oxe na gayaa ke hebluuma, ten fexaxam, too fexaxama, xan Faap fee a fexin. Mi itam, xam fexin, too xam feeñlin oxe refuuma.»

²²Yudaa, fogree koy fa Yudaa o Iskariyot oxe, a layaan ee: «O Yaal oxe, xar taxu o fañ o lal adna fee oxe refoona, soo o lalan a in?»

²³Yeesu a doonaan ee: «Fexaxama, xan a gay fa lay es, too xan Faap es a fexin itam. Yaaga xan i ngar, ngen no ten.

²⁴Oxaa fexeeraxama, gaykee fa lay es. A ƭelem ake nu nanaa, ngatee na mi, ndaa na Faap es fee luliidaxama a ngatu.

²⁵Kaam lay a nuun keene koy, yaam ne maaduuma o refaa fa nuun.

²⁶Kaa koy, boo o Yaayaal oxe, refna ref Yiif Tedu le Faap fee a luliidkaa no gon es a garna, xan a jangin a nuun fop, a wetand a nuun fop ke layuuma a nuun.

²⁷Mexe xaƴtaa a nuun jam es, kaam ee ci’aam a nuun jam es. Kaa koy ci’titinum ne adna fee a ci’titaa. Ba nu njaaxiɗ, too ba nu ndiid.

²⁸Nu nana ke layuuma a nuun: Mexey retaa, ndaa xam nomtooxiid me nuun. Nu mbex’angaam, nu mbelakinooxkooga no ke um retaa na Faap faa, yaam Faap fee hupaxam.

²⁹Layaam a nuun keene yaaga fadiidafulee, ndax boo ta fadiidna, nu ngim na mi.

³⁰Fa lay es fa nuun maykatee, yaam o maad[3] adna feeke a inooxa, ndaa koy waaganiraam dara.

³¹Kaa koy, ndax adna fop a and ee fexaam a Faap fee, too ke ta hebilna rek um reefaa, inooxyo i ndet.»