Read NQAARIIT NE ROOG Saŋ 19 Bible Online

Saŋ 19 - NQAARIIT NE ROOG bible

Saŋ 19

¹Maaga, Pilaat a simta Yeesu a xotel, a xawel xa cap.

²Xiixire waa a ndalfooxa o ndiw o ndip kiƈ, a ndokanin o ten fo lori yaxgu coy,

³a ngaraa boo paam um a layaa yee: «Daali maad no Yaawuur we, walid!» Naaga, kaa muqoogun paƭ.

⁴Pilaat a dakooxa o sutooxiid, a lay Yaawuur we yee: «Xam sutanin a nuun, ndax nu and ee mi fa xoox es ga’iim no ten sik fa leng.»

⁵Yeesu a sute, a rokel o ndip kiƈ onqe took xoox um fo lori yaxgu coy ne. Pilaat a laya yee: «O kiin oxe xey.»

⁶Yaa saasadax maak waa fo alkaati kaa a nga’uuna, a mbuuqooga yee: «Rengeen! Rengeen na kurwaa!» Pilaat a doona a den ee: «Njangeenoo ndengankin a qoox nuun, yaam ga’iim no ten sik fa leng, mi o mat.»

⁷Naaga Yaawuur we a ndoonaan ee: «I njega kebil, too ne kebil neene a laytuuna, a wara o xon, yaam kaa fi’ooxaa o Ƥiy Roog.»

⁸Yaa Pilaat a nanna a ƭelem akeene, a moƴa o diid.

⁹A roka no xeloorand olaa, a lay a Yeesu yee: «Mam inooro?» Yeesu o mat, dooniran dara.

¹⁰Pilaat a dakooxaan o lay ee: «Mi faño doon? Kaa andiro yee waagaaxoong o xaƴ mbaat um rengnong na kurwaa?»

¹¹Yeesu a doonaan ee: «Jegkoogiro sañ-sañ fa leng na mi, Roog a coox’angirang o ten. Ten taxu, oxe ɓoxotaxama a ndeer xa ƥay of a fi’a bakaad faa moƴna o magin fee wo.»

¹²No kaa xotitna na waxtu faaga, Pilaat kaa waaƭoogatu maa ta xaƴtuuna. Yaawuur we o mat kaa moƴ’u o mbalalooxaa yee: «O xaƴangaan ta ret, o and ee refiro xaariit Kesaar fee. Oxuu ne’ooxna meen o maad, o pañ Kesaar fee yoo.»

¹³Yaa Pilaat a nanna a ƭelem akeene, a sutiida a Yeesu, a moof me ta hate’taa yaa nqeloor a jegna. Meene, kaa dungit’el a kac, too no ɗelem hebre da nqoyan Gabata.

¹⁴Kaa soƥ Xew fee na colandax ale a waajaneel, no mbuyukuun naa. Naaga, Pilaat a laya Yaawuur we yee: «O maad nuun oo xeene.»

¹⁵Yaawuur waa a moƴa o mbalaloox ee: «Fat a warel! Fat a warel! Rengeen na kurwaa!» Pilaat a doona a den ee: «Mi, um reng o maad nuun na kurwaa?» Saasadax maak we a ndoonaan ee: «I njegee o maad o tefee Kesaar fee.»

¹⁶Maaga, a ɓoxotaan a den, ndax ta rengel na kurwaa. A ndama a Yeesu soo a ƥisin.

¹⁷Yeesu a gadooxa a kurwaa um, a gar boo a fadiid me ne’eena «o mbiñ onqe no Nqolof ne», too no ɗelem hebre da layan Golgota.

¹⁸Maaga o mat a rengte na kurwaa, ten fo wiin ɗik lakas, da ndeerin.

¹⁹Ndax ta lalit ke taxna ta rengel, Pilaat a dalfooxa o bindin ee: «Yeesu o Naanasaret oxe, o maad oxe no Yaawuur we», soo ta daaƴel took a kurwaa le.

²⁰Yaawuur mayu a njanga a pind akeene, yaam me Yeesu a reng’eena na kurwaa goƭ’ee Yeerusaleem. Oxe bind’e na hebre fo na lateñ fo na gerek.

²¹Saasadax maak we no Yaawuur we a laya a Pilaat ee: «Ba o bind ee: O maad no Yaawuur we. Koo bindkaa yee: Kaa lay ee mi refu o maad oxe no Yaawuur we.»

²²Maaga Pilaat a doona yee: «Ke binduuma, bindaanum boo ƴut.»

²³Cinj ye xiixire we a ndengna a Yeesu, a njanga tikoorik ke ten, a mbi a den a seek a nahak, o qiixire oxuu refna fo a seek. Cinj kaaga, a njanga sabadoor um ne jeg’eerna o ƭiis o leng, ndax a ref piis muum ƭiisaand sen no ke xotitna took boo a lanq, soo a lay ee:

²⁴«Ba i nquuyin, fat i mbanjangin.» Kaaga a xewa, a fadin ke a Pind a Tedu ke a ne’oogna, ye da layna yee: «A lasra tikoorik es, soo a mbanjang sabadoor es.» Keene o mat xiixire we a mbi’u.

²⁵Paam a kurwaa le Yeesu a rengeena, Mari fee ya um oxe geenooxa fo o ndeɓ um fa Mari fee o tew Kolopaas fa Mari-Magdala.

²⁶Yaa Yeesu a ga’na a ya um, ta geenoox, o taalbe xe ta fex’ina a ref paam um, a laya a ya um ee: «O tew oxe, o ƥeef oo xeene.»

²⁷Cinj kaaga, a laya o taalbe xe yee: «Ya of oo xeene.» No kaa xotitna na waxtu faaga, o taalbe xeene a ɓisu a Mari no mbind um.

²⁸Cinj kaaga, ye Yeesu a andna yee a fadna bareef um fop, a laya yee: «Kaam hoɗomel.» Kaa lay’un, ndax a Pind a Tedu ke a mbadnoox.

²⁹A jeg’a maaga o jalag o mayu muut fa bineegar. Xiixire we a ndalfooxa o njang o loq isoop, a morgin liir, soo a suupin na bineegar fee, a luuxnin o ten.

³⁰Yaa Yeesu a ñimna bineegar faa, a laya yee: «Fop a fadnooxa.» A yoornooxa, soo a saay.

³¹Yaawuur we mbug’ee xa tal axe a maad took a kurwaa ke na Xew fee na colandax ale. Kaa mbaambir’u fa bes fee na ñootnax ale a jopir da mbaajanaa Xew fee na colandax ale. A nqeɗa a Pilaat ndax a caf ake no we ndengeena a ƥolel soo da ñof o mbudnel.

³²Cinj kaaga, xiixire we a ngara me no we ndengeena, o eetaand oxe, da ƥol a caf ake, a suur no ƭikandeer oxe, a ƥol a caf ake itam, soo a ngar na Yeesu.

³³Yaa da matiiduuna boo a nga ee a saaya yaaga, a mbañata o ƥol a caf ake.

³⁴O leng no xiixire we a dibaan a salma no ɓemb, too ndak fo ndak a wata po’oy fa foofi.

³⁵Oxe doonna keene a ngid a layaan, too ke ta layna ndigil oo. A anda xil itam ee ndigil a layu. Kaa layin, ndax nuun oo nu ngim.

³⁶Keene a xewa ndax ke a Pind a Tedu ke a ne’oogna a fadnoox, ye da layna yee: «O hiiƈ um o leng ɓolkaand.»

³⁷A jega maa a Pind a Tedu ke a laytahinna yee: «Xan a ndaxaaƴooxaa oxe da ndibna.»

³⁸Ye keene a xewna, Yoseef fee genna Arimate, too a reeƭu o taalbe Yeesu na pet, yaam a saɗar’u Yaawuur we, a reta maa Pilaat, ndax ta ci’in ta xendand o dal ole Yeesu. Pilaat a ci’aan o ten, too a gara, a xot o dal ole.

³⁹Nikodeem fee mos’ina o ret maa Yeesu o yeng a gara itam, a ɓislooxiid ngap kilo qarɓeen tadik fo kilo tadik miir faa jaxaseena fa alowes.

⁴⁰Ten fa Yoseef a njanga o dal ole Yeesu, a nqendandtin qeeñe-xeeñe keene, a laxasin njoor, ne Yaawuur we a mbi’antan xon den.

⁴¹Paam me Yeesu a reng’eena na kurwaa, a jeg’a a ƭing fo a mboy alaa o leng a mos’aandeena o ɓek.

⁴²Ne Yaawuur we ndeeƭna no mbaajanaa Xew fee na colandax ale, too a mboy aleene a mat’u, a ndeta, a ƥek a Yeesu taaga.