Read NQAARIIT NE ROOG Saŋ 2 Bible Online

Saŋ 2 - NQAARIIT NE ROOG bible

Saŋ 2

¹No ñaal ndadkandeer ne, a jeg’a ngulook kam Kana, no jegel olaa Galile, too ya Yeesu a reeƭa maaga.

²Yeesu fo daalbe um oo a nqur’e no ngulook naa.

³Yaa da ndefna maaga boo biiñ faa a dangaa, ya Yeesu a gara, a layin ee: «E, biiñ jegatee de.»

⁴Yeesu a doonaan ee: «Ndi tew oxe, xar i ndeeru? Waxtu es kaa fadaful!»

⁵Ya um oo a laya dag waa yee: «Kuu ta layna a nuun, fat nu mbi’in!»

⁶A jeg’a maaga koy xa calag ɓetaa fo leng xa maak axaa Yaawuur we a njaptoogna, too oxuu refna teen a waag o yip ngap xa liitar qarɓeen ɓetuu tadik boo na xa liitar teemeed fo qarɓeen ƭik sax.

⁷Yeesu a laya a den ee: «Yipyo foofi na xa calag axeene boo da may.» A yipa taaga foofi itam boo ta fod na kiig ake.

⁸A layahina a den ee: «Ndiiki koy nqafyo teen too ƥisin oxe geenooxna a put ale.» Den oo a nqafa, a ƥisin o ten.

⁹Yaa oxe geenooxna a put ale a ñimna foofi le supit’eena biiñ, too andee me ta hatna — kaa koy, dag we nqafna, a ƥisiidin a and’a fop — a xoya o kor-no-kulook oxe,

¹⁰soo a layin ee: «Wo o mat, a saax ɓetaa ƭaq a eetaa o cooxit biiñ fa mbaax fee boo yaa fop a ndeyƭooxna, soo da sog o sut fee moƴanna, e soo o moof boo waxtu fene, o sog o sutaa fa mbaax fee!»

¹¹Neene o mat o anddiloor o eetaand ole na xa anddiloor axe Yeesu a xewit’u kam Kana no jegel ole Galile. Maaga, a feeñla o ndam um, soo daalbe um a ngim no ten.

¹²Cinj kaaga, a reta Kapernawum, a yoon fa ya um fo xa teɓ um fo daalbe um, ndaa moofee maaga ñaal mayu.

¹³Xew fee na colandax ale Yaawuur we a ndoofandoogna a mat’a, too Yeesu a reta Yeerusaleem.

¹⁴A gara, a soƥ kam Mbind Roog ne jiijikax naak fo paal fo a qoɗoxoñ fo weewecet xaaliis da moof.

¹⁵A dalfooxa o humin o qiir, a rax a den Mbind Roog naa, den oo, paal ke yoo, naak ke yoo, soo a pasar xaaliis fee no weewecet we, a jiƭit a taabul ake,

¹⁶a lay jiijikax a qoɗoxoñ ake yee: «Aca, mbatinyo kene meen! Ba nu mbi Mbind Faap es o jikoorand!»

¹⁷Maaga, daalbe we ten a mbetandooxa ke a Pind a Tedu ke a layna: «O mbeq onqe damtuuma Mbind of kaa nand nen fiɗel laa na kaƥaa no xeeñ es.»

¹⁸Yaawuur we a layaan ee: «Wo o mat, o anddiloor olum waago o fi na kid in boo ta lal a in ee jegaa sañ-sañ o fi kene?»

¹⁹Yeesu a doona a den ee: «Yaqyo Mbind Roog nene, too ndeer mene fo ñaal tadik xam geennatinin.»

²⁰Yaawuur we a layaan ee: «Heey, Mbind Roog nene a maxeel boo a jeg xa kiid qarɓeen nahik fo xa kiid ɓetaa fo leng, wee xan o geennatinin ndeer mene fo ñaal tadik!»

²¹Kaa koy, cer um a layoogu Mbind Roog ne.

²²Ten taxu itam, yaa ta xontooxna, daalbe um a mbetandooxa yee a lay’a kaa jofna no kaaga, too a ngima a Pind a Tedu ke fo fa lay fee Yeesu.

²³Ye Yeesu a refna Yeerusaleem na Xew fee na colandax ale, mayu a ngima no ten, ye da nga’na xa anddiloor axe ta fi’oogna.

²⁴Yeesu koy, hooloox’ee a den yaam a and’a a den, den fop.

²⁵Soxla’ee itam o leng a seede’an o kend um, yaam o ten fa xoox um a anda ke refna no kiin oo kiin.