Read NQAARIIT NE ROOG Saŋ 4 Bible Online

Saŋ 4 - NQAARIIT NE ROOG bible

Saŋ 4

¹We mbugna o ndeef a Yeesu a ngara maa ten, ndax ta batiise a den. Kaa koy, refee yee Yeesu fa xoox um batiise’oogu, ndaa daalbe um. Neene, daalbe we Yeesu a moƴ’ata o may we Saŋ. Yaa Yeesu a yegna yee Farisiya we a nana keene, a inoora Yudee, soo a nomtoox Galile.

⁴Ne Yeesu a war’ina o xaañ a Samari koy,

⁵a fadiida na teeru fa leng no saax laa Samari. Teeru faaga, Sikaar a ne’e, a ref paam o qol olaa Yakoob a xuuyan’ina a Yoseef fee o ƥeem.

⁶A ngas ale Yakoob, maaga a reeƭu itam. Yeesu kaa xij’u bo yaam a ñaaƈ a koƭu le, too a gara a moof paam duutung le na ngas ale, a soƥ njeeƈ ne a fod ndeer xoox.

⁷A jeg’a o tew o Saasamari xaa garna a ƴeewiid, too Yeesu a layaan ee: «Tew oxe, ngela ci’aam um yer.»

⁸Daalbe um o mat kaa ndet’u no taax kaa, ndax da njik kaa da mbutooxna.

⁹O tew o Saasamari xaa a layaan ee: «Nam wo o Yaawuur o mat o mat waagaxamo o xeɗit foofi, mi fee refna o tew o Saasamari?» O nanangaan koy, kaa Yaawuur we fo Saasamari we ne’roogee.

¹⁰Yeesu a doonaan ee: «O and’angaa ci’it Roog, and itam oxe layoonga yee ‹Ci’aam um yer›, xeɗkoogaano wo fa xoox of, too yaaga a ci’koogaang foofi fo ñoow.»

¹¹O tew oxe a layaan ee: «E, yaal mbind! Jegiro ƈeewir leng, a ngas ale a xooɗit nene, mam o jegitkaa foofi fo ñoow koy?

¹²Ndi boog wo hupu o taan in Yakoob fee waqanna a in a ngas ale, a yer teen, ten fa xoox um fo xa ƥeem fo xa siir um?»

¹³Yeesu a doonahinaan ee: «Oxuu yerna foofi leene, xan a dakoox o hoɗomel a miñ miñ.

¹⁴Kaa koy, oxe na yerkaa foofi le um cooxkan, hoɗomkataand boo muk. Foofi leene um cooxkan xan a fi kam um a mbeel alaa a cur ake a nqawraa, a cooxin itam o ñoow o fagkeer ole.»

¹⁵O tew oxe a layaan ee: «Yaal mbind! Ci’aam boog na foofi laaga, ndax hoɗomkataandeem, too soxla’katiim o ƴeewiidaa mene.»

¹⁶Yeesu a layaan ee: «Reti xoyiid o kor of.»

¹⁷O tew oxe a doonaan ee: «Jegiim o kor.» Yeesu a layaan ee: «Layaa ndigil, ye layoona yee jegiro o kor.

¹⁸Jeg’aa gor boo da mbad ɓetuk, too oxe refna fa wo ndiiki refee o kor of tigi. Ndigil kak layo!»

¹⁹Maaga, o tew oxe a layaan ee: «Ndik ee o tuleer refo yoo!

²⁰In Saasamari koy, daan in no joong olene a mbaɗoortoogu a Roog, ndaa nuun Yaawuur o mat, kaa nu layaa yee Yeerusaleem wiin we a mbaru o mbaɗoortaa.»

²¹Yeesu a layaan ee: «Tew oxe, dooni nqol no ke um layang, yaam waxtu fee nu mbarateerna o mbaɗoortaa a Faap fee no joong oleene mbaat Yeerusaleem a fadiida.

²²Kaa nu mbaɗooxaa kaa nu andeerna, in koy, ke i andna i mbaɗooxaa, yaam a muc ale no Yaawuur we a hatu.

²³Kaa koy, waxtu fee oxe garaa, too a fadiida sax. Ndiiki, faafaɗax tigi we xan a mbaɗooxaa a Faap fee no yiif fo ndigil, too faafaɗax nandu naaga soom Faap fee a laamtu.

²⁴Roog Yiif oo, too we na mbaɗooxan, yiif fo ndigil a mbarun o mbaɗoortaa.»

²⁵O tew oxe a layaan ee: «Andaam ee o Muumucil oxe regteena, too ta xoyeel Kiristaa fee, xan a gar. Yaa ta garkaa xan a xoolandan a in kuu refna.»

²⁶Yeesu a layaan ee: «Mi yoo, mi fee na layaa fa wo.»

²⁷Maaga, daalbe we ten a mbadiida, a soƥin ta layaa fo o tew. Kaaga a bet’a a den lool, ndaa koy o leng layiran ee: «Ndi xar o laamtaa?» mbaat «Xar o layaa fo ten?»

²⁸O tew oxe a waasa maaga nqaw naa ten, a digan teeru faa boo a fadiid, soo a lay wiin waa yee:

²⁹«Ngela ngaryo nga o koor oxaa layaxama ke mosuuma o fi fop. Ndax refee Kiristaa fee o Muumucil oxe regteena?»

³⁰A ndalfooxa o sutoox teeru faa, ee giƭ a ngaraa me ten.

³¹Kaaga kaa soƥ’u daalbe we ten a mbam’an, a ndamin na: «O Caajangin oxe! Gari ñaam waay!»

³²Ten o mat a laya a den ee: «Kaam jeg ñaamel kaa nu andeerna.»

³³Daalbe we a layra a ndeer den ee: «Too refee yee o kiin kaa futiidin?»

³⁴Kaa koy, Yeesu a laya a den ee: «Ñaamel es refu um fi’aa ke oxe lulaxama a bugna, soo fadin calel um.

³⁵Ndax kaa nu naangee o layaa yee: ‹A saxad ale a yoqa a qool a nahak›? Kaam ee: Ndaxaaƴooxyo too nga ne xa qol axe a mbi’itna a tan-ee-ran.

³⁶Oxe na saxadlaanaa kaa rabdeel, too a naaga o fokatanaa o ñoow o fagkeer ole xa tim, ndax oxe na duufaa fo xe na saxadlaanaa a mbelakinooxandoor.

³⁷Ke layeena yee: ‹O leng na duufaa, o lakas a saxadaa›, ndigil kak oo.

³⁸Kaam lul a nuun nu saxadik maa nu njaleerna. Lakas kaa njal, soo nu ndokatiloox kam jale den.»

³⁹Mayu no Saasamari waa ngen’ina na teeru faaga a ngima na Yeesu, yaam ke o tew oxe a lay’ina yee: «A layaxam ke mosuuma o fi fop.»

⁴⁰Ten taxu, yaa Saasamari waa a ngarna a soƥiidin, a nqeɗooxaan, ndax ta moof fa den. A moofa maaga boo a jeg ñaal ƭik.

⁴¹Wiin waa moƴna o may a ngima yaam fa lay fee Yeesu

⁴²boo a layataa o tew oxe yee: «Refatee yee ke layoona taxu i ngim no ten, yaam i nanana a qoox in, too i anda xil ee ten refu o Muumucil adna.»

⁴³Cinj ñaal ƭik kaaga, Yeesu a inoorta maaga, a ret Galile.

⁴⁴O ten fa xoox um sax a lay’a yee: O tuleer naagee o niweel me ta rimeena.

⁴⁵Yaa ta fadiidna, Gaagalile we a ndalin’aan a paax. Weene itam a nga’’a ke ta fi’’ina na xew faa Yeerusaleem fop, yaam a ndet’a taaga.

⁴⁶Cinj kaaga, a nomtooxa na saate faa Kana no jegel olaa Galile. Maaga a suptit’u foofi boo ta refat biiñ. A jeg’a koy na teeru faa Kapernawum o kiin oxaa jaloogna no maat ne, too o ƥeem a jir’u.

⁴⁷Yaa ta nanna yee Yeesu a inoortiida Yudee a gar Galile, ta dalfoox o inoox, a ret maa ten, too a xeɗin ndax ta gar a wodand o ƥeem onqe reeƭna ndeer xon fo ñoow.

⁴⁸Yeesu a layaan ee: «Nu ngimkee muk, a refangee kaa nu nga xa anddiloor fo comlaand!»

⁴⁹Oxaa jaloogna no maat ne a doonaan ee: «Koo Yaal oxe, gari boo o ƥees a xonaa!»

⁵⁰Yeesu a layaan ee: «Reti, o ƥeef oxaa ñoowaa.» O koor oxaaga a gima fa lay fee Yeesu, too a dalfooxa o ref na ƭat.

⁵¹Ye ta xaadaa, a xeta fo dag um, da layin ee: «O ƥeef oxaa ñoowaa. A woda ceŋ.»

⁵²A laamta a den ee: «Farna fa waxtu fum a moƴan’u?» A ndoonaan ee: «Faak, cinj a put a sumaan ale a waasun.»

⁵³Maaga, faap fee a wetandooxa yee na waxtu faaga deŋ Yeesu a lay’un ee: «O ƥeef oxaa ñoowaa.» A dalfooxa gim, ten fo mbind um fop.

⁵⁴O anddiloor o ɗikandeer oleene, Yeesu xe fi’aan ye ta inoorna Yudee, a gar Galile.