Read NQAARIIT NE ROOG Saŋ 6 Bible Online

Saŋ 6 - NQAARIIT NE ROOG bible

Saŋ 6

¹Yaa keene a xewna, Yeesu a laqtooxa kaltaa o Maag olaa Galile, leng-leng a nqoyan o Maag ole Tiberiya.

²Wiin mayu a ndeefanaan yaam ne da nga’na xa anddiloor axe ta fi’oogna na bodand ale no jiru we.

³Yeesu a dalfooxa o ŋaay took o joong olaa reeƭna maaga, soo a moof fo daalbe um.

⁴A soƥ’a koy bes fee na Colandax ale refna ref xew fee no Yaawuur we, a faambnoox.

⁵Yaa ta ƴooklooxna boo a ga wiin mayu a nqotiidaa farna fa den, Yeesu a laamta a Filip ee: «Ndi mam i njegitkaa puuru ndax wene a njeg kaa da ñaamna?»

⁶Kaa ɗeetlooxoogun soom, yaam a and’a xil ke ta fi’kaa.

⁷Filip a doonaan ee: «Andaam ee i njik’angaa xa qanjar teemeed ƭik sax oo xetandkee a den, deykee a den njemaƭax sax!»

⁸O leng no daalbe we ten oxaa ne’eena Andare, a ref o ndeɓ Simoŋ Piyeer, a layaan ee:

⁹«A jega mene de o njaaƈ o ngoor onqaa saqna puuru ƥetik kaa mbi’teena lorso, fo liƥ ƭik, ndaa andiim ke keene a ɗaxna faan fod nene.»

¹⁰Yeesu a laya daalbe waa yee: «Layyo a den da moof.» Maaga a jeg’a suuƴin mayu. A ndalfooxa o moof, goor we a ndef ngap cuni ƥetik.

¹¹Yeesu a janga puuru kaa, a gidim a Roog soo a lasin we moof’ina. A cooxa a den itam no liƥ kaa boo da ndeyƭoox.

¹²Yaa fop a ngiñna, Yeesu a laya daalbe um ee: «Mbokatyo xa ƭeg axe yoqna ndax dara mo’kee teen.»

¹³A ndalfooxa o mbokat a den soo a yip puuru lorso ke yoqna na ƭamba xarɓaxay fo a ƭamba ƭak ye fop a ñaamna boo a ngiñ.

¹⁴Yaa wiin weene a nga’na o anddiloor ole Yeesu a fi’’ina, a layrooga yee: «Oxene o mat refu o Tuleer oxe warna o gar na adna.»

¹⁵Yaa Yeesu a andna koy ee kaa mbugin o ngif, a ndodkin o maad, a dalfooxa o inoox, a ret no joong olaa, ten doŋ.

¹⁶Yaa roog a yaarna, daalbe we ten a ndalfooxa o mbudoox, a ngar na ƥeeraamb alaa.

¹⁷A ndoka no suk, a nqaañ o maag ole, a ndet Kapernawum. Tigaa a yeng’a sax, too Yeesu daab’afulee a den.

¹⁸A xeñooga nqeñ ƭomu, o maag ole a jiqtooxaa nen kaa o leng a andeerna.

¹⁹Yaa da lafna boo ngap kilomeet ƥetik mbaat ɓetaa fo leng, a ƈooka a Yeesu ta ñaaƴaa took foofi laa no maag ole, a garaa farna fo suk ne. A ndiid’a lool.

²⁰Kaa koy, Yeesu a laya a den ee: «Ba nu ndiid! Mi yoo.»

²¹A mbugaan o ndokin no suk naa, too ndak fo ndak suk naa a ranga maa da njofoogna.

²²Wiin waa yoq’ina kaltaa koy, a nga’a yee suk leng kut reeƭu maaga, ta ref ne daalbe we a ndok’ina a ndet, too Yeesu yoon’ee fa den.

²³No feet olaa, yaa suk lakas a inoortiidna Tiberiya, a ngar boo paam maa da ñaamit’ina puuru kaa ye o Yaal oxe a xeɗna boo a ƴut,

²⁴wiin waa a nga’a yee Yeesu fo daalbe um ndeeƭee taaga. Maaga, a ndalfooxa o ndok no suk kaaga, a ndet Kapernawum, a mbaaƭik a Yeesu.

²⁵Yaa da soƥna a Yeesu kaltaa o maag olaa, a layaan ee: «O Caajangin oxe! A mban garo mene?»

²⁶Yeesu a doona a den ee: «No ndigil, no ndigil, mexe layaa a nuun ee: Refee yee yaam ne nu nga’na xa anddiloor taxu nu mbaaƭaxam, ndaa yaam ne nu ñaamneena puuru boo naag tem.

²⁷Koo qoyni, baa ŋos-ŋos nuun a haan no ñaamel ke andoona yee a miñ miñ kaa ƥooskaa rek, ndaa fat a haan no ñaamel ke na ndefkaa boo no ñoow o fagkeer olaa, too o Ƥeenqe no kiin oxe a ci’kan a nuun. Ten o mat, Roog Faap fee a ñaasu.»

²⁸A layaan yee: «Xar i mbaru o mbi boo mbadin a pi ake Roog a bugna?»

²⁹Maaga, Yeesu a doona a den ee: «A pi ale Roog a bugna refu yee nu ngim no xe ta luliidna.»

³⁰A layahinaan ee: «O anddiloor olum o fi’kaa koy boo i nga’ood, ngim na wo? Xar o fi’kaa fi?

³¹Daan in a ñaama maan na koƥ alaa naagna halit, ne ta bindteena yee ‹A ci’a a den mbuuru aa-asamaan da ñaam.› »

³²Yeesu a doona a den ee: «No ndigil, no ndigil, mexe layaa a nuun ee: Reeƭee yee Moyiis ci’u a nuun mbuuru aa-asamaan, Faap es kañ na ci’aa a nuun mbuuru aa-asamaan ndiindigil ne.

³³Mbuuru ne Roog refu ne fudoorna na asamaan, too adna fop, ta ci a den o ñoow.»

³⁴A layaan ee: «O Yaal oxe, boo ndiik rek ci’i a in no mbuuru naaga.»

³⁵Yeesu a laya a den ee: «Mi refu mbuuru ne na ñoowdandaa. Oxuu garna me mi xeexkaand boo muk, too gimna na mi hoɗomkaand boo faw.

³⁶Kaa koy, layaanum a nuun, nu nga’axam, ndaa nu ngimee.

³⁷We Faap fee a ci’axama fop, xan a ngar me mi, too koy o mat, sutkiim muk oxaa garna me mi.

³⁸Yaam ke taxna um inoor na asamaan gar, refee yee ndax um fi ke felaxama fel, ndaa ndax um fi ke felna oxe luliidaxama.

³⁹Ke felna oxe luliidaxama koy, refu yee o leng no we ta ci’axama mo’kiraam, ndaa um xontooxnoor a den no ñaal mbalakaand naa.

⁴⁰Ke Faap es a bugna refu yee oxuu ga’na o Ƥeenqe, too a gim no ten, a jeg o ñoow o fagkeer ole, too xam xontooxnoorin no ñaal mbalakaand naa.»

⁴¹Yaawuur waa koy, a nqaada a Yeesu, yaam ne ta lay’ina yee: «Mi refu mbuuru ne fudoorna na asamaan.»

⁴²A laya yee: «Andum tiye kaa refatee Yeesu fee o ƥiy Yoseef, rimeena na kid in, baa um oo ya um oo, fop i and a den? E, nam a waagu o layit boog ee: ‹Na asamaan fudoorum›?»

⁴³Yeesu a doona a den ee: «Koo ba nu nqaadaam.

⁴⁴O leng waagee o gar me mi yaa Faap fee luliidaxama a qiciideeruuna me mi, too yaaga xam xontooxnoorin na bes fa mbalakaand faa.

⁴⁵A binde no leng na safe ke no duleer we yee: ‹Den fop, xan Roog a jangin a den.› Neene itam, oxuu andoona yee a nana ke Faap fee a layna, too a jaɓ a cangin um, xan a gar me mi.

⁴⁶Keene koy tektee yee o kiin a mos o ga a Roog Faap fee, a refangee oxe inoorna maa ten. Oxeene rek ga’u a Faap fee.

⁴⁷No ndigil, no ndigil, mexe layaa a nuun ee: Oxuu gimna na mi, a jega o ñoow o fagkeer ole.

⁴⁸Mi o mat refu mbuuru ne na ñoowdandaa.

⁴⁹Daan nuun a ñaama maan kam a koƥ-a-ƥor alaa, too yaqanee da nqon.

⁵⁰Oxene koy refu mbuuru ne fudoorna na asamaan, ndax oxuu ñaamna teen xonkee.

⁵¹Mi refu mbuuru ne no ñoow ole hatna na asamaan. Oxuu ñaamna no mbuuru neene koy xan a ñoowaa boo faw. Mbuuru ne um ci’taa koy refu cer es ke um ci’itkaa, ndax adna fee a ñoow.»

⁵²Took a ƭelem akaaga, Yaawuur waa a ndalfooxa o ñimatiraa yee: «Nam a waagu o ñaamnit a in cer um?»

⁵³Yeesu a laya a den ee: «No ndigil, no ndigil, mexe layaa a nuun ee: Nu ñaamangee cer no Ƥeenqe no kiin oxe, yer fo’oy um, nu saqee o ñoow na nuun.

⁵⁴Oxuu ñaamna cer es, a yer fo’oy es, a jega o ñoow o fagkeer ole, too na bes fa mbalakaand faa xam xontooxnoorin.

⁵⁵Cer es ñaamel tigi yoo, fo’oy es a ref a yer tigi.

⁵⁶Ñaamna cer es, a yer fo’oy es, xan a sax na mi, um sax no ten.

⁵⁷Oxuu ñaamaxama, xan a ñoowit na mi, ne um ñoowtaa na Faap fa ñoow jok fee lulaxama.

⁵⁸Oxene mat refu mbuuru ne fudoorna na asamaan. Refitkee nen daan we nuun ñaam’ina maan, too yaqanee da nqon. Oxuu ñaamna no mbuuru neeke koy, xan a ñoowaa boo faw.»

⁵⁹Keene fop Yeesu xe laytaan no mbind a qeƭ naa Kapernawum, a soƥ ta jangnaa.

⁶⁰Yaa mayu no daalbe we Yeesu a nanna a ƭelem akaaga, a laya yee: «Heey! Fa lay fene a ñexeta koy! An waagu waag o moof sax tee kaa o nan-gilooxan?»

⁶¹Yaa Yeesu a andanna a xoox um ee daalbe we sax me da ndefna kaa nqaadoox yaam keene, a laya a den ee: «Ca! Tiye kaa bug o ref na nuun a panq?

⁶²Ii, nu nga’angaa o Ƥeenqe no kiin oxe a ŋaay, a nomtooxaa maa ta reeƭna koy?

⁶³Yiif le Roog na ñoownaa, cer ƭaxee dara boo dara fag. A ƭelem ake layuuma a nuun koy, Yiif fo o ñoow a ndefu.

⁶⁴A jega koy a ndeer nuun waa ngimeerna.» Yeesu no mberaand naa a andit’u we ngimeerna. A and’a itam oxe nar’uuna o ɓoxot.

⁶⁵Yeesu a doona taaga, a lay a den ee: «Keene mat taxu um lay a nuun ee o leng waagee o gar me mi, a refangee kaa Faap fee a ci’in o ten.»

⁶⁶Na waxtu faaga, mayu no daalbe we ten a nomtooxu a cinj, a mbañat o yoonaa fo ten.

⁶⁷Yeesu a laya xarɓaxay fo ɗik we yee: «Nuun koy, ndax kaa nu mbugee o ndet?»

⁶⁸Simoŋ Piyeer a layaan ee: «O Yaal oxe, na an i njofkaa? Mee ndax wo saqu fa lay fee na ci’taa o ñoow o fagkeer ole!

⁶⁹In koy, i ngima, too i anda yee wo refu o Tedu xe hatna na Roog.»

⁷⁰Yeesu a doona a den ee: «Nuun xarɓaxay fo ɗik we, ndax refee yee mi jilu a nuun? A jega na nuun koy oxaa fogna no ƈiƴ oxe.»

⁷¹Yudaa o Iskariyot oxe o ƥiy Simoŋ a ne’oogu, yaam o ten na ɓoxotkan, too no xarɓaxay fo ɗik we a fogu.