Read NQAARIIT NE ROOG A pi ake 11 Bible Online

A pi ake 11 - NQAARIIT NE ROOG bible

A pi ake 11

¹Apootar waa fo fog gimu waa ndeeƭna no jegel olaa Yudee a nana yee we ndefeerna Yaawuur itam a ndaawa fa lay fee Roog.

²Yaa Piyeer a nomtooxna Yeerusaleem, gimu we mbogna na xeet fee no Yaawuur we a nqasanoogaan, a layaa yee:

³«Kaa o rokaa no mbind no we nqucooxeerna, soo ñaamaa fa den.»

⁴Naaga, Piyeer a refa no wetandooxaa a den ke xew’ina fop, a lay ee:

⁵«Reeƭaam kam teeru faa Yope, xeɗaa. Feeñoox’eem, too ga’aam kaa nandna nen ƭaap maak a humel na xa noflax xa nahaq axe. Na asamaan a fudoortiidoogu, too a fadiida boo me mi.

⁶Horooxaanum a paax, too ga’aam taaga o xos muumeen oluu refna: Muumeen-a-koƥ ke fo cegel ke fo ƥood ke fo tiiƭ ke na asamaan.

⁷Maaga, nanaam o ñuxur olaa layaxama yee: ‹Piyeer, inooxi war too ñaam!›

⁸Kaa koy, doonaanum ee: ‹Koo boo muk, o Yaal oxe! Yaam kaa na diimbeel mbaat qoolaƭaru mosee o ndok no don es!›

⁹No jaf ɗikandeer laa, o ñuxur olaa a dakooxa o nannoor na asamaan, too a lay ee: ‹Ke Roog a layna yee a xoola, ba o ɗeetatin nen tiimbel!›

¹⁰Kaaga a xewa boo a caf a tadak, soo cinj kaaga fop a nomtooxa na asamaan.

¹¹Maaga, na waxtu faaga sax sax wiin daduk a ngeenooxa paam a carind ale no mbind ne reeƭuuma. Kesare a inoor’u, a luliidel me mi.

¹²Yiif le Roog a layaxam ndax um yoon fa den, too fañ o jeg teen a yiif-a-ƭak. Wiin ɓetuu fa leng weeke ɓisiiduuma a yoon’axam boo i ndok no mbind Korney.

¹³Korney faaga itam wetandoox’u a in ne ta ga’it’ina malaaka fee geenoox’ina paam um, too a layin ee: ‹Luli wiin da ndet na teeru faa Yope, a nqoyaniidong a Simoŋ fee na lastiteel Piyeer.

¹⁴Xan a layong ke na taxkaa o muc, wo fo mbind of fop.›

¹⁵Ye refuuma no waare’aa, Yiif Tedu le a fudooxa took no wiin waaga ne ta fudoorit’ina took in no mberaand naa.

¹⁶Maaga, wetandooxaam a ƭelem akeeke no Yaal oxe: ‹Saŋ, foofi a batiise’toogu, ndaa nuun koy, xan nu mbatiise’tel Yiif Tedu le.›

¹⁷Roog a ci’tangaa a den ne ta ci’itna a in, in we ngimna no Yaal oxe Yeesu Kiristaa, ndax xam siiknoor fa Roog boog?»

¹⁸Ye da nanna kaaga, a naangayo cel, a simataa a Roog, a lay ee: «Yaaga boog, Roog kaa ci we ndefeerna Yaawuur, da mbes pakaad den a cinj, ndax da njeg o ñoow ole.»

¹⁹Gimu we pictoox’ina koy yaam toroxand ke njeg’ina ye Eceen a wareena, a ndeta boo Fenisi fo no fimb laa Sipere fa Ancook, a yegnitaa fa lay fee Roog me no Yaawuur we soom.

²⁰Na pe akaaga, a jeg’a a ndeer den gimu leng-leng waa ngen’ina Sipere fa Kireen. A mbadiida Ancook itam, a layaa fo we ndefeerna Yaawuur, too a mbaare’aa a den Yegil mbaax ne no Yaal oxe Yeesu.

²¹O ɓay katil no Yaal oxe fa den a reeƭu. Wiin mayu a ngima, too a ndamooxata no Yaal oxe.

²²Ke xew’ina a nannooxa boo no waa mbog’ina no mbokatax ne no gimu waa Yeerusaleem. Naaga, a lula a Barnabaas boo Ancook.

²³Yaa ta fadiidna, boo a ga ne Roog a barke’itna gimu we, a felakinooxa. Maaga, a maƭooxa a den den fop, ndax da ndamoox no Yaal oxe fo xeeñ tigi.

²⁴Barnabaas koy, o kiin o paax a reeƭu, a may fo Yiif Tedu le fo o ngim. Naaga, wiin mayu a ngimata no Yaal oxe.

²⁵A cinj kaaga, Barnabaas a suura na teeru faa Tars, a waaƭik a Sool.

²⁶Yaa ta ga’uuna, a ɓisaan Ancook. Den ɗik fop a ndeeƭa maaga o hiid o muum, a njangnaa wiin mayu no mbokatax naaga no gimu we kaa farna no ngim onqe. Maaga Ancook, daalbe we a mbere o nqoyit kerceen.

²⁷Na pe akaaga, duleer a inoora Yeerusaleem a ngar Ancook.

²⁸O leng na den oxaa ne’eena Agabus a inooxa, a yegnit na pexey Yiif Tedu le yee xan a jeg biim maak kam adna fee fop. (Biim leene a jeg’a na jamaane faa Kolood a refna Kesaar fee.)

²⁹Daalbe we a ngebooxa yee oxuu refna xan a cooxit poyaa na doole um, ta dimle’tikel fog gimu waa ndefna Yudee.

³⁰A mbi’a naaga, a lultin maak waa no mbokatax ne no gimu we Yudee, Barnabaas fa Sool a ƥisin.