Read NQAARIIT NE ROOG A pi ake 16 Bible Online

A pi ake 16 - NQAARIIT NE ROOG bible

A pi ake 16

¹Cinj kaaga, Pool a fadiida Derbe, a suur Listeer. Maaga, a jeg’a o taalbe xaa ne’eena Timote, o ƥiy no tew o Yaawuur o kimu, too faap um a reeƭu o Keegeres.

²Fog gimu we Listeer fa Ikooñum paax ƥor a seede’anoogun.

³Pool a bug’a ta yoon fo ten, too a xotaan, a xucin, yaam Yaawuur we ndeeƭna na saax akaaga fop a and’a yee faap um o Keegeres a reeƭu.

⁴Kam teeru ke da nqaañoogna fop, a yegnooga gimu we ke apootar we fo maak we Yeerusaleem a ngeboox’ina, too a nqeɗaa a den ndax da nanan a den.

⁵Pokatax ke no gimu we a saƭakinooxooga kam o ngim onqe, too gimu we a ƥaatooxooga bes oo bes.

⁶Yiif Tedu le a xañta a den da yegnit fa lay fee Roog kam o jegel olaa Asi. Ten taxu a nqaaña o jegel olaa Firigi fo olaa Galati.

⁷Ye da mbadiidna paam o jegel olaa Misi, a njeemooga o ndok kam Bitini, ndaa Yiif le Yeesu ci’iran a den.

⁸Maaga, a njoona a Misi, a mbaaƭik teeru faa Torowaas.

⁹No yeng olaa, Pool a feeñooxe. A ga’a o kiin oxaa genna Makedoni a geenoox a xeɗooxan ee: «Koo gari Makedoni, ƴufgiid a in.»

¹⁰Ndak fo ndak a cinj mbeeñil naaga na Pool, i mbaaƭooga maa i ndetitna Makedoni, yaam i and’a yee Roog xoyu a in, ndax i mbaare’ik Yegil mbaax ne waa ngenna maaga.

¹¹I ndokta a kaal Torowaas, too i nqota farna fo fimb laa Samotaras. No feet olaa, i mbadiida Newapolis.

¹²Yaa i inoorna maaga, i ndeta Filip refna teeru faa eetna no ŋat olaa Makedoni, too Roorom we a njegoogu maaga. I yoq’a a pe a leng-leng na teeru faaga.

¹³Na bes faa na ñootnax alaa, i sutooxa teeru faa, ndet farna fo a ƥeeraamb alaa no maag o maas olaa, i nqalaat’ina yee xan i soƥ maaga o xeɗand no Yaawuur we. I moofa, too ndef no layaa fo rew waa mbokatoor’ina maaga.

¹⁴Ndeer rew waaga koy, a jeg’a oxaa ne’eena Lidi, a ref o ciijikax daalde. Na teeru faa Tiyatiir a inoor’u. Kaa saɗar’u a Roog, too a nan-gilooxooga a in. O Yaal oxe a weta yiif um, ndax ta jaɓ ke Pool a layoogna.

¹⁵Ye ta batiise’eena, ten fo wiin mbind um, a xura a in, a lay ee: «A woorangaa a nuun ee gimaam no Yaal oxe, ndokyo no mbind es, ndal meen.» Maaga, a seraan a in, too i njaɓa.

¹⁶Bes, a jopir i ndetaa no xeɗand olaa no Yaawuur waa, o mbindaand a xetiida fa in. Jini faa waag’ina o lay padafuleer dam’un, too kaa ɓisiidoogu we kelfa’uuna xaaliis fa mayu no ƭeet ke ten.

¹⁷O mbindaand onqeene a reefanooga a Pool fa in, too a falalooxaa yee: «Goor weeke faɗ Roog fee Took-ee-took a ndefu! Kaa yegnaa a nuun a ƭat ale na muc ale.»

¹⁸A fi’a kaaga boo ñaal mayu. Yaa Pool a xijna, a wiƈaqilooxa, a lay jini faa yee: «No gon le Yeesu Kiristaa, mexe heblang: Sutooxi no ten!» Na waxtu faaga sax jini faa a sutooxa.

¹⁹Yaa we kelfa’’ina o mbindaand onqe a nga’na yee yaakaaratee o njegit no ten xaaliis, a ndama a Pool fa Silaas, a ndeƈ-ndeƈin a den boo no nqel naa, mbaambir no aa-adax waa.

²⁰A ƥoxota a den kelfa kaa no aa-adax waa, too a lay a den ee: «Wiin weeke kaa njom’andaa teeru in rek.

²¹Yaawuur a ndefu. Kaa yegnitaa fo mbaax naa kebil ke in a njaɓeerna i ndeef, in we ndefna Roorom.»

²²Mbokatax naa a inooxana a Pooliin itam, too kelfa kaa no aa-adax waa a mbola toki den, too a simta da nqawel xa cap.

²³Yaa da nqawna a den xa cap xa mayu, a ƥeka a den kaso, soo a sim oxe yetooxoogna kaso faa ta ɗeetaa a den a paax.

²⁴Oxeene koy, ye ta daawna kebil neene, a ɓeka a den na ndok alaa moƴ’ina o lunqoox kam kaso faa, soo a jeng a den na caf.

²⁵No yeng o njeek, Pool fa Silaas a nqeɗooga a Roog, a ngimaa a kim a simatir, too lakas waa ndam’eena kaso a nan-gilooxooga a den.

²⁶Ndak fo ndak, a jeg’a yo’nax maak no lanq ke, too fer laa na kaso faa a ɗega. Na waxtu faaga sax sax begax ke a mbetooxa, too a ceng ake no waa ndam’eena fop a ndaƈtooxa.

²⁷O yeeyetax oxaa na kaso faa a yokooxa, too ye ta ga’na begax ke a mbetoox, a woosa laƥ um, a bug o war a xoox um, yaam kaa saf’un ee waa ndameena fop kaa ƈuf.

²⁸Kaa koy, Pool a falalooxa a maak ee: «Hupaa o fi a xoox of paaxeer, yaam in fop, in wey meen.»

²⁹Maaga, o yeeyetax oxaa na kaso faa a simta o heƥandanel, a siip a rok kam a ndok alaa, soo a yen na caf ake Pool fa Silaas, a diid boo a sendaa.

³⁰Cinj kaaga, a suta a den tafil, too a lay ee: «Goor maak, xar warum o fi ndax um muc?»

³¹A ndoonayo yee: «Gimi no Yaal oxe Yeesu, too xan o muc, wo fo wiin mbind of.»

³²Maaga, Pool a yegnaan fa lay fee no Yaal oxe, ten fo we ndeeƭna no mbind um fop.

³³O yeeyetax oxaa na kaso faa a janga a den na waxtu faaga sax no yeng olaa, soo a ɓogan a den kaañax den. Ndak fo ndak, a batiise’e, ten fo wiin mbind um fop.

³⁴Naaga, a ɓisa a Pooliin no mbind um, too a cooxa a den da ñaam. O koor oxe a sawar’a lool, o ten fo wiin mbind um fop, yaam ne ta gim’atna na Roog.

³⁵Yaa Roog a feedna, kelfa kaa no aa-adax waa a lula alkaati kaa maa no yeeyetax oxaa, ndax ta wokit wiin ɗik waaga.

³⁶O yeeyetax oxaa na kaso faa a yegna a Pool kaaga, a layin ee: «Kelfa kaa no aa-adax waa a lultiida yee nu mboktel. Ndiiki boog, sutooxyo, too ndet na jam!»

³⁷Kaa koy, Pool a laya alkaati kaa yee: «A nqawa in mbaambir no fop, too ngate’ee a in ne waritna, soo a ƥek a in kaso. Yaag oo toox de, a mbar’a o mbesoor fa in nen waa mbogna na teeru faa Rom.[2] Muk! Fat da ngarood a mbokit a in.»

³⁸Alkaati kaa a yegna fa lay faaga kelfa kaa no aa-adax waa. Yaa weene a nanna kaaga, a saɗar’ata lool, ye da andna yee Pooliin na teeru faa Rom a mbogu.

³⁹A ngara, a mbaasnoox a den. Cinj kaaga, a mbokta a den, a nqeɗ a den da sutoox teeru faa.

⁴⁰Yaa Pooliin a sutooxna kaso faa, a ndoka kam mbind Lidi. A nga’a fog gimu waa, a saƭakin a den, soo a ndet.