Read NQAARIIT NE ROOG A pi ake 18 Bible Online

A pi ake 18 - NQAARIIT NE ROOG bible

A pi ake 18

¹A cinj kaaga, Pool a inoora Aten a ret Korint.

²A xet’a maaga fo o Yaawuur oxaa ne’eena Akilaas, a rimel no jegel olaa Pont. Akilaas kaa sog’u o fadiidaa, a inoor Itali, ten fa Pirisil fee o teem, yaam o maad o maak Kolood kaa hebil’u yee fat Yaawuur we fop a sutoox teeru faa Rom. Pool a ɗeetik’a a den.

³Ne da mbog’ina calel koy, Pool a dala no mbind den, soo da yoonaa, a njalaa. Den ɗik, ɗiiɗiis tanta a ndeeƭu.

⁴Bes a ñootnax aluu fad’ina, Pool kaa jeetaayoogu fo waa ndefoogna no mbind a qeƭ naa. Kaa jeemoogu o gimnoor Yaawuur we fo Geegeres we itam.

⁵Kaa koy, ye Silaas fa Timote a inooriidna Makedoni, Pool a pay’ata no waare’aa fa lay fee Roog, a feednaa Yaawuur we yee Yeesu refu Kiristaa fee, refna o Muumucil oxe regteena.

⁶Kaa koy, Yaawuur we kaa siiknoor’u fo ten, a ndef no mbenan. Maaga, Pool a yirfa took den fo ut tikoorik um, ndax ta ref seede na den, too a lay a den ee: «Xan a saŋkax nuun a ref fo diy nuun. Ɓogooxaam teen! Ndiiki koy, mexe retaa farna fo we ndefeerna Yaawuur.»

⁷A inooxa maaga, a ret no mbind no koor o ne’e Titiyus Yustus, oxaa saɗar’ina a Roog. Mbind um fo mbind a qeƭ naa ndend’u.

⁸Kirispus fee reeƭna o aa-adax oxaa no mbind a qeƭ naa sax, a gim’a no Yaal oxe, ten fo wiin mbind um fop. Maaga, mayu no Kookorint waa nan-gilooxoogna a Pool, a ngim’a too a mbatiise’’e.

⁹O Yaal oxe a feeñooxa a Pool o yeng, too a layin ee: «Ba o saɗar tus! Layi, too ba o tiim,

¹⁰yaam mexey fa wo. O leng doonkee o ɓay took of, ndax ta fi’ong paaxeer. Jegaam wiin mayu kam teeru feeke.»

¹¹Maaga, Pool a yoqa a ndeer den, a jangnaa fa lay fee Roog boo o hiid fo a qool ɓetaa fo leng.

¹²Na jamaane faaga koy, a soƥ Galyoŋ a refaa gofornoor no jegel olaa Akayi, Yaawuur we a mbokatoorana a Pool. A ƥisaan no hate’and olaa,

¹³soo a lay ee: «O koor oxeeke kaa jeemaa wiin we a ngim na Roog, too kebil ke no maat ne yoonee teen.»

¹⁴Ye Pool a bugna o lay, Galyoŋ a ɗegooxaan, a lay Yaawuur waa yee: «A soƥ’angaa yee njofaƭar mbaat pariƴ a reeƭu, muñankoogaam a nuun, too nan-giloox a nuun, nuun Yaawuur we.

¹⁵Kaa koy, ne andoona yee ñimatir oo no kaa farna na xa ƭelem mbaat na kon mbaat no kebil ke na ƭat nuun, nuun na ƭeetkaa. Mi o mat, a ƭat es yongee teen.»

¹⁶Cinj kaaga, a raxa a den no hate’and olaa.

¹⁷Maaga, fop a yena took Sosteen, o aa-adax oxe no mbind a qeƭ naa, soo a nqawtan mbaambir o hate’and olaa. Kaa koy, kaaga sax haal’ee a Galyoŋ.

¹⁸Pool a yoqa miñu Korint. Cinj kaaga, a asoora fo fog gimu waa, a rok na kaal ndax ta ret Siri, a yoon fa Pirisil fa Akilaas. Ye ta helkaa fo rok na kaal alaa, a ruusoorta na saate faa Kenkere, yaam kaa regoor’u fa Roog.

¹⁹Ye Pooliin a mbadiidna na teeru faa Efees, a xaƴa a Pirisil fa Akilaas maaga. Ten fa xoox um o mat, a roka no mbind a qeƭ naa, a jeetaayaa fo Yaawuur waa.

²⁰Weene a nqeɗaan ta yoq maaga miñu, ndaa jaɓee.

²¹A asoora fa den, a rokit maaga a kaal, too a lay a den ee: «A felangaa a Roog, xam nomtooxiid me nuun.»

²²Yaa ta fadiidna Kesare, a simnika mbokatax ne no gimu we kam Yeerusaleem. Cinj kaaga, a suura Ancook.

²³A yoqa maaga miñu, cinj kaaga ta ret. A xaaña o jegel olaa Galati fo olaa Firigi, a saƭakinaa daalbe we fop no ngim den.

²⁴O Yaawuur oxaa ne’eena Apolos, too a rimel na teeru faa Aleksandiri, a inooriida Efees. O koor o qoolu fa lay a reeƭu. A and’a a Pind a Tedu ke a paax itam.

²⁵A janga kaa farna na ƭat ale no Yaal oxe, too a ɓeka teen yiif um a paax. Kaa yegnitoogu, too a jangnaa ndigil ne farna na Yeesu. Kaa koy, batiise fee Saŋ rek a and’u.

²⁶A layoogata fo njambaar no mbind a qeƭ naa den. Ye Pirisil fa Akilaas a nanuuna, a nqoyaan maa den, a tektin a ƭat ale Roog a qool qac.

²⁷Cinj kaaga, Apolos a bug’a o suur Akayi. Maaga, fog gimu waa a saƭakinaan, soo a mbindanin o leetar, a mbokatin fo daalbe waa no jegel olaaga, ndax da ndalnin. Ye ta fadiidna, a jega o njiriiñ lool no we ngim’ina na pexey yirmande fee Roog.

²⁸Kaa maafoogu Yaawuur we mbaambir no fop, yaam kaa laloogu a den na pexey a Pind a Tedu ke yee Yeesu refu o Muumucil oxe regteena.