Read NQAARIIT NE ROOG A pi ake 2 Bible Online

A pi ake 2 - NQAARIIT NE ROOG bible

A pi ake 2

¹Yaa bes faa na Pantekot faa a fadiidna, gimu we fop kaa mbokatoor’u o mbiñ o leng.

²Ndak fo ndak, fangax a inoortiida na asamaan, a saxit nen nqeñ maak naa na wuuɗaa, too a mayƭanda mbind naa da moof’ina fop.

³Maaga, a ƭelem akaa nandna nen a aal fiɗel a mbeeñooxa a den, a nqaajoox, soo a ndoonoox took o kiin oo kiin na den.

⁴Den fop a maya fo Yiif Tedu le, too a ndalfooxa o layaa lak lakas kaa Yiif le a ci’na a den.

⁵Maaga, a jeg’a Yaawuur waa ngar’ina Yeerusaleem, yaam a mbaɗooxiid a Roog. A inoor’a no qeet lakas ke na adna fee fop.

⁶No fangax laaga jeg’ina koy, wiin mayu a mbokatoora, too a njaaxiɗ yaam oxuu refna a nanooga lak xoox um a layeel.

⁷Den fop kaa njaaxiɗ’u, a njeg o mbet. A layrooga yee: «Ndax wiin weeke fop na layaa ndefee Gaagalile?

⁸Nam oxuu refna na in boog a waagu o nanrit fa den, da layaa na lak fee i numna?

⁹In ndefu wiin we Part fo we Medi fo we Elam, we ngenna Mesopotami fa Yudee fa Kapados fa Pont fa Asi,

¹⁰we ngenna Firigi fa Pamfili fa Misira fo no jegel ole Libi dendna fa Kireen fo we inoortiid’ina Rom.

¹¹A jega itam Yaawuur fo we tuub’ina na ƭat ale no Yaawuur we, wiin we Keret fo we ngenna Arabi, too in fop kaa i nanaa a den da yegnitaa a pi a maak ake Roog, oxuu refna na lak xoox um.»

¹²Den fop kaa njaaxiɗ’u, too and’ee ke da mbarna o nqalaat. Kaa layroogu yee: «Ndi xar keeke a tektu?»

¹³Kaa koy, lakas we kaa ñawle’oogu a den, a layaa yee: «Kaa mbay fa biiñ boo nep.»

¹⁴Maaga, Piyeer a inooxa fo apootar xarɓaxay fo leng lakas we, too a faambir fa den, a lay faan laa fo o ñuxur o maak ee: «Nuun wiin we Yudee fo nuun we ngarna Yeerusaleem fop, ngela andyo kene! Mbetyo nof nuun nan-giloox fa lay es!

¹⁵Wiin weeke mbayee ne nu mboogtuuna. Njeeƈ-tanqin ne soom oo.

¹⁶Kaa koy, kaa ref ke Roog a layna, a reefandin no tuleer Yowel ee:

¹⁷‹No ñaal palakaand ke, xam fudniid Yiif le mi took no wiin we fop, xa ƥiy xa koor axe nuun fo xa ƥiy xa tew axe nuun xan a njo’tanaxam. xa pes axe nuun a nga’aa, a mbeeñooxeel, soo nogoy we nuun a ƭaaɗaa.

¹⁸Ii, no ñaal kaaga xam fudniid Yiif es took no we na mbaɗooxaxam, goor fo rew, too xan a njo’tanaxam.

¹⁹Xam lalit comlaand took-ee-took, na asamaan fee, fo xa anddiloor a lanq, took lanq ke, ta ref po’oy fo fiɗel fo fo suun olaa fi’na a eel.

²⁰Boo ñaal maak mayu o ndam ne no Yaal oxe a helko fo garaa, xan njeeƈ ne a suptoox o niɓaan, soo o nqool onqe a suptoox fo’oy.

²¹A koom, oxuu ƴufginoorna gon le no Yaal oxe, xan a muc.›

²²Nuun wiin we Isra’el, nan-gilooxyo ke um layiidaa a nuun. Yeesu o Naanasaret oxe a reeƭa o kiin oxaa andoona yee Roog feeñlun mbaambir nuun. Roog fa xoox um koy, a fi’a a pi katil fo comlaand fo xa anddiloor na pexey o kiin oxeene, ne nu andtuuna nuun fa qoox nuun.

²³O kiin oxeene, kaa nu ƥoxotel o ten no ke Roog a heboox’ina. Keene koy, Roog kaa yuuɓ’un yaaga. Nu ndengaan na teex, ndax nu mbarnoorin na xa ƥay axe no we ndefeerna Yaawuur.

²⁴Kaa koy, Roog a xontooxnooraan, too a muclin na xa ƭomel axe fa nqon a ataa, yaam fa nqon waag’iran o jeng na sañ-sañ um.

²⁵Dawid sax a lay’a kaa farna no ten ee: ‹Kaam jasnooraa fo Yaal oxe kili, too oxey no saax es o ñamaak, yaam ndik um tolof.

²⁶Ten taxu xeeñ es a may fo o ɗaay, um laltan fo a ƭelem es. Xan cer es a ñootnoox fo yaakaar,

²⁷yaam xaƴkiro o laaw es ta mooc kam jaaniif, too xaƴkiraamo, mi fee o Tedu xe wo, cer es a mbottik na semb.

²⁸Andnooraxamo a ƭat ale na ɓisaa no ñoow ole, too xan o ɗaaynooraam mbaambir of.›

²⁹Fog es, waagaam o lay a nuun booru no kaa farna no taan in Dawid ee a xona, a gasel, too a mboy um oxey a ndeer in boo ndiik.

³⁰O tuleer a reeƭu, too a and’a yee Roog a reg’aan na taaƥ ee xan a moofin o leng no fo ndaan um took gamb no maad le ten.

³¹Keene kaa ref a qontax ale no Muumucil oxe regteena, ta ga’’ina yaaga fadiidafulee, too a yegnitin ye ta layna yee: ‹Xaƴkaand a mooc kam jaaniif, too cer um mbotkee na semb.›

³²Yeesu feene, Roog xontooxnoorun, too in fop seede i ndefu itam.

³³Roog a yoɗaan fo a ñamaak um, ta daawit na Faap fee Yiif Tedu le regit’eena. Yeesu a fudniidaan, ne nu nga’tan fo ne nu nantan.

³⁴Yaam a woora mat ee Dawid mosee o ŋaay na asamaan, ndaa ten fa xoox um a laya yee: ‹O Yaal oxe a laya o Yaal oxe mi yee: Moofi na ñamaak es,

³⁵boo yaa fi’uuma fañ we wo me o dakaa.›

³⁶Fat xeet fee Isra’el fop a and a paax ee Roog fi’u a Yeesu feene nu ndengna na kurwaa, ta ref o Yaal oxe fo o Muumucil oxe regteena.»

³⁷Yaa da nanna fa lay faaga, cer den a ñaaƴa, too a laya a Piyeer fo apootar lakas waa yee: «Fog we, xar i mbaru o mbi?»

³⁸Piyeer a doona a den ee: «Mbesyo pakaad nuun a cinj, too oxuu refna fat a batiise’el no gon Yeesu Kiristaa, ndax pakaad um a mbaasanel, ta daaw Yiif Tedu le Roog a ci’taa.

³⁹Yaam a tegit ale, nuun njegun, nuun fo xa ƥiy nuun. We o Yaal oxe Roog in a xoykaa fop itam too a ngoƭ, a mboga teen.»

⁴⁰Maaga, Piyeer a saƭakina a den fo fa lay fa lakas fa mayu, too a maƭoox a den ee: «Njaɓyo muc no wiin faaxeer we ndiiki.»

⁴¹We njaɓ’ina fa lay um fop a mbatiise’e, too a koom daalbe we a ƥaatoox’a ngap wiin cuni tadik.

⁴²Kaa ndamoogu a cangin ale no apootar we, a mbog o liir, a ndeeraa a cu’ax ale no Yaal oxe, soo a nqeɗaa.

⁴³Oxuu refna kaa saɗar’atu yaam comlaand ke fo xa anddiloor axe apootar we a mbi’oogna.

⁴⁴We ngimna fop kaa mbokatoor’u o mbiñ o leng, a mbog fop.

⁴⁵Kaa njikooxoogu xa qol den fo kalal den, a nqaajran, oxuu refna fo ne soxla um a fodna.

⁴⁶Bes fuu refna, kaa mbokatooroogu no Mbind Roog ne, a mbogaa mbuuru ne kam pind ke, a ñaamaa fo o mbeq fo xeeñ yelefu,

⁴⁷a simataa a Roog, too a ngidman paam xeet fee fop. Maaga, bes fuu refna o Yaal oxe a ɓaatooga no fog ole no gimu we waa mucna.