Read NQAARIIT NE ROOG A pi ake 20 Bible Online

A pi ake 20 - NQAARIIT NE ROOG bible

A pi ake 20

¹Yaa yo’in laa a riimna, Pool a fokata gimu waa, a saƭakin a den, soo a asoor fa den. Cinj kaaga, a reta Makedoni.

²A xaaña o jegel olaaga, a saƭakintaa gimu we baare mayu. Ye ta inoorna maaga, a reta Geres,

³boo a jeg maaga a qool a tadak. Pool a waajooga o rok a kaal, a ret Siri, ndaa ye ta nanna yee Yaawuur we owe mbexeyaa maa da mbartuuna, a xaƴataan, a nomtoox, a reefik Makedoni.

⁴Weeke ndeeƭu we yoon’ina fa den: Sopateer fee o ƥiy Pirus fee genna na teeru faa Beere, Aristark fa Sekondus we ngenna na teeru faa Tesalonik, Gayus fee genna na teeru faa Derbe, Timote fa Tisik fa Torofim we ngenna no jegel olaa Asi itam a mboga teen.

⁵Weene adoox’u, a cungik a in na teeru faa Torowaas.

⁶In o mat, yaa Xew faa no puuru canja’e ke a faafna, i ndokta a kaal kam teeru faa Filip boo njeg ñaal ƥetik no maag. Yaa i mbadiidna na teeru faa Torowaas, i soƥa a den maaga, too i njeg’a maaga pes ɓetuu ƭik.

⁷No kirand diiboor, i mbokatoor’a ndax i ndeer a cu’ax ale no Yaal oxe. Pool a jeetaayooga fo we maad’uuna fop kaa farna na fa lay fee Roog. Ne ta war’ina o suur no feet olaa koy, a layooga boo o yeng o njeek.

⁸A jeg’a xa lampa xa mayu kam taax-took naa i mbokatoor’ina.

⁹A jeg’a maaga koy o fes olaa ne’eena Utikus, a moof na kiig ale no falangteer ole, soo a nimaa. Kam jeetaay miñu le Pool, a naaga hanq a ɗaan, too a yentiida no taax-took ndadkandeer naa. Ye ta giskeel sax, a soƥa ta ɓut.

¹⁰Kaa koy, Pool a fudooxiida, a gung took um, soo a farakooxin, a lay ee: «Ba nu njaaxiɗ dara, yaam o laaw um a maada o fiɗaa.»

¹¹Pool a ŋaayatina, a xusit mbuuru naa, a ñaam, soo a ref no layaa boo neen mbeet naa a xoolu. Cinj kaaga a reta.

¹²O fes olaa a xaadte, a refat o ñoow, too xa laaw axaa no wiin waa fop a ndala a paax.

¹³In o mat, i adooxa a Pool na kaal, ndet na teeru faa Asos, maa i tox’uuna, yaam kaa nar’u o ñaaƴ fo o jaf.

¹⁴Ye ta xetna fa in Asos, a roka fa in soo i ndet Mitileen.

¹⁵Yaa i inoorna maaga no feet olaa, i mbadiida no mbaambrand naa no fimb laa Kiyo. Na bes faa reefanna faaga, i suura boo no fimb laa Samos. No ñaal ndadkandeer naa i mbadu na teeru faa Milet.

¹⁶Pool kaa nar’u o joon a Efees. Bug’atee o miñ kam o jegel olaa Asi, yaam kaa ñofandooxoogu ndax ta fad Yeerusaleem boo bes fee na Pantekot fee a fadiidaa.

¹⁷Na waxtu faaga na teeru faa Milet, Pool a lulta Efees, ndax maak waa no mbokatax ne no gimu we a nqoyiidel.

¹⁸Ye da mbadiidna, Pool a laya a den ee: «Nu anda a paax ne fesoorooguuma fa nuun ye naaguuma cip o jaf es kam Asi.

¹⁹Kaam faɗooxoogu o Yaal oxe kam a neewandax fo kam xa kooniit fo kam naqad yaam yuuƥ ke Yaawuur we a mbexeyooganaxama.

²⁰Nu andooda sax ee ɗasniim a nuun dara no ke waagna o jiriiñ a nuun. Kaam yegin a nuun fa lay fee Roog kañ, waare a nuun no qel ke fo kam pind ke nuun.

²¹Jasnooraam fo Yaawuur we fo we ndefeerna Yaawuur, xoy a den ndax da ndamoox na Roog, too a ngim no Yaal oxe Yeesu.

²²Ndiiki koy, mexe retaa Yeerusaleem, ne Yiif Tedu le a simtaxama o ten, too andiim ke um soƥkaa maaga.

²³Kaa koy, andaam ee ndeer teeru fa teeru Yiif Tedu le xe yegnaxam ee kaso fo coono owe cungaxam.

²⁴Safiraam sax ee o ñoow es a jeganaxam o njiriiñ, a refangee um fadin calel ke fo o sep ole daawtuuma no Yaal oxe Yeesu: Ten refu um yegnitaa Yegil mbaax ne na yirmande fee Roog.

²⁵Ndiiki koy, andaam ee nu nga’katee mukit es, nuun fop we reef’uuma me nuun, waare’aa Maat ne Roog.

²⁶Ten taxu mexe yegnan a nuun xaye yee: A jegangaa na nuun oxaa saŋkooxna, refiim teen tus,

²⁷yaam yegnaam a nuun yaaga ke Roog a yuuɓna fop, too ɗasniim teen o ndara.

²⁸Ten taxu mbootooxyo boog na qoox nuun fo no siir ole Yiif Tedu le a doxinna a nuun, nu ndef teen aa-adax. Ngayyo o fog ole no gimu we Roog a su’nitna fo’oy xooxood um.

²⁹Andaam o mat ee um retangaa, xan a jeg a cinj es xa moon xa kiihiin xa saɗarnooxu axaa ƥerexiidna kam nuun, a mbaaƭaa maa da salaxitna o siir ole.

³⁰A ndeer nuun sax xan a jeg waa na inooxkaa, a njangnaa xa koɓong xa ƥor, ndax da sakan a qoox den daalbe.

³¹Yetooxyo boog, too mbetandoox ee xa kiid xa tadaq axey jegee ñaal fo o yeng olaa maƭooxeeruuma oxuu refna na nuun, fi’in boo loolaa sax.

³²Ndiiki koy, mexe fokataa a nuun fa Roog, fokataa a nuun itam fo fa lay fee na yirmande um. Fa lay feene waagu o saƭakin a nuun, too a ci a nuun paax ke ta geekanna we mbogna no ten.

³³Waaƭ’iim xaaliis mbaat wurus mbaat tikoorik no kiin o leng.

³⁴Nuun moƴu and sax ee xa ƥay es axene jaltoogum boo waag o jeg kuu soxla’uuma, mi fo we yoontooguuma.

³⁵Lalaam a nuun no fop ee nu mbara o njaltaa neene ndax nu mbaag o ndimle’aa we neewna doole. Mbetandooxyo xa ƭelem axe o Yaal oxe Yeesu fa xoox um a layna. Kaa tee: ‹Boo o moƴaa jeg barke, o ci’taa ee o daawaa.› »

³⁶Yaa Pool a layna kaaga boo a ƴut, a gooknooxa, ten fo lakas we fop, soo a ndef no nqeɗaa a Roog.

³⁷Fop a ndefa na xa lool, a mbarakoox a Pool soo a mboonan, a asooraa fo ten.

³⁸Den fop a naqadiloox’a yaam ne ta lay’ina a den ee: I nga’irkatee muk. Cinj kaaga, a mbeltaan boo na kaal alaa.