Read NQAARIIT NE ROOG A pi ake 22 Bible Online

A pi ake 22 - NQAARIIT NE ROOG bible

A pi ake 22

¹«Nuun fog we fo paap ke, nan-gilooxyo ke um layiidaa a nuun ndiiki, ndax um xoxit a xoox es.»

²Ye da nanna ta layaa fa den na hebre, a moƴ’a o tiim. Maaga, Pool a laya yee:

³«O Yaawuur refum, rimel na teeru faa Tars no jegel olaa Silisi. Kaa koy, na teeru feeke yarooxum. Gamaliyel o mat jangnaxam, no ten andtum tigi kebil ke no daan in. Sawaraam no reef a Roog ne nu sawaritna teen nuun fop xaye.

⁴Kaam ñagadiloogu, soo waraa we ndeefoogna a ƭat alene. Kaam feñoogu goor we fo rew we, ɓek a den kaso.

⁵O saasadax o maak oxe fo Mal ne no maak we fop a seede’anaxam keene. Daawtaam na den xa leetar axaa da mbokattaxama Yaawuur fog we Damaas sax maa ret’uuma, ndax um feñ gimu waa ndeeƭna maaga, ɓisiid a den Yeerusaleem, ndax da nqawel.»

⁶«Yaa refuuma na ƭat alaa boo matiidaa teeru faa Damaas, farna fo njeeƈ ndeer xoox, a qoolaand a maak a inoora na asamaan, a meleƈaa mbaambir es.

⁷Yenaam a lanq, too nanaam o ñuxur olaa na layaa yee: ‹Sool, Sool, xar taxu o ñagadilaxam?›

⁸Laamtaanum ee: ‹Wo an oo, o Yaal oxe?› Maaga, a layaxam ee: ‹Mi yoo, mi Yeesu o Naanasaret oxe o ñagadilaa!›

⁹We ndeeƭna fa mi a nga’a a qoolaand ale, ndaa nan’ee o ñuxur ole no xe layoogna fa mi.

¹⁰Maaga, laamtaam ee: ‹O Yaal oxe, xar helum o fi koy?› O Yaal oxe a layaxam ee: ‹Inooxi, fadatinook Damaas, too xan o layel ke waroona o fi.›

¹¹Ne waag’ateeruuma a ka dara koy yaam meleƈ le na qoolaand ale, we yoonit’uuma a ndamaxam o ɓay, a ƭoxaam boo Damaas.

¹²Maaga, o koor oxaa ne’’eena Anañaas a gara me mi. O kiin o kimu na Roog a reeƭu, too a damoox no kebil ke Moyiis. Yaawuur waa ngen’ina Damaas fop a seede’a no ten o cofel.

¹³Anañaas a geenooxa paam es, too a layaam ee: ‹O pog es Sool, ɗeetatini!› Ndak fo ndak, ɗeetatinaam, too ga’ataanum.

¹⁴A doona teen ee: ‹Roog fee no daan we in kaa jilong yaaga, ndax o and ke ta bugna, o ga o Cofu xe, nan ke ta layoodkaa.

¹⁵Yaam xan o seede’an o Cofu xe ten paam no wiin we fop, layaa ke ga’oona fo ke nanoona.

¹⁶Ndiiki koy, xar o cungaa? Inooxi, too batiise’el, ndax pakaad of a ƥogel yaa o ƴufginooraa gon le ten.› »

¹⁷«Ye nomtooxiiduuma Yeerusaleem, rokaam no Mbind Roog naa xeɗaa, too feeñooxeem.

¹⁸Ga’aam o Yaal oxe, too a layaxam ee: ‹Ñofandi too sutoox Yeerusaleem ndiiki, yaam njaɓkee ke o seede’anaxam.›

¹⁹Maaga, layaam ee: ‹O Yaal oxe, den fa qoox den sax a anda yee kaam retoogu kam pind a qeƭ ke, ɓekaa we ngimna na wo kaso, soo xawaa a den xa cap.

²⁰Eceen fee reeƭna o seede of, na caf es a warte. Mi fa xoox es, yoon’aam na bar ale ten, yaam mi saqan’u we mbaruuna tikoorik den.›

²¹Maaga, o Yaal oxe a layaxam ee: ‹Reti rek, yaam xam lulong maa goƭna, farna fo qeet ke ndefeerna Yaawuur.› »

²²Mbokatax naa a nan-gilooxa a Pool ta layaa boo na xa ƭelem axaaga. Kaa koy, maaga a mbuuqata, a lay ee: «Sakyo o kiin oxene pexey! Fat a warel, yaam o ñoow a jombaan.»

²³A cinj kaaga, a moƴa o mbuuq. Kaa ƭongoogu tikoorik den, soo a isdaa lanq.

²⁴Kelfa faa a simta yee fat Pool a ɓisel no saŋe naa no xiixire waa, a xawel xa cap, ndax ta lay ke taxna mbokatax ne a mbuuqtan neene.

²⁵Ye da mbeñuuna boo a mbugin o nqaw, Pool a laya o aa-adax no xiixire teemeed waa geenoox’ina maaga yee: «Ndax jegaa sañ-sañ faa xawtoona oxaa fogna na teeru faa Rom, too hate’afulaand?»

²⁶Yaa o aa-adax oxaa no xiixire teemeed waa a nanna kaaga, a gara me na kelfa um, ndax ta yegnin o ten, a lay ee: «Nam o fi’kaa koy? O kiin oxeene kat, na teeru faa Rom a fogu.»

²⁷Kelfa faa a gara, a laamit a Pool ee: «Layaam waay, ndax na teeru faa Rom fogo?» Pool a doonaan ee: «Ii.»

²⁸Kelfa faa a layaan ee: «Mi o mat, xaaliis fa mayu jiktum a pog ale foguuma na teeru faa Rom.» Kaa koy, Pool a doonaan ee: «Mi o mat, kaam rimel fo ten.»

²⁹Ndak fo ndak, we mbug’uuna o nqaw ndax ta lay, a ndiƈatooxaan. Yaa kelfa fee a ga’na yee Pool o kiin o pogu na teeru faa Rom oo, too ta feñnoor’un, a diida.

³⁰Kelfa fee a bug’a o and a qool qac ke Yaawuur we a njamboogna a Pool. No feet olaa a xoya saasadax maak we fo Mal maak ne fop da mbokatoor. A wokta a Pool, a ɓisiidin, soo a geennin mbaambir den.