Read NQAARIIT NE ROOG A pi ake 23 Bible Online

A pi ake 23 - NQAARIIT NE ROOG bible

A pi ake 23

¹Pool a naaga jak a kid waa mbog’ina no Mal maak naa, too a lay a den ee: «Fog we, fo yiif dalu ñaaƴtum mbaambir no Yaal oxe boo na bes fee xaye.»

²Anañaas fee reeƭna o saasadax o maak oxaa a hebla waa ngeenoox’ina paam Pool da keɓe’in.

³Pool a layaan ee: «Wo soo saq silo tabax naa ran-gineena tafil soom! Xan Roog a xawong. Kaa o moof meen, ndax o hate’aam ne kebil ke a laytuuna, soo ɗapaa kebil ke, simtaa ndax um keɓe’el.»

⁴Waa ndeeƭna paam Pool a layaan ee: «Wo na wenaa o saasadax o maak oxe Roog?»

⁵Maaga, Pool a doona a den ee: «Fog we, mi kat and’iim ee o saasadax o maak oxe yoo. Mee ndax a Pind a Tedu ke sax a laya yee: Laykiro a kelfa fee na xeet of kaa faaxeerna.»

⁶Pool a and’a yee a qaaj a leng ale no Mal ne, Sadusiya a ndeeƭu, soo a qaaj a lakas ale a ndef Farisiya. Ten taxu a laya a maak mbaambir den ee: «Fog es! O Farisiya refum, Farisiya a ndimaam. Nu nga’angaa um hate’eel xaye, ne yaakaaruuma yee we nqonna xan a nqontoox taxun.»

⁷Yaa ta layna kaaga boo a ƴut, ñimatir maak a jega a ndeer Farisiya we fo Sadusiya we, too Mal maak naa a ñofa boo a gefaa.

⁸Kaa gefoogu, yaam ne Sadusiya we a layoogna yee a qontax a leng jegee, too malaaka mbaat jini jegee. Farisiya we o mat, a ngim’a no keene fop.[4]

⁹Coow maak a jeg’a, too leng-leng no jaajangin waa no kebil kaa mbog’ina no Farisiya we a inooxa. Kaa mbuuqoogu yee: «I nga’ee pariƴ leng no kiin oxene, xeƈa a waaga o ref ee yiif faax mbaat malaaka layu fo ten.»

¹⁰Ne coowoor ne a moƴ’atna o jegaa doole, kelfa fee no xiixire juni we a saɗar’a yee xan wiin we a nduguñ a Pool. Naaga, a hebla xiixire waa da ndet, a sut a Pool a ndeer Mal naa, a ƥisin no saŋe naa.

¹¹Yaa tigaa a yengna, o Yaal oxe a feeñooxa a Pool, a geenoox mbaambir um, too a layin ee: «Saƭakinooxi rek! Ne seede’antaxamoona kam Yeerusaleem fene, neene o mat o seede’anitkaxam kam teeru faa Rom.»

¹²Yaa a kid akaa a nqoolna, Yaawuur leng-leng a ƭaapa pexey, too a ndaaɓooxa yee a refangeerna kaa mbar a Pool, ñaamkatee, yerkatee.

¹³Waa yuuɓ’ina pexey naaga a ngup’a wiin qarɓeen nahik.

¹⁴Naaga, a ndeta maa no saasadax o maak oxaa fo maak waa, too a lay a den ee: «Kaa i ndaaɓoox ee feek i mbaree a Pool, i luuxkatee ngaaf.

¹⁵Ndiiki boog, nuun fo Mal maak ne, nqeɗyo a kelfa fee no xiixire juni we, ndax ta ɓisiidin mbaambir nuun, nen yaa ta soƥ’ina yee kaa nu mbug’u ƭeet mbir um a qool qac. Yaam in o mat, i njagandooxa ndax i mbarin boo ta helko fo fadiidaa.»

¹⁶O ndokoor Pool a nana yuuƥ naa, too a ƴufa no saŋe naa, a yegnin a Pool.

¹⁷Maaga, Pool a xoya o leng no waa adooxan’ina xiixire teemeed waa, too a layin ee: «Ɓisi o fes olene maa na kelfa faa, yaam a jega kaa ta waruuna o yegin.»

¹⁸O aa-adax oxaa no xiixire teemeed waa a xota o fes ole, a ɓisin na kelfa faa, soo a layin ee: «Pool fee dameena xoyaxam. Kaa xeɗaam ndax um ɓisiidong o fes olene, yaam kaa jeg kaa ta waroonga o lay.»

¹⁹Kelfa faa a damaan no ɓay, da nga’rik na pet. Naaga, a laamtaan ee: «Xar bugaxamo o yegin?»

²⁰O fes olaa a doonaan ee: «Yaawuur we owe mbaajaa o nqeɗiidong, ndax o ɓis a Pool o feet mbaambir Mal maak naa, nen yaa ta soƥ’ina yee kaa mbug o ƭeet mbir um a qool qac.

²¹Kaa koy, ba o jaɓ ke da nqeɗiidang, yaam waa ngupna qarɓeen nahik a ƭaapanaan mbog. Kaa ndaaɓoox ee a refangeerna kaa mbar a Pool, ñaamkee, yerkee. Ndiiki koy, waaj den a ɓela, too fa lay of soom a nan-gilooxataa.»

²²A cinj yaa kelfa faa a raagooxna o fes olaa yee ba o lay o leng ke wetandooxoona, a waasaan ta ret.

²³Cinj kaaga, kelfa faa a xoya aa-adax ɗik no xiixire waa, too a lay a den ee: «Mbokatyo xiixire teemeed ƭik fo wiin qarɓeen ɓetuu ƭik waa mbaagna o ŋaay pis fo goor teemeed ƭik waa, oxuu refna na den a ɓonooxna a salma. Cinj kaaga, mbaajyo ndet na teeru faa Kesare, farna fo o ƭaan-o-peraand.

²⁴Mbaaƭanyo a Pool itam kaa ta ŋaayna, soo ƥisin na yelem boo maa gofornoor Feliksi.»

²⁵Maaga, kelfa faa a binda o leetar. Keeke refu ke ta layna teen:

²⁶«Wo Feliksi gofornoor fa mbaaxaan fee, mi Kolood Lisiyas na simnang.

²⁷Yaawuur we kaa ndam’u o kiin oxene, a mbugin o mbar. Ye anduuma koy ee na teeru faa Rom a fogu, ƴufaam fo xiixire es, soo ret jaɓin.

²⁸Ne bug’uuma o and koy ke taxna Yaawuur we a njamban, ɓisaanum mbaambir Mal maak naa den.

²⁹Ga’aam ee kaa njamboogun no kaa farna no ñimatir no kebil ke na ƭat ale den. Kaa koy, njambiran dara kaa waagna tax ta warel mbaat ta ɓekel kaso.

³⁰Cinj ye nanuuma yee Yaawuur we kaa ngumanin o ngir, ndak fo ndak fosooxaam o lultiidong o ten. Simaam we njambuuna itam, da ƥisiid mbaambir of ke taxna da nqelooraa fo ten.»

³¹Xiixire waa a mbi’a kaa da ngebil’eena. Yaa tigaa a yengna, a nqota a Pool, a ƥisin boo na saate faa Antipatiris.

³²No feet olaa, xiixire waa ngar’ina fo xa caf den a nomtooxa no saŋe naa. Naaga, a nqaƴa waa ŋaay’ina pis kaa da yoon a Pool.

³³Yaa waa ŋaay’ina pis kaa a mbadiidna na teeru faa Kesare, a cooxa a gofornoor faa o leetar ole, soo a ƥoxotin a Pool.

³⁴Gofornoor faa a janga o leetar olaa, too a laamta a Pool ee: «No jegel olum fogo?» Kaa koy, ye ta andna yee no jegel olaa Silisi a rime,

³⁵a layaan ee: «Bo um laamtang, we na njambang a mbadiid.» Cinj kaaga, a hebla yee fat Pool a geekel no saŋe naa Herood.