Read NQAARIIT NE ROOG A pi ake 24 Bible Online

A pi ake 24 - NQAARIIT NE ROOG bible

A pi ake 24

¹A cinj ñaal ƥetik, o saasadax o maak oxaa ne’’eena Anañaas a fadiida na teeru faa Kesare, a yoon fo maak leng-leng fo o qeexeɗax oxaa ne’’eena Tertulus. A ndeta maa na gofornoor faa ne’’eena Feliksi, ndax da ngoƥatit a Pool.

²Ye gofornoor fee a xoyniiduuna, Tertulus a refa no jambaa a Pool, too a laya yee: «Feliksi fa mbaaxaan, kaa i mbelakinooxaa yaam jam fee inoorna na wo, no and ole jegoona ñaaƴnitan boo a tax saax lene a jof mbaambir.

³Kuu i mbuqaa ndiiki fo muu refna, kaa i ngidmang teen.

⁴Kaa koy, bugiim o geenin calel of. Ten taxu mexe xeɗang no paaxel of, o nan-giloox a in o ndik.

⁵I anda yee oxene, o kiin taamaala tigi yoo. Kaa ɓisiidaa yaqoor a ndeer no Yaawuur we kam adna fee fop, too ten refu o aa-adax oxe na qaaj ale no Naanasaret we.

⁶A jeemooga sax maa ta maasanditna Mbind Roog ne, soo i ndamin. [Naaga, i mbug’aan o ngate na ƭat ale in,

⁷ndaa kelfa fee na xoyeel Lisiyas a garta doole, a jaɓin na xa ƥay in.

⁸Cinj kaaga, Lisiyas a hebla waa njamboogna a Pool da ngar farna fa wo.] Waagaano o laamit, too yaaga xan o and ndigil ne taxna i njamban.»

⁹Yaawuur waa ndeeƭna maaga a saƭkina ke Tertulus a jamboogna a Pool, too a mbeera na: Ndigil kak oo.

¹⁰Maaga, gofornoor faa a jooxa a Pool ndax ta lay. Naaga, Pool a laya yee: «Andaam ee miñaa o ref o kaahate no saax leeke xa kiid xa mayu. Hoolooxaaxoong a paax, too ten taxu um bug o xoxit a xoox es mbaambir of.

¹¹Hupee ñaal xarɓaxay fo ñaal ƭik sax ye retuuma Yeerusaleem, ndax um faɗoox a Roog. Waagaano o ɗeetaqinan a xoox of a paax.

¹²O leng dooniraam a ngid kam Mbind Roog naa um ñimatireel mbaat um soobaa mbokatax naa no pind a qeƭ ke mbaat kam teeru faa.

¹³Owey, ndaa ndiiki koy mbaagirang o mboorin ke da njambaxam.

¹⁴Kaa koy, jaɓaam mbaambir of ee: Kaam faɗooxaa a Roog fee daan in a mbaɗooxoogna, reefandin na ƭat a qas ale da mbi’na a maamaaɓ. Kaa koy, gimaam fop ke bindeena na safe ke no kebil ke fo no duleer we.

¹⁵Jegaam yaakaar nene na Roog, too den itam a njegaan, ten refu yee wiin faax we fo soxodu we xan a nqontoox.

¹⁶Ten taxu mi itam oo, um jeemaa kili o jeg yiif dalu laa jegeerna ƥanjel mbaambir Roog fo mbaambir no wiin we.

¹⁷Ne rok’uuma a koƥ boo xa kiid xa mayu, too gariim kam Yeerusaleem, ten taxu um nomtooxiid, ɓislooxiid xaaliis ndax um dimle xeet es, soo ɓoxotiid a Roog sadax.

¹⁸Keeke refu ke fi’ooguuma ye da soƥaxama no Mbind Roog naa: Kaam ɓogdinooxoogu ne Yaawuur we a mbi’tan. Wiin mayu ndeeƭee fa mi, too yo’nax jeg’ee.

¹⁹Kaa koy, Yaawuur leng-leng waa inoor’ina no jegel olaa Asi a ndeeƭa maaga. Den sax mbar’u o ngeenoox mbaambir of ndax da njambaam tig, yaa da njegna kaa da ne’na na mi

²⁰mbaat fat wiin weeke a lay o njakad onqe fi’uuma ye geenooxuuma mbaambir Mal maak naa,

²¹a refangee o ɗelem o leng oleeke layuuma a maak ye refuuma a ndeer den: ‹Ne gimuuma na qontax ale no xon we soom taxu um hate’eel meeke mbaambir nuun xaye!› »

²²Feliksi fee and’ina a paax kaa far’ina na ƭat kerceen, a hebla a den da nomtoox boo jaf lakas, too a lay a den ee: «Boo Lisiyas fee refna kelfa fee a garna, xam ɗeetaqin mbir nuun.»

²³Maaga, a hebla o aa-adax oxaa no xiixire teemeed waa yee: «Naagi o yetooxaa a Pool, too ci’in a ƥay, qaariit ke ten, o xaƴ a den da topatooxan.»

²⁴A cinj a pe a leng-leng, Feliksi a gara, a yooniid fa Durusil fee o teem. Durusil koy, o Yaawuur a reeƭu. Maaga, Feliksi a lulta, ndax ta xoyaniidel a Pool. Pool a gara, too Feliksi a nan-gilooxoogaan ta layaa kaa farna no ke ta gimna na Kiristaa Yeesu.

²⁵Kaa koy, ye Pool a laytaa kaa farna no ñoowooƭ o jofu fo no dam xoox of fo na hate fee Roog na garaa, Feliksi a dalfooxa o diid, too a layin ee: «Ndiiki koy, waagaa o ret. Um jegangaa o daaw, xam xoyniidong.»

²⁶Kaa yaakaaroogu yee xan Pool a ci’in xaaliis, ten tax’u ta xoynoogun leek-leek, ndax ta jeetaay fo ten.

²⁷Cinj xa kiid xa ƭaq, Porsiyus Festus a rondanda a Feliksi, a refat gofornoor. Feliksi fee andoona koy ee kaa felna Yaawuur we rek a bug’u, a xaƴa a Pool kam kaso faa.