Read NQAARIIT NE ROOG A pi ake 25 Bible Online

A pi ake 25 - NQAARIIT NE ROOG bible

A pi ake 25

¹Yaa Festus a fadiidna no jegel um boo a moof maaga ñaal tadik, a inoora na teeru faa Kesare, a ret Yeerusaleem.

²Maaga, saasadax maak waa fo maak waa no Yaawuur waa a ngara maa Festus, a ngoƥatiid a Pool. A nqeɗooxa a Festus,

³ndax ta lulit a Pool Yeerusaleem. Kaa yuuɓ’un, ndax a ndetangaa boo na ƭat a mbarin.

⁴Kaa koy, Festus a doona yee Pool oxaa na kaso faa Kesare. Festus koy, a war’a o xaad no miñeer, too a ɓaata teen ee:

⁵«Fat we ndefna maak na nuun a yoon fa mi Kesare, a njambin yaa ta fi’na paaxeer.»

⁶Festus a moofa fa den boo ñaal ɓetuu tadik, a ret boo no ñaal xarɓaxay, soo a xaadkaa Kesare. Yaa ta fadna boo no feet olaa, a moofa no hate’and olaa. Maaga, a hebla o ɓisiidel a Pool.

⁷Yaa Pool a fadiidna, Yaawuur waa inoor’ina Yeerusaleem a mbidaan o kurul-keƥ, a njamban tig mayu ƭomu kaa da mbaag’eerna o lalit ee a jega.

⁸Kaa koy, Pool a xoxta a xoox um, too a lay ee: «Ɗapiim kebil ke no Yaawuur we, tooñiim Mbind Roog ne, too tooñiim a Kesaar fee itam.»

⁹Festus fee bug’ina kaa felna Yaawuur we, a laamta a Pool ee: «Ndax bugaa o ret Yeerusaleem, ndax o hate’el mbaambir es no kaa farna no keene?»

¹⁰Pool a doonaan ee: «Mbaambir no hate’and ole Kesaar fee geenooxum, too teen wareem o hate’it. Tooñiim Yaawuur we ñaal o yeng a jalan, too andaano a paax.

¹¹Um tooñ’angaa mbaat um fi kaa o warel es a xeƈna, a jaranaxam fa nqon. Kaa koy, a soƥangaa yee dara no ke da njambaxam refee ndigil, o leng jegee sañ-sañ faa ta ɓoxottaxama a den. Ci’aamoo um ret hate’tikel maa Kesaar fee.»

¹²Maaga, Festus a ga’ra fo mal ne ten, too a nguma o ngir. A gara, too a doona yee: «Kaa o xeɗoogu o ret maa Kesaar fee, maa Kesaar fee o retkaa.»

¹³A cinj a pe a leng-leng, o maad Agiripa fa Berenis a ngara na teeru faa Kesare, a simniid a Festus.

¹⁴Ne da moof’ina maaga boo pes mayu, Festus a wetandooxa a den ke dalna a Pool, too a lay a den ee: «Feliksi a xaƴa mene o koor oxaa dameena.

¹⁵Ye retuuma Yeerusaleem, saasadax maak waa fo maak waa no Yaawuur waa a ngoƥata a Pool, soo a simaam ndax um xawnin.

¹⁶Kaa koy, layaam a den ee: Roorom we meree o ƥoxotaa o kiin, too we ta layooraa ngeenooxee boo ta waag o xoxit a xoox um mbaambir den no ke da njambuuna.

¹⁷Ndiiki koy, den oo wene a yooniida fa mi, too moofiim miñandan. Kaam fadiid boo no feet olaa, um moof no hate’and olaa, soo heblit o ɓisaniidel o kiin oxeene.

¹⁸Ye fañ we ten a ngeenooxna koy, njambiran paaxeer leng no ke xalaat’uuma.

¹⁹Kaa ñimatiroogu fo ten kaa farna na ƭat den rek fo kaa farna na Yeesu fee xonna, too Pool a weer na: Oxe ñoowaa.

²⁰Mi koy kaa and’iim ke um fi’kaa no keene, ten taxu um laamit’u a Pool, ndax a buga o ret Yeerusaleem, a hate’tikel maaga no kaa farna no keene.

²¹Kaa koy, Pool a xeɗa yee fat a geekel boo yaa Kesaar fee a hate’kan. Ten taxu um hebil ta ɓekel kaso boo yaa um ɓiskan a Kesaar fee.»

²²Maaga, o maad Agiripa a laya a Festus ee: «Mi itam, bug’aam o nanood fa lay no kiin oxeene.» Festus a doonaan ee: «O feet o nan fa lay um.»

²³No feet olaa, Agiripa fa Berenis a ngara, a mbi a yaj, a niwnoox bo. Naaga, a ndoka no xeloorand olaa, den fo a salma-koor akaa fo wiin maak waa na teeru faa. Festus a hebla ndax Pool a ɓisiidel.

²⁴Cinj kaaga, a laya yee: «O maad Agiripa fo nuun fop we ndefna meeke fa in, nu nga’a o kiin oxeeke, ten o mat taxu Yaawuur we fop, boo no waa ndefna Yeerusaleem sax a ngar me mi, a nqeɗaxam, too a mbuuqaa yee: ‹Fat a xon!›

²⁵Mi o mat, ga’aam ee o kiin oxe fi’ee dara kaa waagna o tax ta warel. Ne ta layna yee maa Kesaar fee a bugu o hate’tikel, fosooxaanum o lulit o ten.

²⁶Kaa koy, ga’iim dara kaa heluuma o bind o maad o maak oxe no kaa farna no ten. Ten taxu um ɓisiidin mbaambir nuun, moƴtaa sax mbaambir of, wo o maad Agiripa, ndax nu laamtangaan, um jeg kaa binduuma no ten.

²⁷Yaam lulit oxaa dameena mbaambir no maad, too dara xoolirang no ke ta jambeena, kaaga o ñak-yiif oo na mi.»