Read NQAARIIT NE ROOG A pi ake 3 Bible Online

A pi ake 3 - NQAARIIT NE ROOG bible

A pi ake 3

¹Farna fo waxtu kirandax, Piyeer fa Saŋ a ndeta no Mbind Roog naa, a maadik a qeƭ kirand alaa.

²A jeg’a koy o koor oxaa rimteena ƥoof. Kaa moofoogu no mbiñ onqe xoyoogeena Ndokand mosu ne no Mbind Roog naa. Bes fuu refna, kaa meeɓoogel, a diƈel maaga, ndax ta sadaxnooxaa we ndokiidoogna no Mbind Roog naa.

³Ye ta ga’na a Piyeer fa Saŋ a ndokiidaa no Mbind Roog naa, a sadaxnooxa a den.

⁴Piyeer fa Saŋ a naangaan jak a kid, too Piyeer a layaan ee: «Xeey, ɗeetangi a in!»

⁵Maaga, o ƥoof oxe a ɗeeta a den a paax, too a cungaa daawit na den tig,

⁶ndaa Piyeer a layaan ee: «Jegiim xaaliis, jegiim wurus, ndaa ke jeguuma, xam cooxong o ten. No gon le Yeesu Kiristaa o Naanasaret oxe, inooxi too ñaaƴ!»

⁷Cinj kaaga, a damaan no ɓay o ñamaak, soo a inin. Na waxtu faaga sax sax, a caf um fo xa pem um a nduufooxa.

⁸Maaga, a naaga beret, a geenoox, a ñaaƴaa. Cinj kaaga, a roka fa den kam Mbind Roog naa, a ñaaƴaa, a foolaa, too a simataa a Roog.

⁹Wiin waa fop a nga’aan ta ñaaƴaa, too a simataa a Roog.

¹⁰A andid’aan, too a and’a yee oxe moofoogna no Ndokand mosu ne no Mbind Roog ne a sadaxnooxaa yoo. Kaa njaaxiɗ’u lool no ke xew’ina no ten.

¹¹Ne o ƥoof oxe a sambroogateerna fa Piyeer fa Saŋ koy, xeet faa fop a njaaxiɗ’a, too a ƈufa farna fa den, ɗuga jibir faa ne’eena Jibir Salomo.

¹²Ye Piyeer a ga’na kaaga, a laya xeet faa yee: «Nuun wiin we Isra’el, xar taxu nu njaaxiɗ no kene? Xar taxu nu naang a in jak a kid, wee ndax na sañ-sañ a qoox in mbaat na teef ale i ndeefaa a Roog i ñaaƴnoortu o qoyene?

¹³Roog fee Abraham fa Isaak fa Yakoob a mbaɗooxoogna, refna Roog fee no daan we in, a feeñla o ndam um na Yeesu fee o tag um. Nuun koy, kaa nu ƥoxotin, too nqañin mbaambir Pilaat fee lay’ina yee fat a woktel.

¹⁴Kaa nu nqañ o Tedu xe refna ref o Cofu xe, soo nqeɗ a Pilaat ta watan a nuun o baawar.

¹⁵Neene, nu mbarnoora o Kelwaar oxe na ci’taa o ñoow, ndaa Roog a xontooxnooraan a ndeer no xon we. Ten o mat i seede’anaa.

¹⁶Katil fee no gon le Yeesu saƭkinu o koor oxeeke nu nga’aa, too andin. Ne ta gimna no gon le Yeesu o mat taxu ta wod boo ceŋ mbaambir nuun, nuun fop.

¹⁷Ndiiki koy fog we, andaam ee o ñak-o-and taxu nu mbi’in, nuun fo we kelfa’na a nuun,

¹⁸ndaa Roog fadnitu neene ke ta yegnit’ina yaaga xewafulee na xa ton no duleer we fop, ye da layna yee o Muumucil oxe ten regteena a wara o coono.

¹⁹Mbesyo pakaad nuun a cinj boog, too saktoox farna fa Roog, ndax pakaad nuun a mbortel.

²⁰Neene boog, xan jamaane a ñootnax a inoorit no Yaal oxe, yaa ta lultiidkaa o Muumucil oxe nu njagandan’eena yaaga, ta ref Yeesu.

²¹Ndiiki koy, Yeesu a wara o moof na asamaan boo na jamaane faa Roog a xembandatinkaa fop, ne ta layit’uuna yaaga, a reefandin no duleer tedu we ten.

²²Moyiis a lay’a yee: ‹Xan o Yaal oxe Roog nuun a sutan a nuun a ndeer no fog nuun o tuleer oxaa nandna fa mi. Kuu ta layna a nuun, fat nu nan-gilooxin!

²³O kiin oxuu nan-gilooxeerna o tuleer oxeene koy, xan a sutel na xeet fee Roog, soo a warel.›

²⁴Duleer we fop, no kaa xotitna na Sami’el, oxuu refna na den a yegnit’a yee xan ñaal keene a mbadiid.

²⁵Nuun ndefu xa ƥiy axe no duleer we, too nu mboga no ngiɓoor ne Roog a dalin’ina fo daan we in, ye ta layna a Abraham ee: ‹O ndaan of a cur barke a refkaa no ƥasil ke na adna fee fop.›

²⁶Neene boog, nuun Roog a eetu o sutan o tag um Yeesu, a luliidin ndax ta barke a nuun, yaa o kiin oo kiin na nuun a fesna njofaƭar um a cinj.»