Read NQAARIIT NE ROOG A pi ake 4 Bible Online

A pi ake 4 - NQAARIIT NE ROOG bible

A pi ake 4

¹Ye Piyeer fa Saŋ a maadna o layaa fa xeet fee, saasadax we fo xe adooxan’ina yeeyetax we no Mbind Roog naa fo Sadusiya we a mbadiida me den.

²Sawar’ee tus yaam ne Piyeeriin a njangnoogna xeet fee, a yegnitaa yee a qontax ale Yeesu xan a tax xon we a nqontoox.

³A mbaara a caf o mbap den na den, a ƥek a den kaso boo no feet olaa, yaam tige kaa yaariidoogu.

⁴Na waxtu faaga, mayu no we nan’ina fa lay fee Roog a ngim’a, boo goor gimu we fop a mbadat ngap cuni ƥetik.

⁵No feet olaa, kelfa ke no Yaawuur we fo maak we fo jaajangin we no kebil ke a mbokatoora Yeerusaleem.

⁶A jeg’a maaga koy: Xaan-Koor fee reeƭna o saasadax o maak oxaa, Kayif fa Saŋ fa Aleksaandar fo fop we mbog’ina no ƥasil naa no saasadax o maak oxaa.

⁷Maaga, a ndiƈa a Piyeer fa Saŋ a ndeer den, too a laamit a den ee: «Na pexey sañ-sañ fum ndi no gon an nu mbodandtu o ƥoof oxene?»

⁸Maaga, Piyeer a maya fo Yiif Tedu le, too a lay a den ee: «Nuun kelfa ke fo maak we na xeet fee,

⁹xar taxu nu laamtaa a in xaye kaa farna na pi a paax ake mbi’eena no kiin o ciru xene fo ne ta wodandteena?

¹⁰Andyo kene boog nuun fop, too fat xeet fee Isra’el fop a andin itam! Na pexey gon le Yeesu Kiristaa o Naanasaret oxe o kiin oxeeke geenooxna mbaambir nuun a jegtu o wod-fo-ɓaal. Yeesu feene mat nu ndengu took a kurwaa, ndaa Roog a xontooxnooraan a ndeer no xon we.

¹¹Keeke refu ke a Pind a Tedu ke a layna na Yeesu: ‹Nuun maamax we, ɓil le nu ndeɓ’ina a refata ɓil faraaj le.›

¹²Yaaga boog, no ten soom a muc a waage o jegit, yaam jegee ɗuga asamaan gon lakas laa Roog a ci’itna ndeer no wiin we, ndax i muc.»

¹³Yaa waa mbog’ina no Mal naa a nga’na njambaar ne Piyeer fa Saŋ, kaaga a beta a den lool, yaam a and’a yee a cang den goƭee. Kaa koy, a and’ata yee no we yoonoogna fa Yeesu a mbogu itam.

¹⁴Ne da nga’’ina o koor oxe wodand’eena a geenoox paam den, njeg’ee tus kaa da ndoonna.

¹⁵Maaga, a ngebla a den da sutoox o moofand olaa. A nga’ra a ndeer den, too a lay ee:

¹⁶«Ndi xar i mbi’kaa wiin weeke? Yaam we ngenna Yeerusaleem fop a anda a qool qac ee o anddiloor ole nannooxna, den o mat mbi’un, too i mbaagiran o nqañ.

¹⁷Fat i ngartoox a den, mbañit a den da layat o leng kaa farna no gon Yeesu, ndax ke yegniteena no keene a fañ o siw a ndeer xeet fee.»

¹⁸Cinj kaaga, a nqoya a den, too a maƭoox a den a paax ee baa da layat kaa farna na Yeesu mbaat da njangnitaa no gon um.

¹⁹Piyeer fa Saŋ a ndoona a den ee: «Ƭeetyo rek! Xar moƴu jof mbaambir Roog, i nanan a nuun, ndi i nanan a Roog?

²⁰Yaam in o mat, i mbaagee o ñak o layit ke i nga’na fo ke i nanna.»

²¹Maaga, a ngartooxahina a den, too a mbokit a den da ndet. Nga’ee na den dara kaa da nqawitna a den, yaam xeet fee fop kaa simatoogu a Roog no ke xewna.

²²O koor oxe wodand’eena no anddiloor olaaga a hupiɗ’a xa kiid qarɓeen nahik.

²³Yaa Piyeer fa Saŋ a mbokteena, a ndeta maa no yoon den, too a mbetandoox ke saasadax maak waa fo maak waa a lay’ina a den fop.

²⁴Yaa da nanuuna, a nqeɗandoora a Roog a maak, too a lay ee: «O Yaal oxe, wo saku asamaan fee fo lanq ke fo o maag ole fo fop ke refna teen,

²⁵wo lay’u na pexey Yiif Tedu le, reefandin no don no taan in Dawid fee refna o tag of ee: ‹Xar taxu a saax ake a nootoox, qeet ke a mbof a qalaat a cegee xoox?

²⁶Kaam ee xar taxu maad we na adna fee a mbapoox, kelfa ke a ngukranaa o Yaal oxe fo xe ta ɗuumna?›

²⁷A woora yee, na teeru feeke Herood fa Poons Pilaat, den fo a saax ake fa xeet fee Isra’el a ngukranit’u a Yeesu fee o tag o tedu xe wo ɗuumoona nen o Muumucil oxe regteena.

²⁸Neene o mat a fadnitu ke yuuɓ’oona yaaga no katil of fo no bug of.

²⁹Ndiiki koy o Yaal oxe, ɗeeti ne da ngartoortaa a in, ci’i a in, in we na mbaɗooxang, i yegnitik fa lay of fo njambaar!

³⁰Letni o ɓay of, ndax jiru we a mbodandeel, xa anddiloor fo comlaand a nqew no gon Yeesu fee o tag o tedu xe wo.»

³¹Yaa da nqeɗna boo a ƈut, lanq kaa no mbiñ onqaa da moof’ina a yo’nooxa. Den fop a maya fo Yiif Tedu le, a yegnitaa fa lay fee Roog fo njambaar.

³²Mbokatax naa no waa ngim’ina fop kaa mbog’u xeeñ leng fo yiif leng. O leng layoogee yee kene mi jegun, mbaat kaana wo jegun, ndaa o jeg den fop kaa mbokatoogun.

³³Apootar we kaa laytoogu doole fa maak no ke da seede’na na qontax ale no Yaal oxe Yeesu. Maaga, yirmande fa maak fee Roog a reeƭa fa den fop.

³⁴O leng na den ñak’ee ke ta soxla’na. Fop we njeg’ina xa qol mbaat pind kaa njikooxoogu den,

³⁵a ƥisiid njigand ne no ke da njikooxna na xa ƥay axe no apootar we. Xaaliis feene koy, a nqaajanooga teen o kiin oo kiin ke ta soxla’na.

³⁶A jeg’a koy o Leelewi xaa rim’eena Sipere. O koor oxaaga Yoseef a ne’’e. Apootar we kaa lastitoogun Barnabaas, tekitna yee «Oxe na saƭakinaa».

³⁷Kaa jikoox’u o qol um, a ɓis xaaliis fee, a doonin na xa ƥay axe no apootar we.