Read NQAARIIT NE ROOG A pi ake 7 Bible Online

A pi ake 7 - NQAARIIT NE ROOG bible

A pi ake 7

¹Maaga, o saasadax o maak oxaa a laya a Eceen ee: «Ndax keene ndigil oo?»

²Eceen a doonaan ee: «Fog es fo paap es, nan-gilooxaamoo! Roog fee mayna fo o ndam a feeñooxa o taan in Abraham. Kaaga xaa soƥa a Abraham no saax laa Mesopotami yaaga genafulee Xaraan.

³Maaga, Roog a laya a Abraham ee: ‹Xaƴi saax nuun, kaam ee inooxi no mbaafaap of, ret no saax lakas le um lalkang.›

⁴Na waxtu faaga sax, Abraham a sutooxa saax laa no Kaakalde waa, soo a genik na teeru faa Xaraan. A cinj ye faap um a ñakna koy, Roog a sektiidaan no saax leeke nu ngenna ndiiki.

⁵Roog ci’iran dara kaa ta warna o jeg no saax le mbaat maa ta doonna o jaf um sax. Kaa koy, a regaan ee xan a ci’in o ten, xa taan um a njegkin a cinj um. Yaaga Abraham jeg’ee o ƥiy sax.

⁶Keeke refu ke Roog a layuuna: ‹Xan xa taan of a ndet no saax jan, too waa no saax laaga xan a mbi a den faɗ, a toroxand a den boo xa kiid teemeed nahik.›

⁷Kaa koy, Roog a laya yee: ‹Xam doon o ɓay es took xeet faaga mbi’na a den faɗ, too a koom da sutoox, a mbaɗoortaam o mbiñ onqene.›

⁸Maaga, Roog a dalna fa Abraham ngiɓoor, nquc ne a ref o anddiloor um. Neene mat Abraham a xuctu a Isaak fee o ƥeem no ñaal ɓetuu ndadkandeer ne a cinj o rimel um, Isaak a xuc a Yakoob, Yakoob a xuc daan xarɓaxay fo daan ɗik waa.

⁹Daan maak in waaga kaa siis’u a Yoseef boo a njikooxin, ndax ta refik o paɗ no saax laa Misira. Kaa koy, Roog a reeƭa fo ten,

¹⁰a muclan no coono ke ten fop. A ci’aan itam o and fo yiif mbaambir Firawon fee o maad Misira. Oxeene o mat dod’un ta adooxan saax laa Misira fo mbind um fop.

¹¹Maaga, biim a rokiida kam saax laa Misira fo laa Kanaan. Xij le a magin’a lool, too daan waa in njeg’atee kaa da ñaamna.

¹²Yaa Yakoob a nanna yee bele a jega Misira, a eeta o lul daan we in maaga.

¹³No jaf o ɗikandeer ole da ndetitna koy, Yoseef a feeñooxa fog faap um, too neene itam Firawon fee a and’ata yee ƥasil ne Yoseef oo.

¹⁴Maaga, Yoseef a lulta a Yakoob fee faap um fo ƥasil naa fop ndeeƭna wiin qarɓeen ɓetuu ɗik fo wiin ɓetuk.

¹⁵Yakoob a reta Misira, too maaga a xonit’u, ten fo daan waa in itam.

¹⁶Xa tal den a ƥise Sikeem, a ngasel na mboy alaa Abraham a jikit’ina xaaliis. A mboy aleene koy, na xa ƥiy Hamoor axe inoor’ina Sikeem a jikit’un.

¹⁷Ye waxtu fee Roog a war’ina o fadnit a tegit ale ta reg’ina a Abraham a faambnooxna, xeet in a ndimatira, a moƴ o mayaa kam Misira.

¹⁸A cinj jamaane faaga o maad o qas oxaa andeerna a Yoseef a dodooxa, too a maadooxaa Misira.

¹⁹Kaa koy, o maad oxaaga a naxa xeet in, a toroxand daan we in, a ser a den da mbod xa qeq axe, ndax da nqon.

²⁰Na jamaane faaga Moyiis a rime, a ref o ndeɓandoong o mosu, Roog a bugin bo. A ñoowa a qool a tadak no mbind faap um.

²¹Cinj ye ta fodeena koy, o ƥiy o ndew Firawon fee a gisaan, soo a yarin nen o ƥeem ŋaƈit.

²²Naaga, Moyiis a yar’e no and ole no Miimisira we fop, too a jeg’a sañ-sañ na fa lay um fo na pi um.

²³Yaa ta jegna xa kiid qarɓeen nahik, a hebooxa o ɗeetik fog um, ndefna Ii-isra’el we.

²⁴A ga’a o Miimisira xaa na toroxandaa o leng no fog um, a farta o koor oxaaga, a rabdinooxanin, boo a war o Miimisira xe.

²⁵Kaa foog’u yee xan fog um weene a and ee na xa ƥay um Roog a muclitkaa a den, ndaa and’iran.

²⁶No feet olaa, Moyiis a xeta fo Ii-isra’el ɗik waa na ñoxoraa, too a jeemooga hate a den. Moyiis a laya a den ee: ‹Qaariit es, mee ndax fog nu ndefu, xar taxu nu toroxandraa koy?›

²⁷Kaa koy, oxe hup’ina o kend um doole a riña a Moyiis, too a layin ee: ‹An dodong kelfa fo o kaahate took in?

²⁸Ndax kaa o bugaam o war ne warit’oona o Miimisira xe faak?›

²⁹Ye Moyiis a nanna fa lay faaga, a ƴufa, a jangook na saate faa Majan. No saax laaga o mat a jegit’u xa ƥiy xa ƭaq.

³⁰A cinj xa kiid qarɓeen nahik, malaaka a feeñooxa a Moyiis kam aal laa no ngol naa doxoogna. Kaaga xaa xewit’a na koƥ-a-ƥor alaa paam o Joong olaa Sinayi.

³¹Moyiis a ga’a ke feeñooxuuna, too a bet’aan lool. Yaa ta matiidaa koy, ndax ta horooxin, a nana o ñuxur ole no Yaal oxe a layaa yee:

³²‹Mi refu Roog fee daan we nuun a mbaɗooxoogna, Roog fee Abraham, Roog fee Isaak fa Roog fee Yakoob.› Maaga, Moyiis kaa sendoogu ne ta fodeena fop, too saɗ’ee o ɗeet sax.

³³O Yaal oxe a layahinaan ee: ‹Woli xa ñaaƭ of, yaam me o dakaa, lanq tedu yoo.

³⁴Ga’aam ne xeet es a xijliteel no saax laa Misira, too nanaam xa iin den. Ten taxu, fudooxiidaam ndax um wat a den. Ndiiki koy gari, um lulong maaga.›

³⁵Moyiis feene o mat Ii-isra’el we a nqañ’u, a laamtin ee: ‹An dodong kelfa fo o kaahate? Oxeene kiin koy Roog a luliidu nen a kelfa fo o baawat, a reefandin na malaaka fee feeñooxuuna kam ngol naa.

³⁶Ten o mat sutu a den no saax laa Misira, a cinj ye ta fi’na comlaand fo xa anddiloor kam saax leene. Neene itam a fi’it’un kam o Maag o yeeq olaa fo na koƥ-a-ƥor alaa boo xa kiid qarɓeen nahik.

³⁷Moyiis feene o mat lay’ahinu xeet fee Isra’el ee: ‹Xan Roog a sutan a nuun a ndeer no fog nuun o tuleer oxaa nandna fa mi.›

³⁸Moyiis feene geenooxoogu paam xeet fee mbokatoor’ina na koƥ-a-ƥor alaa. Ten reeƭu o ndok-a-ndeer ndeer malaaka ne layoogna fo ten no Joong olaa Sinayi fo daan we in. Ten o mat daawu fa lay fa ñoow, ndax ta cooxin a in.

³⁹Kaa koy, daan we in a mbaña o nanan a Moyiis, a ngodin, too a mbug’a o nomtoox Misira.

⁴⁰Xeet fee a laya a Aaroon ee: ‹Fi’ani a in roog kaa na mbugko ñaaƴaa mbaambir in, yaam i andee ke dalna a Moyiis fee sutna a in Misira.›

⁴¹Maaga, a nqawna o xeel, a mbi’in nen roog den, a ƥoxotan sadax. Kaa mbelakinooxoogu no ke da nqawnoodna.

⁴²Kaa koy, Roog a fesa a den a cinj, a xaƴ a den da mbaɗooxaa pindel ke na asamaan fee, ne ta bindteena no safe le no duleer we yee: ‹Nuun xeet fee Isra’el, ndax mi nu sadaxu muumeen fo sadax lakas na xa kiid qarɓeen nahik axe nu njegna na koƥ-a-ƥor alaa?

⁴³Ha’aa, yaam nuun ngadooxoogu o faɗoorand ole Molok nu mbi’na roog nuun, ngadooxaa nitaal ne no xoor ole ne’eena Refaan nu mbi’na roog itam. Den ndefu xa taaƴ axe nu njalna, ndax nu mbaɗoox a den. Ten taxu xam sekit a nuun maa jolna saax laa Babilon.›

⁴⁴Daan we in a njeg’a Ƭiif ne no ngiɓoor ne Roog na koƥ-a-ƥor alaa. Moyiis a fi’it’aan ne Roog a heblit’uuna o ten, ta nand deŋ fo samandaal ne ta ga’’ina.

⁴⁵Ye daan we in a yoqteena koy, a ƥoxote Ƭiif neene, a ƥislooxin no saax laa no qeet kaa Roog a rax’ina mbaambir den, a jopir Yosuwe a adooxanaa a den. Ƭiif naa a yoq’a maaga boo na jamaane Dawid.

⁴⁶Dawid a daawa yirmande mbaambir Roog. A xeɗaan ndax ta maxin Ngenand Roog, maa xa taan Yakoob a mbaɗooraa.

⁴⁷Kaa koy, Salomo reeƭu oxe maxan’ina a Roog Ngenand.

⁴⁸Kaa koy, Roog fee Took-ee-took genkee no kaa o ɓay no kiin a fi’na, ne o tuleer oxe a bindtuuna yee:

⁴⁹‹O Yaal oxe kaa tee: Asamaan fee refu gamb es, soo lanq ke a ndef o dakand es. Mbind nandu num nu maxankaxam? Ndi mam na refkaa o ñootnoorand es?

⁵⁰Mee ndax o ɓay es fi’u keene fop?›

⁵¹Nuun we saƭikna a qoox, nu nqucooxee na qeeñ nuun fo no nof nuun, bes fuu refna kaa nu maafraa fo Yiif Tedu le. Safee nuun koy ee ke daan nuun a ndeeƭna rek, nu ndefu nuun itam.

⁵²An no duleer we daan nuun a ñagadileeru sax? Yaam daan nuun a mbara we yegnitoogna yaaga yee xan o Cofu xe a gar, ndiiki koy nu ngodaan, mbarnoorin.

⁵³Nu ndaaw’a kebil ke Roog na pexey malaaka ke, ndaa nu ngayee a den.»

⁵⁴Yaa waa mbog’ina no Mal naa a nanna a ƭelem akaaga, a nduq’a a den tigi, too a ŋatooxanooga a Eceen.

⁵⁵Kaa koy, Eceen a maya fo Yiif Tedu le, too a daxaaƴooxa farna fa asamaan. Maaga, a ga’a o ndam onqe Roog, a ga a Yeesu, ta geenoox na ñamaak Roog.

⁵⁶A laya yee: «Ga’aam asamaan fee a wetoox, soo o Ƥeenqe no kiin oxe a geenoox na ñamaak Roog.»

⁵⁷A mbuuqa a maak, a sux nof den, too a ndiganin den fop.

⁵⁸Maaga, a ndeƈ-ndeƈnaan boo tafil teeru faa, soo a mbartin a kac. Waa seede’’ina ke Eceen a lay’ina a ndoon’a tikoorik den na caf no fes olaa ne’eena Sool, ta yetooxaa a den.

⁵⁹Neeke mat Eceen a xeɗtoogu ye da ndooman a kac: «O Yaal oxe Yeesu, jaɓi o laaw es!»

⁶⁰Cinj kaaga, a gooknooxa, a wuuq a maak, a lay ee: «O Yaal oxe, ba o damit a den bakaad fene.» Cinj a ƭelem akaaga, a ɓuta.