Read NQAARIIT NE ROOG Rom 1 Bible Online

Rom 1 - NQAARIIT NE ROOG bible

Rom 1

¹Mi Pool, o paɗ Kiristaa Yeesu na bindaa a nuun o leetar oleeke. Roog kaa xoyaam ndax um ref apootar, a kesaam, ndax um yegnitik Yegil mbaax ne ten.

²Yegil mbaax neene, Roog kaa regit’un yaaga kam a Pind a Tedu ke, a reefandin no duleer um.

³Yegnit um neene koy, kaa jof no Ƥeem onqe fogna no kurcala le Dawid no fo ɓaal,

⁴ndaa na pexey Yiif Tedu le, a feeñle fa doole yee o Ƥeenqe Roog a refu, ye ta xontooxna a ndeer no xon we: O ten refu Yeesu Kiristaa o Yaal in.

⁵No ten daawtum yirmande fo waag o ref apootar boo qicaa qeet ke fop, da ngim no ten, too a nananin, ndax gon um a simatel.

⁶Nuun itam nu mboga no weene Yeesu Kiristaa a xoyna.

⁷Nuun fop we ngenna na teeru faa Rom, too Roog a fex a nuun, nuun we tedna na pexey o xoy ole ten, mexe simnaa a nuun: Yaasam Roog Faap in fo o Yaal oxe Yeesu Kiristaa a ci a nuun yirmande fa jam.

⁸Eetu, na pexey Yeesu Kiristaa, kaam gidmaa a Roog es yaam nuun fop, no ngim nuun onqe na layteel kam adna fee fop.

⁹Roog a anda yee ndigil kak um layaa, ten fee um dagooxaa kam xeeñ es, yaa um waare’aa Yegil mbaax ne jofna no Ƥeem, too a anda itam ee kaam wetandooxaa a nuun kili na qeƭ es.

¹⁰Kaam gen no xeɗaa a Roog, ta ci’aam o wooƥ olaa ɗeettiiduuma a nuun, a felangaan.

¹¹Yaam kaam bug o ga a nuun lool boo ɓisiid a nuun barke faa inoorna no Yiif le Roog, ndax nu mbaag o saƭik no ngim onqe.

¹²Ten refu yee i mbokatoorangaa, i mbaag o saƭakinoorit o ngim onqe fokatna a in, nuun na pexey o ngim es, mi yoo no nqe na nuun.

¹³Fog es, bugaam nu and ee kaam hebooxaa o xalatooxiid a nuun kili, ndax calel es a nqay me nuun, ne da nqayitna a ndeer qeet lakas ke, ndaa boo xaye, kaam maad o dikoox.

¹⁴Kaam saqan yokooxu we fo yokooxeer we, jangu we fo jangeer we Yegil mbaax ne nen o lad.

¹⁵Ten taxu um bug o yegniid a nuun a paax itam Yegil mbaax ne, nuun we ngenna Rom.

¹⁶Sediim muk Yegil mbaax ne, yaam kaa ref katil Roog ne na ɓisiidaa a muc no xuu gimna, eetu koy no Yaawuur we, soo we ndefeerna Yaawuur a ndoonoox.

¹⁷Yegil mbaax ne kaa feeñlaa ne o kiin a waagna o jofit mbaambir Roog, ta ref na pexey o ngim onqe boo no ngim, ne a Pind a Tedu ke a laytuuna: «Oxuu Roog a ɗeetna nen o cofu yaam o ngim um, xan a ñoow.»

¹⁸Fuux le Roog a feeñta na asamaan, a sufoox took no wiin we yaam njofaƭar den fo a pi a paaxeer den, den we na uuptaa ndigil ne paaxeer ke.

¹⁹Roog kaa xawaa a den yaam ke wiin we a mbaagna o and no ten a xoola a den. Roog a feeñlaan a den a qool qac.

²⁰Naa adna a sake, ke waagaandeena o ga na Roog, refna katil mbaafkeer ne ten fo ke ta refna, a mbeeña no ke ta sakna. Meene o mat, wiin we a mbaagu o andit a den. Ten taxu boog, mbaagkaand o mbaasan,

²¹yaam kaa da and a Roog boo a ƈut, soo a mbañin o ƥoxot o ndam nen a Roog, ne’katiim koy da ngidman. Kaa kuuc, a mo mir kam a qalaat den, soo a qeeñ den ake mbofeerna o and o leng, a ndiim kam o niɓaan.

²²Kaa mbi’ooxaa yaal o and, too a ndef ɗof say.

²³O ndam onqe helna a Roog fa mbaafkeer fee kaa ƥoxotan nitaal o kiin mbaat ndiiƭ mbaat muumeen mbaat ƥood ndefna kaa na sooƴaa.

²⁴Ƭof den neene taxu Roog a xaƴ a den da saasaayaa ne a qeeñ den a mbugtuuna, ndax da mbi’raa cednooxu no cer den.

²⁵Kaa sofit ndigil ne Roog o maaɓ, soo a ndek ee kaa mbaɗooxaa, a nananaa mbindel Roog, a mbañ o mbaɗoox o Saasak oxe. O ten koy, a hela o barke’el boo faw. Amiini.

²⁶Ten taxu Roog a xaƴ a den na yuxum a sednooxu boo ta tax rew we a mbaas gor den, a mbesanraa a ndeer den.

²⁷Neene itam goor we yoonatee fo rew we, a njooroox na buge-buge fa njaaxaan a ndeer den, o koor fo o koor a saasaayraa, boo a ndaawaa na qoox den a qaw ale helna no fanxoy den.

²⁸Ne da mbañna yee o and a Roog, tig cegu o njiriiñ oo, a taxa Roog a riñ a den no saƭik xoox, ndax da mbi’aa o njombe,

²⁹a may muut fo njofaƭar nuu refna, a soxod, a ngalaf, a mbi’aa paaxeer, a may fo ciis, a mbarraa, a nqasraa, a ƈiƴtiraa, a layraa cageer, soo a ñu’raa.

³⁰Kaa da yaqraa ƭool a ndeer den, a mbañ a Roog, a yarwaƭar, a magnandoox, a kañooxaa, a saɗ no mbexeyaa paaxeer, a mbañ o njaɓan we ndimna a den.

³¹Kaa nqon a yiif, ndeyaand o ngooloox, a ñak o njek fo o liir.

³²A anda toox de hate fee Roog, ta ref ee we na mbi’aa tig nandu neene, a saŋkax a hela a den, den fop. Refee soom ee kaa da maadin o mbi’aa, ndaa kaa soobaa lakas we, da mbi’an itam.