Read NQAARIIT NE ROOG Rom 10 Bible Online

Rom 10 - NQAARIIT NE ROOG bible

Rom 10

¹Fog we, ke buguuma no xeeñ es fop fo ke refna a qeƭ es na Roog refu yee Yaawuur we a muc.

²Waagaam o seede’an a den ee waa ndamooxna no reef a Roog a ndefu, kaa rek o and den a nuk.

³Ne Roog a jofandtaa wiin we mbaambir um, kaa mo a den mir, soo da ndek a mbaaƭan a qoox den pexey naa da njofitna. Ten taxu njaɓee pexey ne Roog a jofandtaa.

⁴Mee ndax Kiristaa refu muukandoong ne no kebil ke Moyiis, ndax fop we ngimna a njofandel mbaambir Roog.

⁵Keeke refu ke Moyiis a bindna no cofel ole mbaambir Roog na pexey kebil ke: «Oxuu na fadnaa ke kebil ke a simitna, xan a ñoowtaa kebil ke.»

⁶Kaa koy, a guutatira fo ke layeena no cofel ole mbaambir Roog na pexey o ngim onqe. Kaa tee: Ba o lay no xeeñ of ee: «An na ŋaaykaa na asamaan?» tee kaa o fudniidaa a Kiristaa.

⁷Ba o lay itam ee: «An na fudooxkaa maa no xon waa?» tee kaa o xontooxnooriidaa a Kiristaa.

⁸Ndi xar a Pind a Tedu ke a layu boog? Kaa dee: «Mee ndax fa lay fee, oxey paam of, too oxey no don of fo no xeeñ of sax.» Fa lay feene refu yegnit ne no ngim onqe i mbaare’aa.

⁹Boo weejloona fo o don of mbaambir no fop ee Yeesu refu o Yaal oxe, gim no xeeñ of itam ee Roog a xontoornooraan a ndeer no xon we, yaaga xan o muc.

¹⁰Yaam o kiin kaa gimaa no xeeñ um, soo Roog a jofandkan. Kaam ee, o kiin oxe kaa weejlaa o ngim um fo o don um, soo Roog a mucilkan.

¹¹Neene o mat a Pind a Tedu ke a laytun. Kaa dee: «Oxuu gimna no ten, sedkee muk.»

¹²Neene, jegee njektir leng a ndeer o Yaawuur oxe fo o tefee o Yaawuur, yaam o Yaal o leng kut oxe a njegu, too o ten na ci’aa we na ƈufginooxan fop paax um.

¹³Yaam kaa layel na Pind a Tedu ke yee: «O kiin oxuu ƴufginoorna gon le no Yaal oxe, xan a muc.»

¹⁴Kaa koy, nam a ƈufginooritkan, too ngimee no ten? Nam a ngimitkaa no ten koy, too nanee ta layteel? Ndi nam a nanitkaa ta layteel, yaa o kiin a waare’eerna kaa jofna no ten?

¹⁵Kaam ee nam a waare’itkeel, yaa o leng a lulaandeena? Yaag oo toox de, a Pind a Tedu ke kaa lay ee: «Ndaw o jaf o mosu, no xaa na yegnitaa yegil mbaax!»

¹⁶Kaa koy, fop njaɓee Yegil mbaax ne. Ten taxu Esayi a lay’u yee: «O Yaal oxe, an gimu ke ta nanitna na in?»

¹⁷Yaaga boog, o ngim onqe, oxe inooraa no yegnit ne na naneel, soo yegnit neene a inooraa na fa lay fee Kiristaa.

¹⁸Kaam laamtaa boog: Ndax kaa nan’ee yegnit neene? Aha kañ! A nanaan tigi! Yaam a Pind a Tedu ke sax a laya kaa jofna teen ee: «Xa ñuxur den a njoota boo me lanq ke a ndayna, fa lay den a nannoox boo no cat adna.»

¹⁹Kaam laamtahinaa yee: Ndax kaa xeet fee Isra’el and’iran? Pitik, keeke refu ke Moyiis a layna, too ta inoor na Roog: «Xam tax nu siisaa xeet fee reeƭeerna xeet fa ndigil, wuuɗ fuux nuun, nu moƴ o siiknoor fa xeet faa fofeerna o and o leng.»

²⁰Esayi fa xoox um sax a reta boo a yegnit ee: «Roog kaa lay ee, waa mbaaƭoogeeraxama, a nga’axam, too feeñooxaam waa ƥaaloogeerna dara na mi.»

²¹No kaa farna na Isra’el koy, Roog a laya yee: «No ñaal ne fop, kaam letin xa ƥay es farna fa xeet fee nanaƭarna, too a yedin.»