Read NQAARIIT NE ROOG Rom 12 Bible Online

Rom 12 - NQAARIIT NE ROOG bible

Rom 12

¹Fog we, ne Roog a letinna yirmande um took in, mexey xeɗaa a nuun, nu ƥoxotin cer nuun nen sadax faa na ñoowaa, a ted too a felin bo. Neene nu mbaru o mbaɗoortaa a Roog.

²Ba nu nandandoor we na ndeefaa o mbaax onqe na adna feeke. Njaɓyo boog Roog a supit a yiif nuun, ndax nu mbaag o njeg a qalaat a qas boo nu and ke Roog a bugna, ta ref fop ke faaxna fo ke felna fo ke ñakna sik.

³Ne Roog a ci’axama yirmande um, mexey layaa a nuun fop ee: Ba nu yeg a qoox nuun boo muk, ndaa fat nu maandoox na qalaat nuun, oxuu refna a liiƥoor fo a las ale Roog a ci’uuna no ngim onqe.

⁴A jega a seek a mayu no njer no kiin, too ke a seek aluu refna a jalaa, a guutatira fo ke a kend um a fi’aa.

⁵Neene itam, in we mbogna na Kiristaa, ke i mayna may fop oo, njer leng kut i ndefu no mbokatoor ne in fa Kiristaa, too kaa i ngiɓoor a ndeer in nen a seek ake mbokatoorna, a ndef njer leng kut ne.

⁶Roog kaa lasit ci’it um no fud o letu. Ci’it ke koy kaa nguutatir, ndaa i mbara o njiriiñoor a den, oxuu refna fo ne Roog a lastoonga. Oxuu ci’eena o jo’tanaa a Roog, fat a fi’in, ta yoon fo o ngim onqe.

⁷O lakas a jegangaa ci’it no tiidimle, fat a dimle’it. Oxe jegna ci’it a cangin, a jangin itam.

⁸Oxe jegna ci’it o saƭakinaa lakas we, fat a saƭakin a paax. Oxe na ci’taa, fat a fi’in no fud o letu. Oxe na ɗoxaa, fat a jaflax no ke ta ɗoxaa. Oxe na dimle’aa rool we, fat a fi’an fo o ɗaay.

⁹O mbeq waree o jeg luq-luq fa leng. Fat nu mbañ ke faaxeerna, soo saaƭoox no fop ke faaxna.

¹⁰Mbexiryo a ndeer nuun ne o fog a mbexritaa. Niwiryo, too sawar teen.

¹¹Njegyo fitna, too mbaas tayil. Ndagooxyo o Yaal oxe fo xeeñ nuun fop.

¹²Fat o ɗaay a ref fa nuun yaam yaakaar ne nu njegna. Njegyo o muñ kam coono ke, too ngen no nqeɗaa.

¹³Fog nuun no ngim onqe, nu ƈufig a den yaa da ndefna na soxla, ndalnaa a paax we na ngaraa me nuun.

¹⁴Nqeɗyo a Roog, ndax ta barke we na toroxandaa a nuun. Ba nu nqeɗ maa ta salooxitna a den, ndaa nqeɗyo ndax barke um a fudoox took den.

¹⁵Mbelakinooxyo fo we njegna o ɗaay, loolandoor fo we na loolaa.

¹⁶Njegyo njofoor a ndeer nuun. Ba nu magnandoox, ndaa njaɓyo ke neewandooxna fop. Ba nu mbi’oox nen waa njegna o and muk.

¹⁷Ba nu ndabdinooraa ƭomu fo ƭomu. Mbaaƭyo mbaambir no wiin we fop maa nu mbi’itna paax.

¹⁸Mbi’yo fop ke nu mbaagna, ndax nu ñoowaa na jam mbaambir no wiin we fop, a waagangaa o jeg.

¹⁹Qaariit es, ba nu ndabdinooxan a qoox nuun muk, ndaa nqaƴyo Roog a ɗaxit fuux um. Yaam a laye na Pind a Tedu ke yee: «Mi ndabdinax a helu, too mi na rabidkaa.» Keene o mat o Yaal oxe a layu.

²⁰A layahina yee: «O pañ of a xeexange, fat o cooxin ta ñaam, too a hoɗomange, fat o ci’in ta yer. O naagangaa o fesooraa neene fo o pañ of, xan a pi a paax ake wo a sednoorin boo ta waag o ricoox.»[2]

²¹Ba o maafritel paaxeer muk, ndaa maafti paaxeer ke a pi a paax.