Read NQAARIIT NE ROOG Rom 13 Bible Online

Rom 13 - NQAARIIT NE ROOG bible

Rom 13

¹Fat oxuu refna a nanan we na maadooxaa no saax le, yaam jegee maat naa inooreerna na Roog. Maat ke ndalneena fop, na Roog a inooru.

²Ten taxu, oxuu fañna o nanan oxe na maadooxaa, a faña ke Roog a dalinna. Faafañ weene koy, a naanga o qicaa hate took den.

³Oxe na fi’aa paax deyee o saɗar we na maadooxaa. Oxe na fi’aa paaxeer kañ, waru o saɗar a den. O bugangaa ñak o saɗar we na ƭoxaa koy, waraa o fi’aa paax, yaaga xan da kañong.

⁴Roog o mat doxnu a den calel keene yaam jam of. Boo andoona yee paaxeer o fi’aa, fat o saɗar, yaam refee yee o ƥor o ƥor taxu da ndeegoox laƥ ne. Roog o mat dalnu a den, ndax da laltaa fuux um took no we na mbi’aa paaxeer.

⁵Ten taxu we na maadooxaa a mbar o nananel, refee soom yaam o ƴufaa fuux le Roog, ndaa ndax yiif of a waag o dal.

⁶Ten taxu itam nu mbar o ndabdaa a bateer, yaam fop we ndoxneena o ndabdinooxanaa maat ne, Roog a njalanaa, too a mbara o mbadin calel den ne waritna.

⁷Oxuu nu saqanna o lad, ndabdeenoo o ten! Oxe nu mbarna o ndabid a bateer, ndabdeenoo o ten. Oxuu nu mbarna o ndabid juuti, ndabdeenoo o ten. Oxuu nu mbarna o saɗar, saɗareenoo, too oxuu nu mbarna o niw, niweenoo.

⁸Kaam ee ba nu saqan o leng o lad, a refangeerna o lad olene: Mbexiryo a ndeer nuun! Oxuu fexna lakas we a naaga o fadnaa ke kebil ke a simitna fop.

⁹Kebil ke Roog ndefna «Seeqkiro!» fo «Warkiro o kiin!» fo «Guuɗkiro!» fo «Yaawkiro!» fo lakas ke, no kebil leng nene a muukooru, ta ref «Fat o fex o kend of nen a xoox of.»

¹⁰Oxe jegna o mbeq, fi’kee o kentand um paaxeer. Ten taxu boo jegoona o mbeq, fadnaa kebil ke fop.

¹¹Mbi’yo neene boog, too kaa jolna keene sax, nu anda me jamaane fee a tolooxna. Waxtu fee nu mbarna o yokoox a fadiida. A muc ale a moƴa o matiid a in ndiiki ee ne i ngimit’uuna yaaga.

¹²O yeng ole xe faafaa, too mbeet ne xey a leeliidaa. Fat i mbaas boog a pi a niɓaanu ke, too nqot ƥonax ke Roog a cooxna a in, ndax i ñoow na qoolaand ale.

¹³Fat i ñaaƴit o jof, yaam in wey na qoolaand ale. Ba i yer a yer a maamu mbaat i ñaam kupu. Ba i seeqaa mbaat i mbi’aa a pi a parƴu fo cer in. Ba i nqasir, too ba i siisraa.

¹⁴Fat nu ndokoox o Yaal oxe Yeesu Kiristaa. Ba nu ndeefan a pug ake nuun, ndik nu mbadin a yaaw a paaxeer ake nuun.