Read NQAARIIT NE ROOG Rom 15 Bible Online

Rom 15 - NQAARIIT NE ROOG bible

Rom 15

¹In we o ngim in a saƭikna, i mbara o meeɓaa we neewna doole no ngim onqe, mbañ o mbaaƭ ke faaxna na in soom.

²Fat oxuu refna na in a waaƭaa ke faaxna no kend um, ndax oxeene a moƴ o jof mbaambir no ngim um.

³Kiristaa mosee o waaƭ ke faaxna na xoox um. Keene ne’ooge ye a Pind a Tedu ke a layna yee: «A ben ake no we na mbenang took es a ndalu.»

⁴Ke i soƥna kam a Pind a Tedu ke fop kaa mbind’el yaaga, ndax ta jangin a in o muñ, a ci a in a yaalax. Neene, xan i njeg yaakaar na pexey a Pind a Tedu ke.

⁵Yaasam Roog fee na muñantaa, too a yaalaa, a fi boo nu mbaag o ñoowaa no njofoor a ndeer nuun, ndeeftin ne Kiristaa Yeesu a laltituuna,

⁶ndax no ñuxur o leng kut, nu ƥoxotaa a Roog Faap no Yaal in Yeesu Kiristaa o ndam.

⁷Njaɓaniryo a ndeer nuun, ne Kiristaa a jaɓanitna a nuun, ndax Roog a ɓoxotel o ndam.

⁸Kaam ee, Kiristaa kaa gar, a refat o tag no Yaawuur we, ndax ta feeñil a den ne Roog a gore’itna. Keene kaa jeg, ye ta fadinna ke Roog a reg’ina daan waa den.

⁹Kaa fi boo waa ndefeerna Yaawuur a ƥoxot a Roog o ndam, yaam ne ta yirmitna a den. Keene ne’ooge, ye a Pind a Tedu ke a layna yee: «Ten taxu xam simatang ndeer qeet ke, xaanaa gon of.»

¹⁰A ndakooxa o lay ee: «Fat qeet ke ndefeerna Yaawuur a mbelakinooxandoor fa xeet fee no Yaal oxe.»

¹¹A ƥaata teen ee: «Nuun a saax ake fop, simatyo o Yaal oxe, nuun qeet ke fop, ƥoxoteenoo o ndam.»

¹²Esayi a layahina yee: «Xan o ndaan Isay a gar, xan a maadoox took qeet ke ndefeerna Yaawuur, too qeet ke fop xan a ndoon yaakaar den no ten.»

¹³Yaasam Roog fee na ci’taa yaakaar a mayƭand a nuun fo o ɗaay fa jam fa ndeyu sik na pexey o ngim onqe nu njegna no ten, ndax nu mbaag o may muut fo yaakaar inooru na doole fee no Yiif Tedu le.

¹⁴Fog es, mi fa xoox es andaam no ndigil ee nu maya fo o paaxel. A xoolaxam tigi yee nu anda ke wareena o and fop bo ta dey. Nu anda itam ne nu mbaagna o cooxrit xa as a ndeer nuun.

¹⁵Yaqanee toox de, um bind a nuun fo njambaar na seek a leng-leng kam o leetar es, ndax um wetand a nuun ke nu njangneena yaaga. Kaam bindit neene yaam yirmande fee Roog a fudinna took es,

¹⁶boo um ref o caajal Kiristaa Yeesu me no we ndefeerna Yaawuur. Kaam fadnaa calel tedu, yaa um waare’aa Yegil mbaax ne Roog, ndax qeet ke ndefeerna Yaawuur a ndef sadax faa felna a Roog, sadax fa ñaku sik na pexey Yiif Tedu le.

¹⁷Waagaam o fakoox boog no calel es paam Roog yaam Kiristaa Yeesu.

¹⁸Boo andoona yee saɗaam o lay tig, kaa ref ke Kiristaa a fi’na na pexey es, ndax um ɓakandiid we ndefeerna Yaawuur, da nanan a Roog. Fa lay a fi’tun fo a pi

¹⁹na pexey katil xa anddiloor fo comlaand na doole fee no Yiif le Roog. Neene o mat yegnitum Yegil mbaax ne na laytaa kaa jofna na Kiristaa. Kaam ñaaƴoogu, retaa muu refna, no kaa xotitna Yeerusaleem boo no jegel olaa Iliri.

²⁰Mi koy, kaam heboox o yegnitaa Yegil mbaax ne me no we moseerna o nan kaa jofna na Kiristaa, ndax maxkiim took fer no kiin o lakas.

²¹Neene, xan a pi es a nand fo ke layeena kam a Pind a Tedu ke yee: «We mosaandeena o yegin paru no ten, xan a nga’in, too we moseerna o nan ta layteel, xan a andin.»

²²Keene refu ke yaqanaxama a caf a mayu um gar me nuun.

²³Ndiiki koy, fadnaam calel es na xa cegel axeeke refuuma. Xa kiid xa mayu xey, kaam waajaa o ɗeetiid a nuun.

²⁴Bugaam o fi keene yaa um retaa Espaañ. Yaakaaraam o ga a nuun, yaa reefiiduuma meene boo daaw o ndimle nuun, ndax um waag o suur no saax leene, ta ref itam o wooƥ olaa um waagkaa o moofit fa nuun boo ñaal leng-leng.

²⁵Ndiiki koy, kaam retaa boo Yeerusaleem, ndax um dimle xeet fee Roog ndefna maaga.

²⁶Kerceen ke Makedoni fo we Akayi kaa ngeboox o mbokat kaa dimle’teena rool gimu we kam Yeerusaleem.

²⁷Kaa ngeboox keene no fud o letu, ndaa no ndigil, keene refu wargal faa da mbarna o mbi’an rool weene. Yaam Yaawuur we ndefna kerceen kaa nqaajir fo kerceen ke ndefeerna Yaawuur kalal ke no Yiif Tedu le da njegna. Yaaga boog, kerceen ke ndefeerna Yaawuur a mbara o ndimle’taa Yaawuur we ndefna kerceen kalal adna ke da njegna itam.

²⁸Um fadnangaa calel keene boo ɓoxot o ndimle nqeene daawuuma, xam reeftiid me nuun, soo suurkaa Espaañ.

²⁹Andaam koy ee boo um garaa, xam fadtiid barke fa ndeyu sik fee Kiristaa.

³⁰Fog we, yaam Yeesu Kiristaa fee refna o Yaal in fo yaam o mbeq onqe Yiif Tedu le a ci’taa, kaam xeɗaa a nuun nu yoon fa mi, maafrel, nqeɗanaam a Roog.

³¹Nqeɗanaamoo ndax um muc no gimaƭaru we ndefna kam Yudee, nqeɗ itam, ndax o ndimle nqeeke um ɓisaa xeet fee Roog kam Yeerusaleem a jaɓel a paax.

³²A reftangaa neene, too ta fel a Roog, xam fadtiid o ɗaay o maak, soo gif a ñootnax me nuun.

³³Yaasam Roog fee na ci’taa jam a ref fa nuun, nuun fop. Amiini.