Read NQAARIIT NE ROOG Rom 7 Bible Online

Rom 7 - NQAARIIT NE ROOG bible

Rom 7

¹Nuun fog we, nu ñakee o and ke buguuma o lay, yaam nu mokna kebil ke a paax. Kebil ke koy, owe njega sañ-sañ no kiin yaa ta ñoowaa soom.

²Neene, o tew o tolooxu kaa hiɓoor fo o kor um na pexey kebil ke no ñoow o ñis no xeene fop, ndaa o kor oxe a maadatangee, o tew oxe a woktooxa boo qac no kebil ke ngiɓ’uuna fo o kor um.

³Boo andoona yee o tew oxe a yoona fo o koor o lakas, too o kor um a maad o ñoowaa, xan a xoyeel o seeseeq, ndaa o kor um a xonangaa, a woktooxa no kebil ke, too a dolooxanangaa o lakas, xoykaand o seeseeq.

⁴Neene o mat a reftu na nuun itam, nuun fog we. Nu ƭegoora o kay fo kebil ke, yaam kaa nu mbog no cer ke Kiristaa fee xonna yaam in. Ten taxu, nu ndefanat o lakas, ta ref oxe xontooxna a ndeer no xon we, ndax i sakan a Roog xa tim xa paax.

⁵Ye i ñoowoogna no ke cer ke a mbugna, o bug o faaxeer ole kebil ke a yaawnooroogna a yo’nooga cer in fop, too a sakatinooga na in xa tim axaa na ƥisaa na fa nqon.

⁶Kaam ee, me ta refna i mbate no kebil ke, yaam ke dam’ina a in mbaƭ a xona na in. Ndiiki koy kaa i ndagooxaa a Roog a tagoorooƭ a qas na pexey Yiif Tedu le, soo mbaas a tagoorooƭ a kiid ale me i ndagoortoogna kebil ke.

⁷Xar i mbaru o lay boog? Ndax kebil ke bakaad oo? Ha’aa o mat! Kaa koy de, kebil ke taxu um and bakaad, yaam andkoogiim a yaaw, yaa kebil ke a lay’eerna yee «yaawkiro!»

⁸Maaga, kebil ne a ci’tu bakaad fee o gom, boo ta ɓek na mi a yaaw a pagkatar a ƥor, yaam a reeƭangee kebil ne, bakaad a naag faq a xon.

⁹Yaaga andafuliim kebil ne, kaam ñoowoogu, ndaa ye kebil ne a fadiidna koy, bakaad fee a ñoowa na mi,

¹⁰soo um xon. Yaaga boog, kebil ne waraxama o ɓis no ñoow, a refata na mi kebil ne na ɓisaa na fa nqon.

¹¹Bakaad fee kaa jegit o gom no kebil ne, a naxaam, soo a wartaam o ten.

¹²Neene, kebil ke Roog kaa ted, soo kebil ne fa xoox um a ted, a jof, soo a faax.

¹³Yaaga boog, ndax ke faaxna na waraxam? Ha’aa o mat! Bakaad fee fi’un. O ten o mat wartaxam ke faaxna. Neene kebil ne a laltitu ke bakaad a refna no ndigil, soo a feeñil ne ta faaxaƭaritna tigi.

¹⁴I anda koy o mat ee kebil ke, na Roog a inooru, ndaa mi, kaam ref o kiin o keesu xaa na dagooxaa bakaad.

¹⁵Andiim ke taxna um fi’aa ke um fi’aa. Naagiim o fi’aa ke buguuma, ndaa kaam fi’aa ke um sibaa.

¹⁶A soƥangaa yee ke bugeeruuma um fi’aa, yaaga jaɓaam ee kebil ke a mbaaxa.

¹⁷No ndigil, refatee yee mi na fi’aa keene, ndaa bakaad fee genna na mi na fi’an.

¹⁸Andaam ee ke faaxna genee na mi, ta ref no cer es, yaam naagaam o bugaa o fi paax kañ, ndaa o fadnin na xoxaxam sup.

¹⁹Naagiim o fi’aa paax ke buguuma, ndaa paaxeer ke bugeeruuma um fi’aa.

²⁰Um naagangaa o fi’aa ke bugeeruuma koy, refee yee mi fa xoox es na fi’an, ndaa bakaad fee genna na mi.

²¹Ga’aam boog ee mbanuu buguuma o fi paax, paaxeer rek um fi’aa.

²²Kaam jegtaa o ɗaay no kebil ke Roog kam ee kam es.

²³Kaa koy, a jega lakas kaa ga’uuma, ta heblaxam no cer es. Kaa maafraa fo ke o jeg-yiif es a heblaxam, soo a damaam mbaƭ no ke bakaad fee a heblaxam, um fi’in no cer es.

²⁴Ndaw o kiin o toroxu xe refuuma! O koo, an na mucilkaxam no cer es kene na ƥiskaxam na fa nqon?

²⁵Yeesu Kiristaa fee o Yaal in oo! Yaasam Roog a ɓoxotel o ngidim no ten! Neene boog, na pexey o jeg-yiif es kaam nananaa kebil ke Roog, ndaa no cer es koy, o paɗ no ke bakaad fee a heblaa refum.