Read NQAARIIT NE ROOG Rom 9 Bible Online

Rom 9 - NQAARIIT NE ROOG bible

Rom 9

¹Ke um layiidaa ndigil kak oo. Kaam refan a Kiristaa, too maaɓiim dara. Yiif es jeejooxee, too a seede’anaxam na pexey Yiif Tedu le yee fa lay es ndigil oo.

²Kene refu o gooy o maak ole fa naqad fee jeguuma kili kam xeeñ es.

³Jaɓaam Roog a halakaam, um xaajoor fa Kiristaa sax, ndax we fogtuuma xeet a muc, a waag’angaa o jeg.

⁴Weene ndefu Ii-isra’el we, too Roog a fi a den xa ƥeem. A feeñla a den o ndam onqe ten, a dalin fa den kiɓoor ke ten, a coox a den kebil ke fo a tegit ake ten, soo a andnoor a den ne ta wareena o faɗoorit.

⁵Kaam ee, den o mat ndefu xa taan axe no daan maak we, soo Kiristaa fee no fo ɓaal a fog na xeet den. Kiristaa feene koy hupu fop, a ref Roog fee heleena o simat. Amiini!

⁶Nof es ɗaaɗee o lay muk ee fa lay fee Roog kaa sañtooxaa, ha’aa! Kaa rek, fog na xeet fee Isra’el taxee fog na xeet fee Roog a jilna,

⁷too fog no tim ole Abraham taxee o ref o ndaan um tigi. Yaam Roog a lay’a a Abraham ee: «Fat o and ee o kurcala of ŋaƈit na Isaak a sutoorkaa.»

⁸Keene kaa tekit ee fog no tim ole Abraham soom taxee o ref o ƥiy Roog. Xa ƥeem ndefu we mbogna na tegit ale, too sax weene a ƭeete tigi nen xa taan axe Abraham.

⁹Yaam Roog kaa reg’u a Abraham, a layin ee: «Na waxtu fene deŋ mbaan, xam nomtooxiid me wo, too xam soƥ Saara a jeg o ƥiy o ngoor.»

¹⁰Kaa jolna keene sax, fat i nqalaat ke xew’ina na Rebeka. Xa ƥiy xa ƭaq axe ta rim’ina mbog’u faap fa leng kut, refna ref a Isaak fee o taan in.

¹¹Maaga soƥ’afulee xa teɓandoong axe a ndimel, too soƥee da mbi dara, ta ref paax mbaat paaxeer, Roog a laya a Rebeka yee: «Taaw fee xan a dagooxaa o ndeɓ onqe.» Roog kaa jil o leng na den, ndax yuuƥ um a geenoox naŋ. Neene koy a cil ale Roog refee na pi ake no we ta jilna, ndaa no xoy ole ta xoyna a den.

¹³Keene a Pind a Tedu ke a ne’oogu ye da layna yee: «Kaam fex a Yakoob, soo fañ a Esawu.»

¹⁴Xar i laykaa koy? Ndax Roog kaa jofaƭar boog? Ha’aa muk!

¹⁵Yaam Roog a lay’a a Moyiis ee: «Xam yirim oxe buguuma o yirim, muñan oxe buguuma o muñan.»

¹⁶Keene koy, inooree no ke o kiin oxe a bugna mbaat na koorgoorlax um, ndaa kaa inoorit toqet na Roog fee jegna yirmande.

¹⁷Keeke Roog a lay’u a Firawon fee o maad Misira kam a Pind a Tedu ke: «Dodaaxoong o ref o maad Misira, ndax um laltit na wo katil es, soo gon es a yegnitel kam adna fee fop.»

¹⁸Neene boog, Roog a yirma oxe ta bugna, a saƭkin xeeñ no xe ta buganuuna.

¹⁹Xeƈa xam laamtel boog ee: A reftangaa neene, xar Roog a jegu kaa ta ne’na no wiin we? Yaam kaa andiim oxe waagna o xox ke Roog a bugna.

²⁰Wo o mat, an refo? Wo fee refna o kiin sang um, soo ñimatiraa fa Roog. Ndax nqaw a naaga o laamtaa o maamax um ee: «Xar taxu o maxtaam neeke?»

²¹Mee ndax o maamax qaw a waaga o fi kuu feluuna no ƭok! No ƭok leng kut keene a waaga o max teen nqaw mosu fo nqaw mbarƴu.

²²Yaaga boog, Roog kaa bug’u o lalit fuux um, soo a andnoor katil um. Yaqanee toox de, Roog a roxondoox’u fo o muñ o maak nqaw mbarƴu ne refna wiin we njag’ina fo fuux um, too dara hel’atee a den a refangeerna a saŋkax ale.

²³Roog kaa bug’u itam o lalit ne o ndam um a yaajitna na in, in we ndefna nqaw ne daawna yirmande um. A jaganda a in yaaga, ndax i ndaaw o ndam um.

²⁴Yaam in ndefu we ta xoyna, refee soom a ndeer no Yaawuur we ndaa a ndeer no qeet lakas ke itam.

²⁵Keene sax, Roog a yegnit’aan no safe le no tuleer Hoose. Kaa lay’u yee: «Xeet fee reeƭeerna xeet es, xam xoyatin xeet es, we bug’eeruuma o doon a ngid, um xoyataa a den we fexuuma fex bo.

²⁶Me da laytoogeena yee: ‹Nu ndefee xeet es›, maaga, xan a nqoyateel xa ƥiy Roog fa ñoow jok fee.»

²⁷A jega kaa Esayi a lambin’ina na xeet fee Isra’el, kaa tee: «Boo andoona sax ee Ii-isra’el we kaa mayit’u nen pep lanq na ƥeeraamb o maag, o yoqatin o ndutuuñ soom na mucilkeel,

²⁸yaam xan o Yaal oxe a fadin fa lay um fop no ñofu took lanq ke.»

²⁹Esayi a yegnit’a itam yaaga yee: «Boo o Yaal oxe Hupna fop a wuusan’eerna a in xa taan xa leng-leng, nen a Sodoom i ndefkoogu, nand fa Gomoor, den we Roog a duguñ’ina.»

³⁰Xar i laykaa no keene boog? We ndefeerna Yaawuur mbaaƭoogeerna maa da njofitna mbaambir Roog, Roog kaa ɗeetat a den nen jofu na pexey o ngim onqe,

³¹ndaa we mbogna na xeet fee Isra’el o mat, too a mbaaƭoogu o njofandtel kebil ke mbaambir Roog, kaa nqoxiɗ.

³²Xar taxun koy? Kaa mbaaƭoogu o mbel a Roog na pexey a pi den, a mbañin o mbaaƭit na pexey o ngim onqe. Ten taxu yoo da mbaɓ ɓil le na tolofnooraa.

³³A Pind a Tedu ke sax a lay’a kaa jofna no ten ee: «Xam doon kam Siyoŋ ɓil laa na tolofnooraa, a ref gac laa na maafnooraa. Kaa koy, oxuu gimna no ten, sedkee muk.»