Read NQAARIIT NE ROOG 1 Korint 1 Bible Online

1 Korint 1 - NQAARIIT NE ROOG bible

1 Korint 1

¹Mi Pool fee Roog a xoyna no bug um ndax um ref apootar Kiristaa Yeesu, mi fa Sosteen fee o pog nuun na mbindaa a nuun o leetar oleeke.

²In we simnaa a nuun, nuun mbokatax ne no gimu we ngenna kam teeru fee Korint fop, nuun we Yeesu Kiristaa a tedlandna, a xoy a nuun, ndax nu mbog no ten, simnaa itam fop we na ƈufginooraa gon no Yaal in Yeesu Kiristaa fo muu da mbaagna o ndef.

³Yaasam Roog Faap in fo o Yaal oxe Yeesu Kiristaa a ci a nuun yirmande fa jam.

⁴Kaam gidmaa a Roog o Yaal es ñaal fo o yeng yaam yirmande fee ta ci’na a nuun na Kiristaa Yeesu.

⁵Yirmande feene refu yee xañee a nuun dara no ten. A ci’a a nuun nu mbaag fa lay, njeg o and itam.

⁶Ke seede’aneena a Kiristaa a gena na nuun,

⁷boo ten taxu nu ñakee ci’it leng, yaa nu cungaa o Yaal in Yeesu Kiristaa a feeñ.

⁸A woora yee xan a fap a nuun, ndax nu ñak sik na bes faa o Yaal in Yeesu Kiristaa a nomtooxiidkaa.

⁹Roog gor oo, ten fee fokatna a in fa Yeesu Kiristaa fee o Ƥeem, o Yaal in.

¹⁰Fog es, kaam bug, no gon no Yaal in Yeesu Kiristaa, nu mbog ɗelem leng kut, ndef o leng, nqaajoor a ñak a ndeer nuun. Kaam ee fat nu mbokatoor ndef o leng, mbog xalaat fo o liir.

¹¹Fog es, a jega kaa nantuuma no xaa genna no mbind Kolowe, ta ref ee kaa jeg qasir a ndeer nuun.

¹²Kene um ne’aa: Wene kaa layaa yee: «In, Pool i ndeefaa», weeke yee «Apolos», waana yee «Kefaas[1]», lakas we yee «Kiristaa i ndeefaa».

¹³Ndax kaa Kiristaa refatee o leng? Kaa Pool a rengel na kurwaa, ndax nu muc, ndi o kiin na nuun kaa batiise’el meen no gon Pool?

¹⁴Kaa koy, mexe gidmaa a Roog ne batiise’eeruuma o leng na nuun a refangee Kirispus fa Gayus.

¹⁵Yaaga koy, foogaam ee o leng saɗee moof boo a lay ee no gon Pool a batiise’e, boo a layaa yee o taalbe Pool oo.

¹⁶Um batiise’angaa meen o lakas, Estefanaas fo wiin mbind um oo. A jolangaa weene limuuma, ga’atiim o lakas.

¹⁷Batiise taxee Kiristaa a inaam. O nanangaa um inoox, o yegnitik Yegil mbaax ne taxun. Refee itam ee o fel-o-ɗek taxu um waare’aa, yaam yaaga a kurwaa le Kiristaa a fi’kel cegee xoox.

¹⁸We na ndeefaa a ƭat a saŋkax mbi’u ñaku xoox a kurwaa le na waare’eel, ndaa na in we mucna, katil Roog oo.

¹⁹Ne a Pind a Tedu ke a layitna yee: «Xam mo’and o jeg-yiif ole no jegu yiif we, yaal-o-and we, um sañit o and den.»

²⁰Ten taxu ndiiki, an refu meen o yaal o and? An refu meen o cangu? An na inooxkaa meen a ñimatireel, ndax ta lalit yiif um? Kaa Roog feeñlee yee ke na fakoorteel na adna fee ñaku xoox oo?

²¹Ne andoona yee ke adna a mbi’na o and ɓakandee a den no and a Roog, ten taxu Roog a mucla we ngimna, a reefandin na waare fee wiin we a mbi’na ñaku xoox.

²²Kaa Yaawuur we a ngaptaa xa anddiloor, Geegeres we a ƥaalaa o jeg-yiif,

²³ndaa in o mat, i mbaare’aa a Kiristaa fee rengeena took a kurwaa, a ref a panq no Yaawuur we, we ndefeerna Yaawuur a mbi’in ñaku xoox.

²⁴Kaa koy, no we ngimna fop, ta ref o Yaawuur mbaat o tefee o Yaawuur, Kiristaa refu doole fo o jeg-yiif ole Roog.

²⁵O ñak-xoox Roog sax moƴkoogu o jeg-yiif no wiin we, o neew doole um a garitkoogu wiin we took!

²⁶Fog we, fat nu ƭeetaqin a paax ee ndeer nuun we nqoyeena, mayee waa adna fee a ƭeetaa nen jegu a yiif tigi, mayee yaal toole, mayee garmi,

²⁷ndaa kaa Roog a jil tig ñaku xoox ke na adna fee, ndax yaal-o-and we a ngefiɗ, a jil tig neewu doole ke na adna fee, ndax yaal toole ke a sed.

²⁸Kaam ee Roog kaa jil ke jegeerna o njiriiñ na adna fee fo ke fop a nqeefna fo ke saxeerna, ndax ke saxna a paƴ ndiŋol a luƈtoox.

²⁹Kaa Roog a fi keene, ndax o leng fakooxkee mbaambir um.

³⁰O ten doonu a nuun na Kiristaa Yeesu. Kaa Roog a fi a Kiristaa ta ref na in o jeg-yiif fo o cofel fo o tedel fo a bateer,

³¹ndax oxuu na fakooxaa, ta ref no Yaal oxe, ne ta bindteena.