Read NQAARIIT NE ROOG 1 Korint 10 Bible Online

1 Korint 10 - NQAARIIT NE ROOG bible

1 Korint 10

¹Fog we, bugiim nu mbeecit ee a jeg’a jamaane, daan in fop a ndeefanaa eel laa, a njoot o maag olaa,

²a mbatiise’tel eel le fo o maag ole na Moyiis,

³a ndeer ñaamel-yiif leng kut ke,

⁴a yer kaa refna a yer-yiif, yaam ɓil laa da yertoogna foofi laa, ɓil-yiif a reeƭu, too kaa reefanoogu a den muu refna. Ɓil laaga koy, Kiristaa a reeƭu.

⁵Moƴ-o-jaak we no daan in waaga ñoowtoogee naa felna a Roog, ten tax’u da saŋkoor na koƥ-a-ƥor alaa.

⁶O nanangaa keene a xew, in o mat taxun, ndax i njegkee a yuxum a paaxeer nen a den.

⁷Ba nu ngeleeroox farna fo ke refeerna Roog nen leng-leng na den, ne ta bindteena yee: «Xeet faa a ndalfooxa o mbokatoor, a ñaamaa, a yeraa, soo a ndef na fa ŋas.»

⁸Ba i ndok no ceeq, ne leng-leng na den a ndokit’ina teen boo a tax Roog a warnoor no ñaal leng kut wiin cuni qarɓeen ƭik fo wiin cuni tadik.

⁹Ba i ƭeetloox o Yaal oxe itam, ne leng-leng na den a mbi’it’uuna boo pangool a ngar, a mbar a den.

¹⁰Ba nu nqaadoox, ciiƥnoox kaa farna no Yaal oxe, ne da mbi’it’uuna boo malaaka fee na saŋkaa a fudooxan a den.

¹¹Refee nu nga’aan! Keene fop xewna kaa ref o ɗeendoor, a bindel ndax ta ref maƭax na in, in weeke ndefna no cat o ñoow adna.

¹²Ten taxu, fat oxe foogna yee kaa geenoox jing a wootoox, yaam ndik ta yen.

¹³Nu ƭeetlooxkaand ƭeetlax naa o kiin a mosaandeena o ɗeetloox, too Roog fee refna gor xaƴkee a nuun, nu sipanel ƭeetlax naa hupna a nuun doole. Kaa xaƴaa nu ƭeetlooxel, ndaa a naaga o soƥaa ta jagand yaaga naa nu sutoorna teen, ndax nu ngatil ƭeetlax keene.

¹⁴Fog es, ten taxu um layaa a nuun ee: Ƈufyo a cuurax.

¹⁵Kaam bind a nuun keene, yaam and ee wiin jegu a yiif nu ndefu, yaaga koy ƥaalyo boo and ke um ne’aa.

¹⁶O kaas ole i mbarke’aa, ndax kaa naagee o fokataa a in fo fo’oy le Kiristaa? Kaam ee: Ndax mbuuru ne i nqustaa naagee o fokataa a in fo cer ke Kiristaa?

¹⁷In we na nqaajraa mbuuru ne, i maya, ndaa ne mbuuru ne a refna leng, in itam o leng i ndefu.

¹⁸Ngoryo Ii-isra’el we: Ndax boo da ndeerna, a ñaamaa sadax, naangee o mbokatooraa fo o sadaxand ole?

¹⁹Kaam ee: Ndax njuurax mbaat mbangool a njega o njiriiñ?

²⁰Ha’aa! Kuu sadaxeena pangool ke, cini ke a juurane, fi’anaand a Roog, too bugiim nu mbokatoor fo cini ke.

²¹Nu mbaagee o mbog fo o Yaal oxe o kaas, soo mbogin fo cini ke. Kaam ee nu mbaagee o ndeer fo o Yaal oxe, soo ndeer fo cini ke.

²²Ndax kaa i mbug o umb naal ne Roog? Kaa i moƴin o njeg doole!

²³Ndigil oo, «waagaam o fi kuu felaxama», kaa koy, fop faaxee na mi, kaam ee, fop a waage o fi, ndaa refee yee fop a waaga o geenin tig.

²⁴Ba o leng a ƴufanaa ke faaxna na xoox um, ndaa fat a waaƭaa ke faaxna no lakas we.

²⁵Kuu na jikooxeel na marse, nu mbaagaan o ñaam, too ba nu laamit dara, ndax yiif nuun siisooxkee tig.

²⁶Ke no lanq ke fop, o Yaal oxe jegun, a jeg lanq ke itam, ne a Pind a Tedu ke a laytuuna.

²⁷O kimeer a xurangaa a nuun mbaat ta xoy a nuun a put, too yiif nuun a ref no ret jaaɓin, fat nu ñaam kuu ta diƈiidna, too ba nu siisoox dara.

²⁸Kaa koy, boo o kiin a layna a nuun ee: «Keeke de, kaa sadaxeena fangool oo», ba nu ñaamin, yaam ne ta maƭooxna a nuun keene fo ne yiif um a bugko siisooxaa.

²⁹Meeke, nu nanaan, ne’iim a yiif nuun, ndaa yiif no lakas. Xar na taxkaa yiif no lakas a ɓanjaa ke um fi’aa fo yiif jeejooxeer?

³⁰Um naagangaa o ñaamaa fo o ngidim, xar na taxkaa um ɓanjel yaam keene um gidmitaa o Yaal oxe?

³¹Ta ref na ñaam mbaat na yer mbaat no lakas, mbi’yo fop na tedaanga Roog.

³²Ba nu ndef a panq no Yaawuur we mbaat no we ndefeerna Yaawuur mbaat no tedu we Roog.

³³Mi fa xoox es, keene um jeemaa no kuu refna, ndax um fel fop. Keene koy refee yee um galagaa a xoox es, ndaa ke faaxna no moƴ-o-jaak we, ndax da muc.