Read NQAARIIT NE ROOG 1 Korint 15 Bible Online

1 Korint 15 - NQAARIIT NE ROOG bible

1 Korint 15

¹Fog es, ndiiki kaam bug o wetand a nuun Yegil mbaax ne yegnuuma a nuun, too nu njaɓin, ñaaƴaa teen, njof mbaambir,

²njegit teen a muc. Yaakaaraam ee ne yegnitanuuma a nuun, nu ndamtun a ndamit, yaam nu ndamtangiran neene, o ngim nuun kasaara soom a refkaa, ɗaxkee dara.

³Pitik, kaam jangin a nuun ke daawuuma, ta ref ke moƴna o jeg o njiriiñ. Ten refu yee: Kaa Kiristaa a xon yaam pakaad in, ne a Pind a Tedu ke laytuuna,

⁴a gasel, soo no ñaal ndadkandeer naa ta xontoox, ne a Pind a Tedu ke a laytuuna,

⁵a feeñoox a Kefaas, a feeñoox itam apootar xarɓaxay fo apootar ɗik we.

⁶Cinj kaaga, a feeñooxa ngap wiin teemeed ƥetik jaf leng, too moƴ-o-jaak we no wiin weene fop owe ñoowaa, ndaa a jega teen waa maadateerna.

⁷Ye keene a faafna, a feeñooxa a Saak, a feeñooxahin apootar lakas we fop.

⁸Ye ta feeñooxna weene fop koy, a feeñooxaxam itam, um ref nen o nqeq o ndeyeer,

⁹moƴ o neew no apootar we. Andaam ee xoyeel apootar sax a jombaxam, yaam kaam ñagadiloogu o fog ole no we ngimna na Roog.

¹⁰Yirmande Roog soom taxu um ref ke refuuma xaye, too yirmande um fa mi yenee na ngas, yaam kaam daar, hupiɗ a den jale. Wariim o lay sax ee mi jalu, ndaa yirmande fee Roog a dalinna a ndeer es fo ten.

¹¹Ten taxu, ta ref mi mbaat den, keene i yegnaa a nuun, too ten nu ngimu.

¹²Ii, a soƥangaa koy ee kaa waare’eel ee Kiristaa a xontooxa a ndeer no xon we, nam leng-leng na nuun a saɗu o moofit boo a lay ee a qontax jegee?

¹³A qontax a jegangee kañ, Kiristaa xontooxee,

¹⁴too Kiristaa a xontooxangee, waare in ɗaxee dara, too o ngim nuun ɗaxee dara itam.

¹⁵In sax, in ndefu we na seede’anaa a Roog na xa maaƥ, yaam kaa i layaa yee Roog a xontooxnoora a Kiristaa, too fi’iran, yaa a qontax a jegeerna.

¹⁶O qon a waagangee o xontoox kañ, Kiristaa xontooxee itam,

¹⁷too Kiristaa a xontooxangee, o ngim nuun kasaara a refu, too nuun wey no pakaad nuun boo ndiik.

¹⁸Kiristaa a xontooxangee, we nqonna no ngim na Kiristaa a saŋkooxa boo faw.

¹⁹A soƥangaa yee yaakaar in fa Kiristaa na adna feeke rek a dayu, in ndefu we moƴna o ngalakoox no wiin we fop.

²⁰Kaa koy, Roog a fi’a jam boo Kiristaa a xontoox a ndeer no xon we, a refat taaw a ndeer den.

²¹Fa nqon, no kiin o leng a reefu, a xay took adna fa muum. Neene o mat a qontax a reeftu no kiin o leng, a xay took adna fee fop.

²²Na fa nqon, fop o jaf Aadama a ndeefu, fop a nar o ndeef o jaf Kiristaa, a nqontoox,

²³oxuu refna na seek um no qod ole, Kiristaa a adoox, wiin um a ndeef, no ñaal naa ta nomtooxiidkaa.

²⁴Maaga, xan muukandoong ne a fadiid: Xan Kiristaa a yaq toole paaxeer ke fop njegna sañ-sañ fa katil took in, a ɓoxot a Roog Faap fee Maat ne.

²⁵Yaam Kiristaa a hela o maadooxaa boo yaa Roog a fi’na fañ um me ta dakaa.

²⁶Oxe na falakkeel o duguñaa no fañ um, refu fa nqon,

²⁷yaam a binde yee: «Roog a doona fop na xa ƥay um.» Fat nu and koy ee a layange sax ee kaa fop a doonel na xa ƥay um, a nananan, oxe doonna tige na xa ƥay um fogee.

²⁸Boo andoona yee fop a doone na xa ƥay um, a nananan, a koom itam o Ƥeenqe a nanan a Roog fee fi’na boo fop a nananan, soo Roog a ref o maad no fop.

²⁹A reeƭit’angee neene, nam we na mbatiise’eel no gon no qonu a mbi’koogu? Xon we a naangangee o nqontooxaa, xar taxu da mbatiise’eel no gon no qonu?

³⁰A qontax a jegangee, xar taxu i suƭaa xa ñis in?

³¹Fog es, bes fuu refna, o ñis es oley no xoƥ nquƭ, ta woor boo ne nu ndefitna qaaƴoor es no mbokatoor ne i njegna no Yaal in Yeesu Kiristaa.

³²A soƥangaa yee a qontax jegee, xar taxu um gomir fo ƥaaɓaan kam teeru fee Efees? Ndax wiin taxu um fi’in? Yaaga xar a ɗaxkaxam? A qontax a jegangee kañ, «fat i ñaamaa, yeraa, yaam o feet i nqon».

³³Koo qoyni, ba o leng a nax a nuun! «Yoon faaxeer na yaqaa jiko.»

³⁴Nomtiidyo a yiif nuun too mbaas bakaad. A jega waa andeerna a Roog, too gaci yoo na nuun.

³⁵Xeƈa o leng a waaga o laamit ee: «A qontaxii? Cer kum na nqontoorkeel koy?»

³⁶Um doonin ee: O ƭof o say! Kuu duufoona waagee o sax, too reefee na fa nqon.

³⁷Ke duufoona itam, saqkatee cer leng kut ke yaa ta saxna. A waaga o ref ax bele mbaat lakas, o duufin,

³⁸Roog a cooxin cer kaa mbeluuna, tuufe-duufe kuu ndefna, ta cooxin cer ke ta jilanuuna.

³⁹Refee yee ke sakeena fop, cer leng kut ke a saxu. Wiin we fo ƭool den, muumeen ke fo ƭool den, tiiƭ ke fo ƭool den, liƥ ke fo ƭool den.

⁴⁰A jega itam cer aa-asamaan fo cer laalanq, ndaa meleƈ no ke lanq fogree fo meleƈ no ke refna na asamaan.

⁴¹Njeeƈ ne fo meleƈ um, a qoor ale fo meleƈ um, xa qoor axe fo meleƈ den, too o xoor o leng sax fogree fo o gend um meleƈ.

⁴²Neene o mat a reftu na qontax ale. Ke uupeena kaa fotaa, ke saxna waagkatee o fot.

⁴³Ke uupeena kaa xeefel, ke saxna a jeg o ndam. Ke uupeena kaa hees, ke saxna a jeg doole.

⁴⁴Ke uupeena kaa ref njer sang um, ke saxna a ref njer-yiif. Yaaga boog, njer sang um a jegangaa, njer-yiif a jega itam.

⁴⁵Keene o mat taxu ta bindel ee: «Aadama fee refna o kiin o eetaand oxe a dalfooxa o saq o laaw.» Aadama fa mbalakaand fee koy, yiif laa na ñoownaa a refu.

⁴⁶Ke eetna koy refee tig yiif, ndaa ke refna tig cer sang um: Kaa garaa, soo tig yiif ke a doonoox.

⁴⁷O kiin o eetaand oxe kaa hat no lanq, a ref laalanq, o ƭikandeer oxe a inoor na asamaan.

⁴⁸Neene laalanq we a nandtu fo o laalanq oxe, aa-asamaan we a nand fo o aa-asamaan oxe itam.

⁴⁹Ne i ndefitna nitaal no xe lanq, neene i ndefitkaa nitaal no xe na asamaan.

⁵⁰Keeke soom um ne’aa a nuun, fog we: O kiin sang um sang um oxe refna njer fo fo’oy waagee o lam Maat ne Roog. Kaam ee ke na fotaa waagee o lam ke fotkeerna boo faw.

⁵¹Xam lay a nuun kaa refna kunpa itam: In fop, i nqonkee, ndaa in fop, xan i suptoox.

⁵²Ndeer ñaf fo ƭeet, yaa a luuƥ a palakaand alaa a jibkaa, xan xon we a nqontoox fo cer potkateer, soo in o mat, i suptel.

⁵³Cer in keeke mbarna o mbot, xan a ndokoox cer lakas kaa mbaagkeerna o mbot, kaam ee cer in keeke andoona yee kaa nqonaa, a koom da suptel, a ndefat cer kaa mbaagkeerna o nqon.

⁵⁴Boo cer in keeke a supteena boo mbotkatee too mbaagkatee o nqon, xan ɗelem leeke a fadnoox: «Fa nqon a ɗuuɗe a lanq. O ndam a jega.»

⁵⁵«Cey fa nqon, taa fak of? Kaam ee: Fa nqon, taa o feen ole o wartaa?»

⁵⁶O feen ole fa nqon a wartaa refu bakaad, sañ-sañ bakaad a ref no kebil ke.

⁵⁷Kaa koy, Roog a fi’a jam, ten fee fapitna a in doole fee Yeesu Kiristaa o Yaal in boo i maaf.

⁵⁸Ten taxu, fog es we fexuuma! Ndamlooxyo, saƭik, moƴ o njalanaa o Yaal oxe, yaam and ee calel keene mbe’kee a koƥ.