Read NQAARIIT NE ROOG 1 Korint 2 Bible Online

1 Korint 2 - NQAARIIT NE ROOG bible

1 Korint 2

¹Fog es, kaam bug nu and ee ye garuuma me nuun, yegnitiid fa lay fa kunpa’u fee Roog, reeƭee yee kaam gar’u, ndax um lal a nuun o fel-o-ɗek es mbaat o jeg-yiif es.

²Bug’iim o layit dara a ndeer nuun, a refangee Yeesu Kiristaa, moƴtaa sax Yeesu Kiristaa fee rengeena na kurwaa.

³O neew doole tigi fadtiid’um me nuun, sendaa yaam diid.

⁴Ke layuuma fa nuun a koom, reeƭee fa lay fa laalaxad xoox mbaat um jikooxaa o jeg-yiif. Kaa reeƭu fa lay faa lalitna Yiif le Roog fa katil um,

⁵ndax o ngim nuun a riƈatoox ke adna a mbi’na o jeg-yiif, a diƈoox took katil Roog.

⁶We o ngim den a deyna koy, o jeg-yiif tigi i mbaare’aa a den, ndaa o jeg-yiif oleene hatee na adna fee, too aa-adax we teen ndalniran, den we na saŋkooxkaa.

⁷O jeg-yiif ole i mbaare’aa refu ole hatna na Roog, a ref kunpa, too Roog a yuuɓ’un yaaga jamaane jegafulee, ndax ta ɓis a in no ndam.

⁸O jeg-yiif oleene, o aa-adax o leng andiran na adna feeke, yaam a and’angaan ndengkoogee o Yaal oxe jegna o ndam na kurwaa.

⁹No kaa farna no jeg-yiif oleene koy, a Pind a Tedu ke a laya yee: «Kaa ref kaa a ngid a ga’eerna, nof ɗaaɗiran, too yiif no kiin gomiran. Kaa ref kaa Roog a roxanna we mbexuuna.»

¹⁰In o mat Roog a feeñlun na pexey Yiif um, yaam Yiif um na ɓaalaa fop boo no ke moƴna o xooɗ na Roog.

¹¹An andu sax ke refna no kiin fop, a refangee yiif um? Neene o mat a reftu: O leng andee ke refna na Roog a refangeerna Yiif le Roog.

¹²In koy, i ndaawee yiif adna, ndaa le inoorna na Roog, ndax i mbaag o andid ke Roog a ci’na a in na yirmande.

¹³I naangangaan o laytaa koy, refee fo o fel-o-ɗek ole wiin we a mbi’na o and, ndaa kaa i laytan fo o and ole Yiif le a jangnaa, yaam i layaa fo waa njegna Yiif le Roog.

¹⁴O kiin sang um sang um koy, refna ref oxe jegeerna Yiif le Roog, waagee o jaɓ ke farna no Yiif le Roog yaam o ñak-xoox a fi’un. Waagiran o and itam, yaam Yiif le Roog soom waagun o gaal.

¹⁵Oxe jegna Yiif le Roog a waaga o gaal fop, too o leng gaalkee kam um, a ɓanjin,

¹⁶yaam a binde yee: «An andu a qalaat no Yaal oxe, boo a jangnan?» In o mat, a qalaat Kiristaa i njegu.