Read NQAARIIT NE ROOG 1 Korint 4 Bible Online

1 Korint 4 - NQAARIIT NE ROOG bible

1 Korint 4

¹A soƥangaa yee neene tige a saxtu koy, kaa nu mbar o ƭeet a in nen dag Kiristaa waa ndoxneena o ndaawnaa lakas we kunpa ke ndefna na Roog.

²In weene ndoxneena koy, ngor tigi i laamte.

³Mi koy, nu ngate’aam mbaat lakas we a ngate’aam mbodu, a ƭat es yongee teen, too mi sax hate’kiim a xoox es.

⁴Mi fa xoox es, siisooxiim dara, yaam taa no yiif es ga’iim ee ɗapafulaam ngor ne ta cungaa na mi. Kaa koy, um ñak o siisoox tig sax, taxee um ñak ƥanjel, ndaa kaaga, o Yaal oxe jegun, o ten na hate’kaxam.

⁵Hate fee a refangaa no ɓay Roog koy, nqaƴyo boo hap fee a fad, too a koom o Yaal oxe a gar, a huyit ke dasna, a feeñil ke a yiif ake a mbofna, a kañ wiin we fop, oxuu refna ne ta waritna.

⁶Fog es, nu nanangaa um layit a Apolos fa mi Pool, nuun taxun. Kaam bug nu ƭeet na in, mbañat o ƈakandooxaa ke bindeena, nduux a koƥ. O nanangaa um layit a kon in, kaa bugatiim o leng na nuun a ga’atinooraa o leng, soo a fañ o lakas.

⁷Kaa nu njeg kaa nu kañteena! Xar nu pokooxu, too refee ci’it? A soƥangaa koy ee ke nu pokooxna fop ci’it oo, xar taxu nu mbakooxaa nen waa njegtuuna no onj den?

⁸Kaa nu ñof boo njeg ke nu mbugna fop, njegat halal, ndef maad, mbaas a in? Koo qoyni, ƥekyo a in no maat nuun boog!

⁹Yaam kaa nandaam nen kaa Roog a jang a in, in apootar we, a fi a in a las no wiin, i mberanel fa nqon, ndef calat na adna mbaambir malaaka ke fo wiin we.

¹⁰In, kaa i ƭeetel nen ñaku a qoox na Kiristaa, nu ƭeetel no ten nen yaal a yiif, i ndef neewu doole, nu ndef yaal toole. Kaam ee kaa nu niwel, i nqeefel.

¹¹Boo fa ndiik kaa nqeex a maad fa in, xa pud in a ƥac, i yoq ƭuc, muu i ngeenooxna, i njuumel xa ƭong, njoqooyooxaa ndetaa.

¹²Oxuu refna na in kaa daaraa, soo a sogkaa o jeg ƥekel no fud, mbeneel, mbarke’aa we na mbenaa a in, muñ ne i toroxandeel,

¹³ƥanjeel, ndoonooraa a ƭelem jam, adna a ƭeet a in nen leel, i ndef a siind boo ndiik.

¹⁴Bindaa kene koy, refee waaƭaa gaci nuun. Kaam maƭooxaa a nuun soom, yaam nu ndefa ndef xa ƥees axe fexuuma.

¹⁵Nu mbaaga o njeg ɗooɗox juni na Kiristaa, ndaa paap ke mbaagee o mbad ƭik, yaam mi ɓisiidu a nuun o ñoow ole na Kiristaa Yeesu ye yegnuuma a nuun Yegil mbaax ne.

¹⁶Me ta refna, keeke rek um xeɗaa a nuun: Ngela laalataamoo!

¹⁷Keene o mat taxu um luliid a Timote me nuun, ten fee refna o ƥees o ngore’u no Yaal oxe. Boo ta garna xan a wetand a nuun me dakuuma fa Kiristaa Yeesu fo ne um jangnitaa a ndeer pokatax ke no gimu we fop.

¹⁸A jega waa na kañooxaa, yaam a mboog ee ɗeetiidkatiim a nuun.

¹⁹Kaa koy, a felangaa o Yaal oxe, ndiik um ɗeetiid a nuun, too a koom um andan a xoox es katil no ga’atinooxu weene, fañ o day no ke da layaa,

²⁰yaam a ƭelem ngeennee Maat ne Roog, katil geennun.

²¹Ndi xar nu mbugu mbug? Kaam ee nam nu mbugtu? Um soƥiid a nuun fo o qiir ndi fo o mbeq o yoonu fo yiif dalu?