Read NQAARIIT NE ROOG 1 Korint 5 Bible Online

1 Korint 5 - NQAARIIT NE ROOG bible

1 Korint 5

¹A jega ceeq naa um nanaa a ndeer nuun. O ñoowooƭ o nandu neene, we andeerna a Roog sax saqkiran, yaam a reta boo o leng na nuun a geekataa o tew faap um.

²Ii, ɗeeti keene koy, soo nu nga’atinooxaa! Nu mbar’u o naqadiloox, soo oxe fi’na keene, nu sutin a ndeer nuun!

³Mi feeke, goƭaam a nuun, ndaa yiif es fa nuun a yongaa, a fe’aa fa nuun, too jilaam ke oxe fi’na keene a wareena o doon, nen kaam reeƭu a ndeer nuun.

⁴Yaa nu mbokatoorkaa no gon no Yaal oxe Yeesu, a soƥ yiif es fa katil Yeesu fee o Yaal in a ndef fa nuun,

⁵fat oxe fi’na keene a deɓel na xa ƥay Saytaane, cer um a saŋkoox ndax o laaw um a muc no ñaal naa o Yaal oxe a nomtooxiidkaa.

⁶Fak le nuun soo maas! Kaa nu mbeecit ke na layeel ee: O ndik no poɗaxnir rek na foɗaxnaa nqiiw?

⁷Ngela ƥogyo pakaad nuun, ndax poɗaxnir kiid ke a mbat, nu ndefat nqiiw nqas. Nu saqatee poɗaxnir sax, yaam Kiristaa refu mbaal in ne wareena na bes fee na Colandax ale.

⁸Yaaga koy fat i ndoofand xew feene, refee koy fo poɗaxnir kiid mbaat fee no jeg-nof fo coxod, ndaa fo puuru canja’e, a ndef o ñak-sik fo ndigil.

⁹Kam o leetar ole bind’uuma a nuun, lay’aam a nuun, nu mbañ o ndokoor fo we na seeqaa.

¹⁰Meene koy, ne’iim gimeer we ndefna we na seeqaa mbaat we mbuge’na mbaat guuɗ we mbaat juujuur we, yaam yaaga nu sutoox na adna fee.

¹¹Ke um bindataa refu nu ndiƈatoox we andoona yee kaa layaa yee no ngim onqe a ndefu, too a seeqaa, a mbuge, a njuuraa, a mbenaa lakas we, a ndef yeeyer say, a nguuɗaa. Ba nu ndeer fo kiin um o roon sax.

¹²Xar daawrum fo we mbogeerna na in sax boo ɓanjaa a den? Mee ndax we mbogna na nuun nu mbaru o ƥanjaa!

¹³We mbogeerna na in, Roog na hate’kaa a den. Oxe andoona koy ee o ten fogu na nuun, too a soxod, nu mbaru o ndax, ne a Pind a Tedu ke a laytuuna.