Read NQAARIIT NE ROOG 1 Korint 7 Bible Online

1 Korint 7 - NQAARIIT NE ROOG bible

1 Korint 7

¹Ndiiki koy, fat i ngar no ke nu mbindaxama. Ke moƴna no koor, refu ta fañ o dolnirel.

²Kaa koy, ndax o leng rokkee no ceeq, fat o koor oo koor a jeg o tew, o tew oo tew a jeg o kor.

³Fat o koor a fi’aa ke waruuna a ndeer um fo o teem, o tew oo a fi’aa ke waruuna a ndeer um fo o kor um.

⁴Kaa o tew jegee sañ-sañ took njer um: O kor um jegu teen sañ-sañ. Neene itam, o koor jegee sañ-sañ no njer um: O teem jegu teen sañ-sañ.

⁵Ba o leng a goƭ o lakas oxe, a refangeerna kaa laytin, yaa da mbugna o nqeɗ. Cinj kaaga, fat a ndakoox na yoon, yaam ne da mbaagkateerna o ngarin a qoox den, soo Saytaane a rokatiloox, a fog a den.

⁶Kaa ɗoxna a nuun soom bugum, yaam keene binduuma refee kebil.

⁷Ndigil oo, ke moƴan’axama fop a mbi ne fi’uuma, ndaa tanq Roog kaa mbogree. Kaa danqaa oxene kene, oxaana kaana.

⁸We andoona yee ndokee no ndolnir fo we rew den a ñakna, na mi, ke moƴna na den refu yee da mbi ne fi’uuma, a mbañat o njeg o tew.

⁹Kaa koy a mbaagangee o njof mbaambir, fat a ndolnirel, yaam dolnirel moƴu a yuxum a ndoxang.

¹⁰We andoona koy ee a ndolnire, mexe heblaa a den kene, hatee na mi koy, ndaa kebil no Yaal oxe yoo: Baa o tew oxe a xaƴ o kor um.

¹¹A xaƴangaan, baa dolooxanat o lakas. A bugangaa a tolax, fat a xendandoor fo o kor um. Baa o koor o leng a waas o teem itam.

¹²Kene koy refee kebil no Yaal oxe, ndaa kaam bugin o as a nuun, nuun lakas we: A soƥangaa yee o kiin o kimu kaa jeg o tew o kimeer oxaa jaɓna o gen fo ten, baa waasin.

¹³A soƥangaa itam ee kaa o tew a jeg o kor o kimeer oxaa jaɓna o gen fo ten, baa o tew oxe a xaƴ o kor um oxeene.

¹⁴Yaam o kor o kimeer oxe, o teem oxe gimna a tedlandaan, ne o tew o kimeer oxe a teditna yaam o kor um oxe gimna. A refit’angee neene, xa ƥiy den a nqoolaƭar, ndaa feek neene yoo, xa ƥiy axe a tedata.

¹⁵O kimeer oxe a bugangaa o tas a las um no ndolnir, a waagaan o fi, fat a tasin, too yaaga oxe gimna, ta ref o koor oxe mbaat o tew oxe, refatee teen dara. Roog kaa mucil a in, ndax i ngen na jam.

¹⁶Yaam o tew o kimu xum andu ndax xan a mucil o kor um o kimeer? Mbaat o koor o kimu xum andu ndax xan a mucil o teem o kimeer?

¹⁷No keene fop, fat o kiin oo kiin a ñaaƴ na ƭat ale Roog a halanuuna, a fi ke Roog a xoytuuna itam. Keene heblitum no pokatax ke no gimu we fop.

¹⁸Ndax a jega oxaa xucooxna yaaga yaam Roog, too a gim ndiiki? Fat a yoq teen. Ndax a jega oxaa gimna, too xucooxee? A refangaa yee a jega, baa xucoox ee yaam Roog.

¹⁹Yaam o xucoox fo o ñak o xucoox mbodu: Ƭaxee dara. Ke jegna o njiriiñ kañ refu nanan a Roog, reefaa ke ta hebilna.

²⁰Fat oxuu gimna a ref me ta reeƭna yeene o Yaal oxe xoyafuliran no ngim onqe.

²¹A jegangaa oxaa reeƭna o paɗ, fat a dam teen, too baa tax ta jegaa a yiif-a-ƭak. Kaa koy, a soƥangaa yee waagaa o jeg xoox of, koo ndok.

²²O paɗ oxe o Yaal oxe a mucilna, a jega a xoox um no Yaal oxe, too oxe andoona yee kaa jeg’u a xoox um, Kiristaa a muclangaan, o paɗ um a refataa.

²³Njigand maak nu mbatte, ten taxu ba nu ndef faɗ no kiin.

²⁴Yaaga boog, fog es, fat o kiin oo kiin a damoox no ke ta reeƭna yaaga o Yaal oxe xoyafuliran no ngim onqe.

²⁵Jegiim koy kebil inooru no Yaal oxe a jof no roog we fo mbes ke, ndaa xam lay xalaat es, nen oxaa o Yaal oxe a ci’na yirmande boo ta waag o ref gor.

²⁶Kaam lay ee: Ke faaxna no kiin oo kiin refu ta dam no ke ta refna, yaam jamaane fa andand fee i mbaambirna.

²⁷O koor a gilgangaa boo a ƴut, baa waas o teem. Oxuu gilgafuleerna, baa waaƭ o tew.

²⁸Gilig refee bakaad, too a tolax refee bakaad, ndaa oxuu rokna no ndolnir, no coono ƥor a refaa, too coono keene buganeerum a nuun.

²⁹Keeke rek bugum o lay: Jamaane fee miñatee dara, ten taxu fat we njegna rew, a ñoowit nen jegee rew,

³⁰we ndefna na xa kooniit, a mbi nen looleer, we njegeerna baneex, a mbi nen waa na mbelakinooxaa, we na njikaa a mbi nen jegeer,

³¹we na njiriiñooraa tig adna, nen waa njiriiñooreeruuna, yaam kaa ke na adna feeke a ref a liim.

³²Bugiim nu ngen no jaaxiɗ. Oxe dolniraandeena paru no Yaal oxe a misiiraa fo ne ta waagna o fi boo o Yaal oxe jaɓin.

³³Oxe dolnireena koy a misiiraa tig adna, a waaƭaa ne ta waagna o fi boo o teem a moƴin o bug.

³⁴A jega njektir ndeer o tew o tolooxu fo o tolooxeer: O tolooxeer oxe, paru no Yaal oxe a misiiraa, a ɗoftaa o ted no cer um fo no yiif um, oxe na dolooxaa o mat, a misiiraa tig adna, a waaƭaa ne ta waagna o fi boo a fel o kor um.

³⁵Keene koy, a qoox nuun taxu um layan, too refee mbog na caf nuun. Kaam bug soom nu ndam no ke moƴna o saƭik, saaƭoox no Yaal oxe, too mbañ o ngaan no tig lakas.

³⁶A soƥangaa yee kaa o kiin a jeg gaci, yaam ne o ƥeem o ndew a faafaa a tolax, fat a ci’tin a tolax, yaam ci’tin a tolax refee o tooñ a Roog. Fat oxuu bugna o dolnirel, a dolnirel.

³⁷Oxe andoona koy ee kaa bug fo o fud o letu o ƥeem a ñak o doloox, too a hor boo a and ee o ƥeem a ñak o doloox moƴanun, a giñin itam,

³⁸oxaaga a fi’a paax. Oxe ci’itna o ƥeem a tolax a fi’a paax, oxe ci’teerna o ƥeem a tolax a fi kaa moƴna o faax.

³⁹Mbanuu o tew a xesna boo a doloox, oxe no ƥaak boo yaa o kor um a xonkaa. Boo o kor um a xonna koy, a jegata a xoox um, too a waaga o dolnir fo xaa feluuna. Kaa koy, a narangaa o dolnir fo o lakas, fat a ref fo o kimu no Yaal oxe.

⁴⁰Kaa koy a wara o yeg fo and ee baneex um tigi, na xalaat es, refu yee ta ñakat o doloox. Keene xalaat es oo, ndaa gimaam ee Yiif le Roog na ɗoxaa yiif es.