Read NQAARIIT NE ROOG 1 Korint 9 Bible Online

1 Korint 9 - NQAARIIT NE ROOG bible

1 Korint 9

¹Ii, mee ndax kaa jegiim a xoox es? Ndax kaa refiim apootar, o Yaal in Yeesu Kiristaa a feeñooxaam? Kaa calel es ɓisiidee a nuun no Yaal oxe?

²Um refangee apootar na kid no wiin lakas, ten refum na nuun, yaam nuun ndefu xa tim axe no ke jalanuuma o Yaal oxe.

³Keene refu ƥonax es mbaambir no we na layaxam ee refiim apootar.

⁴Ndax kaa i mbaree o ñaamaa, yeraa no ke nu njegna, ta ref ndabid no calel ke?

⁵Ndax kaa i mbaree o ƥisloox kam calel ke o tew o kimu, ne apootar lakas we a mbi’tan boo na xa teɓ axe no Yaal oxe fa Kefaas?

⁶Ndi boog mi fa Barnabaas rek mbaru o njalaa, ndax i njeg ñoowir?

⁷No xiixire we, an na inooxaa, a ñoowaa no njiba um? An mosu o duuf a ƭing biiñ, too moɗee na xa tim axe? Nu mosa o nga o kaynaak oxaa xañteena a qaf fo sis no naak ke ta gayaa?

⁸Keene fop koy, ndax wiin we rek na sertaa a den? Ha’aa, yaam a laye sax no kebil ke Moyiis ee:

⁹«Baa nqoox ne na sugaa a suunjuuñel.» Na ƭelem akeene, ndax Roog naak ke rek a yirmu yirim,

¹⁰ndi a xalaata a in itam? In o mat taxu, ta lay ee oxe daarna a xooxaa, yaakaar a waru o xooxit, oxe na sugaa a sugit yaakaar ee xan a jeg teen.

¹¹A soƥangaa yee halal yiif i nduufu na nuun, xar taxu o saxad no kalal adna ke nuun, nu mbi’in ƭomu?

¹²Lakas a njegangaa sañ-sañ feene na nuun, ndax in fa qoox in i moƴkoogiran o njeg a den? Kaa koy, sañ-sañ feene i laamtiran. Kaa i muñ fop, yaam ten moƴu i ŋaalooxaa wargal boo ta refat a panq no Yegil mbaax ne Kiristaa.

¹³Ndax kaa a yiif nuun a naax ee we na ndagooxaa a Roog kam Mbind Roog ne fop, teen a ñoowtaa, we payna no sadaxand ole a ñoowtaa ke ɓoxotiideena no sadaxand ole?

¹⁴Ten taxu o Yaal oxe a hebil ee: We na njootnaa Yegil mbaax ne, xan a ñoowit ke hatna no Yegil mbaax ne.

¹⁵Mi koy, no bargal keene fop, jegee leng na den naa waaƭuuma, too bindiim keene ndax um hapit a den. Um xon sax moƴanaxam o ñak fak es leene.

¹⁶Ne um waare’aa Yegil mbaax ne, taxee um fakooran, yaam kaa um serel o ten, too sabab took es yaa yegniteeruuma Yegil mbaax ne.

¹⁷Um naagangaa o fi’an fo o fud o letu, xam jeg ndabid es, ndaa boo andoona yee a fel feƭar um fi’in, o sas a refkataa, nen suf naa Roog a gadnaxama.

¹⁸Too a reftangaa neene, xar refu ndabid es? Ten refu um waare’aa Yegil mbaax ne na dara, ke andoona yee ten o baawaare Yegil mbaax a jegaa, um fañin o diiroox.

¹⁹Mbaambir no fop, mi jegu a xoox es, ndaa koy kaa felaam um refan fop o paɗ, ndax moƴ-o-jaak we a ngim.

²⁰A ndeer no Yaawuur we, o Yaawuur um refaa, ndeer no we na ndeefaa kebil ke Moyiis, um ref o teereef kebil ke Moyiis (ke refateeruuma o paɗ kebil ke fop oo), ndax weene na ndeefaa kebil ke a ngim na Yeesu Kiristaa.

²¹Um refangaa a ndeer no we ndeefeerna kebil ke Moyiis, kaam ñoowtaa nen a den (too maad no kebil ne Roog a dalinna na Yeesu Kiristaa), ndax weene a ngim no ten.

²²A ndeer no we neewna doole, kaam fi’aa nen o neewu doole, ndax da ngim itam. Kaam jaɓ o ref fop mbaambir no fop, ndax mayu a muc, nuu ta saxitna saxit.

²³Kaam fi’aa keene fop yaam Yegil mbaax ne, ndax um jeg teen a las.

²⁴Nuun moƴu o and ee mayu a naanga o mbapooxanaa a laay a leng, ndaa o leng kut na ɓiskan. Yaaga koy sagyo, maafrel a paax, ndax nu njang a laay ale.

²⁵Oxe bugna o ref mbir tigi a naaga o fesaa mayu a cinj, too keene fop kaa waagna o sooƴ soom a nqirooxanaa. In koy, fat i moƴ o ngumnoox yaam a laay a sooƴkeer muk refu mbaambir in.

²⁶Ten taxu um sag, fañ o sagit nen o puul, tiq es, um and ne um fadtaa a den, nen o cegu xa kep.

²⁷Kaam dam cer es, harin a den, yaam ndik we waare’ooguuma a ndok, um xaƴel tafil.