Read NQAARIIT NE ROOG 2 Korint 1 Bible Online

2 Korint 1 - NQAARIIT NE ROOG bible

2 Korint 1

¹Mi Pool fee refna apootar Kiristaa Yeesu ne Roog a bugtuuna, mi fo o pog nuun Timote na mbindaa a nuun o leetar oleeke. In we simnaa a nuun, nuun mbokatax ne no gimu we Roog ngenna na teeru fee Korint, nuun fo tedu we Roog fop ngenna kam o jegel ole Akayi.

²Kaam ee, yaasam Roog Faap in fo o Yaal in Yeesu Kiristaa a ci a nuun yirmande fa jam.

³Roog fee Faap no Yaal in Yeesu Kiristaa a hela o simatel, ten fee refna Faap fee na yirmaa, a ref Roog fee na yaalaa no kuu refna.

⁴Ten refu oxe na yaalaa in no coono kuu ndefna, ndax na yaalax ale i njegitna na Roog, i mbaag o yaalik fop we ndefna kam coono.

⁵Ne i coono’taa mayu na Kiristaa, neene itam a yaalax in na Kiristaa a magnitu.

⁶Boo i ndefna no torox koy, a yaalax nuun fo a muc nuun taxun. Boo i yaaleena itam, o saƭkel ole na yaalax nuun taxun, ndax nu mbaag o ndoxondoox coono leng kut ke i miñna o ndoxondooxaa.

⁷Yaakaar ne i njegna na nuun koy oxe koŋ a saƭik, yaam i anda yee ne nu njegitna a las no coono ke in, neene nu njegtu a las na yaalax ale in itam.

⁸Fog we, yaag oo toox de, i mbugee o mbaas a nuun no ñak-o-and no kaa farna no torox ole dalit’ina a in kam o jegel ole Asi. Kaa i naang’el ceq, ƥiiklel o saax oo saax, coono faa hupna doole in a dal took in, boo i ñak’atu yaakaar naa i ngeektaa o ñoow in sax.

⁹Na in fa qoox in o mat, i mboog’ata yee fa nqon soom i yoqɗoorate, ndax i ndoonkee a koolax in na qoox in, ndaa ndax i ndiƈin na Roog fee na xontooxnooraa xon we.

¹⁰Roog feene o mat refu oxe wat’ina a in na fa nqon feene, too xan a watahin a in. Ii, i njega yaakaar neene yee xan a watahin a in.

¹¹Nuun itam, nu langantangaa a in fo a qeƭ, yaaga xan Roog a jaɓ a qeƭ ake wiin mayu a nqeɗanaa a in, too xan a ci’it a in teen yirmande. Neene, xan wiin mayu a ngidim a Roog itam yaam in.

¹²Kañoor in refu ke yiif in a seede’aa. A pesoorooƭ in kam adna fee, moƴtaa sax a ndeer nuun, kaa reeƭu no tedel fo no ngor naa hatna na Roog na pexey yirmande um fop, refee muk no and no kiin.

¹³I naangee o mbindaa a nuun lakas kaa refeerna ke nu njangaa fo ke nu mbaagna o and. Kaam yaakaaraa yee xan nu anddiloox keene a paax.

¹⁴Ndiiki koy, o ndik soom nu andafulu no keene, ndaa no ñaal naa o Yaal oxe Yeesu a nomtooxiidkaa, xan nu mbi a in kañoor nuun ne i mbi’itna a nuun kañoor in.

¹⁵Ten taxu, kaam bug’u o eettiid me nuun, ndax nu ƭaayahin.

¹⁶Bug’aam o reeftiid me nuun, suur no jegel olaa Makedoni, dakoox o gattiid me nuun, ndax nu ndimle’aam, um ret Yudee.

¹⁷Ndax kaam caaxaanoogu no waaj es leene? Kaam ee, ndax yuuƥ es neene kaa reeƭu o bug es soom, mi fee refna o kiin sang um, boo a taxkaa um lay ƭik «ii» fa «ha’aa».

¹⁸Ne Roog a gore’na koy, ten taxu, a tegit ake nu ndaawitna na in ndefandoor’ee «ii» fa «ha’aa».

¹⁹Kaam ee, Yeesu Kiristaa fee o Ƥeenqe Roog i mbaare’na a nuun, too waare feene a hat na mi Pool fa Silwe fa Timote, ndax «ii» fa «ha’aa» a refu, mee ndax «ii» soom saxu no ten?

²⁰A tegit ake Roog fop, na «ii» feene no ten a sinje. Boo ten taxu no gon Yeesu soom i laytaa a Roog ee «Amiini», ndax i ƥoxot a Roog o ndam um.

²¹Roog fa xoox um o mat na saƭkandaa a in fa nuun na Kiristaa, soo a dod a in.

²²Ten ñaasu a in o anddiloor um, a fudniid Yiif Tedu le kam a qeeñ in nen a ƭegeer njigand.

²³Mi koy, Roog refu o seede es, too o laaw es doonum teen. O fañaa o toroxand a nuun soom taxu um heboox o ñak o nomtooxiid Korint.

²⁴I mbaaƭee maa i sepitna a nuun ke nu mbarna o ngim, yaam kam o ngim onqe sax nu sinje. Ke i mbugna refu i ndimle a nuun ndax nu njeg o ɗaay.