Read NQAARIIT NE ROOG 2 Korint 11 Bible Online

2 Korint 11 - NQAARIIT NE ROOG bible

2 Korint 11

¹Mexe xeɗaa a nuun nu njaɓ ƭof es ndutuuñ. Andaam kañ ee nu muñanaxam.

²Yaam kaam naal a nuun, too naal neene na Roog a inooru. Kaam ceemreemaa a nuun, nu mbog o kor o leng kut, ta ref Kiristaa. Kaam bug o ɓoxot a nuun o ten nen o toog o qoolu.

³Kaa koy, kaam diidaa sax a qalaat nuun a ndok no naanaxir, soo nu naang tukit o kumnoor o saƭku o ñaku sik ole humin’ina a nuun fa Kiristaa, nu nandat fa Awa fee fangool fa ƈiƴu fee a nax’ina.

⁴Yaam o kiin a garangaa, a waare’aa a nuun a Yeesu fa lakas faa refeerna fee i mbaare’na mbaat ta soƥ ee kaa nu ndaaw yiif lakas laa fogreerna fo le nu ndaawna mbaat yegil mbaax lakas naa refeerna ne nu ndaawna, kaa nu njaɓanan a paax.

⁵Andaam ee falakaniim apootar hupalu weene na dara.

⁶Xeƈa a waaga o ref no fel-o-ɗek, ndaa refee muk no and, too i mbeeñlaan a nuun muu ta waagna waag o ref fo no kuu refna.

⁷Ndax boog kaa ref bakaad na mi ye neewandooxuuma, soo yoɗ a nuun, waare’aa a nuun Yegil mbaax ne Roog, too rabdinooxiim a nuun dara?

⁸Andaam ee huytaam pokatax lakas ke ye daawtuuma na den ndabid, ndax um jalan a nuun.

⁹Keene reeƭu ƭaxir coxla es, ndax gaɗkiim mbir es no leng na nuun, yaam fog gimu we inoor’ina Makedoni ƥislooxiidu fop ke warna na mi. No kuu ta waag’ina ref kaam mos o wootooxaa o gaɗ a xoox es na nuun, too xeɗaam ta saxaa na mi.

¹⁰Ne ndigil ne Kiristaa a saxna na mi, mexe yegnaa a nuun ee mbakax nene xañitkaandeem o ten muk kam caate ke mbidna Akayi fop.

¹¹Xar taxu a ƭelem akeene koy? Xeƈa boog yaam kaa fexiim a nuun oo? Roog a anda yee jegaam o mbeq na nuun tigi!

¹²Keene fi’uuma, xam dakooxahin teen, ndax um foor tafil ƥaaƈaal ke mbaagna o ci wiin weene o wooƥ o ga’atinoor boo a tax da nandandooraa a in, a mbakooxataa.

¹³Wiin weene apootar maamaaɓ a ndefu fo jaajal laalaal waa mbi’ooxna apootar Kiristaa.

¹⁴Kaa koy, o njaaxɗataan jegee teen, yaam Saytaane fa xoox um sax kaa fi’ooxaa malaaka fa mbogu na qoolaand.

¹⁵Kaam ee, refee o njaaxɗataan no dag we ten na ne’ooxaa jaajal no cofel ole. Xan muukandoong den a feeñit na pi den.

¹⁶Ba nu ƭeetaam nen o ƭof mbaat boog, fat nu njaɓaam nen o ƭof, ndax mi yoo, um waag o fakoox pod fod.

¹⁷Ndiiki koy, fa lay es refatee na pexey no Yaal oxe, kaa refat nen ƭof, too itam a wooraxam ee jegaam pakoor.

¹⁸Ne mayu a mbakoortaa kiihiin, mi o mat oo, bugaam o fakoox nen a den.

¹⁹Nuun we njegna a qoox, ndiiki nuun we yidaq njaɓan ɗof we.

²⁰Nu njaɓa o ndamel mbaƭ, njaɓ o ŋalel, njaɓ o nguytel, njaɓ o njambel andaƭar, boo njaɓ sax o ngefel paƭ na mukit.

²¹Keene sax kaam sedat o moof liman. Kaam foog ee in o mat, kaa i ndeyaƭar’u, ndax i ndoon a nuun keene. Mi sax ƭooɗofir ƥor um layataa, yaam andaam ee kuu o mbindeef a saɗna, saɗaanum.

²²Kuu da mbaagna o njikooxaa a nuun rek, waagaanum o jik, ta ref o ref o Hebre mbaat o Ii-isra’el mbaat o fog no kurcala le Abraham, jegee teen dara maa da ndaɗaxama.

²³Ndax kaa ndef jaajal Kiristaa? Um lay a nuun ƭof boog, yaam mi moƴun o ref a den. Kaam moƴ o jal a den, moƴ o ɓekel a den kaso, moƴ o xawel, boo kaam gen’u sax no ñaaƴaa took a semb es.

²⁴A caf a ƥetak, Yaawuur we a nqawaxam xa cap qarɓeen nahik axaa ndangandna o leng.

²⁵A caf a tadak xaweem fo o loq, jaf leng jeemeem o warit a kac, a caf a tadak suuxaam, ñaal muum fo o yeng um humbaam no maag ole.

²⁶Kaam ñaaƴoogu mayu, soo xettaa taamaala caaku kaa inoorna na xa quluɓ axe, na cuut ake, no fog es Yaawuur we fo no we ndefeerna Yaawuur. Xettaam itam taamaala kam teeru ke, na koƥ-a-ƥor ale, no maag ole fo kaa inoorna no fog kerceen maamaaɓ we.

²⁷Kaam genit calel fo coono, genit ƭaanar fo nqeex fo a koɗom. Kaam ñakoogu ñaamel, jogoñeel, ɓaŋdeel.

²⁸Layiim sax ke yoqna no wargal es bes fuu refna: Kaam gen no jaq yaam pokatax ke no gimu we fop.

²⁹Boo o kiin a neewna doole rek, yaaga mexe no neew doole itam, too o kiin a yenangaa, yaaga mexe ñoowaa na naqad.

³⁰Keene a taxa, a pakax a warangaa o jeg, yaaga no neew doole es um fakooritkaa.

³¹Roog fee refna Faap no Yaal oxe Yeesu, ten oxe simateena boo faw, a anda yee maaɓiim muk.

³²No saax laa Damaas, gofornoor fee no maad oxe ne’eena Aretaas kaa hebil’u ndax teeru faa a yetooxel ndax da ndamaam,

³³ndaa lakas we a ƥekaxam na cenjel, a ñoomnitaam no falangteer ole no saŋe ne, soo a yooraam a lanq. Naaga muctum na xa ƥay axe ten.