Read NQAARIIT NE ROOG 2 Korint 12 Bible Online

2 Korint 12 - NQAARIIT NE ROOG bible

2 Korint 12

¹Kaam ee, ke ta refna gaaf faaxeer fop oo, waagiim o ñak o fakoox. Ndiiki koy, kaam layiidaa xa ƭaaɗ fo peeñil kaa o Yaal oxe a cooxaxama.

²A jega kerceen faa and’uuma, a fi’a xa kiid xarɓaxay fo xa kiid xa nahaq ndiiki, andiim ndax fo cer um a reeƭu, too andiim itam ndax reeƭee fo cer um, Roog soom andun. O koor oxeene a yoɗe boo na asamaan fa ndadkandeer faa.

³Kaa koy, andiim muk, ndax o koor oxeene a fadta njer, ndax fadtiran, Roog soom andu teen tig.

⁴O koor oxeene a yoɗe na arjana. Maaga, a nana xa ñuxur axaa mbaag’aandeena o laalat, too o leng ci’aand, ndax ta waag o jeepeet a den.

⁵O kiin o nandu neene deŋ um fakoortaa, ndaa mi fa xoox es doŋ, ha’aa. A ŋadangaa boo a jegkaa sax, um fakoorit o neew doole es.

⁶Um bug’angaa o fakoox, taxkoogee sax um ɗof, yaam ndigil laykoogum. Kaa koy, kaam wootooxaa keene, yaam ndik o kiin a ɗeetaam a ngid alaa hupna ke ta ga’aa na mi mbaat ta nanan.

⁷Neene koy, yaam com’andtu ke no peeñil keene, sooxaneem kam cer es a bej, ndax jimbooxkiim kam a magnandax. A bej aleene kaa fadtiidaa nen oxaa Saytaane a lulna, ndax ta xijlaam boo magnandooxkiim.

⁸Xeɗaam o Yaal oxe boo a caf a tadak, ndax ta sut a bej aleene na mi.

⁹Kaa koy, a doonaxam ee: «Yirmande es a deyaang, yaam katil es, we neewna doole a refanu.» Ten taxu yoo, xam moƴ o fakoorit o neew doole es a paax, ndax katil ne Kiristaa a fudoox took es.

¹⁰Ten taxu um felakinoortaa o neew doole es, ta ref ee kaam weneel mbaat um naqadileel mbaat um toroxandeel mbaat um coono’nooreel yaam Kiristaa. Yaaga boog, boo refuuma no neew doole, maaga um jegtaa doole.

¹¹Kaam ɗofoogu, ndaa nuun o mat ƥek’axam teen, yaam nu mbaraxam o kañaa. Andaam ee um tek’ee tus oo, apootar hupalu we nuun na magnandooxaa ngupiraam no tus.

¹²Ke na laltaa yee apootar tigi refum a feeñle mbaambir nuun na pexey o muñ no kuu refna fo xa anddiloor fo comlaand fo a pi katil.

¹³Kaam ee, xar nu ñaku, too pokatax lakas ke no gimu we a njegin? Jegee de, a refangeerna ne gaɗ’eeruuma coxla es took nuun, too mexe waasnooxaa a nuun camit neene sax.

¹⁴Mexe dadkandiidaa o jaf es me nuun, too taxkee um gaɗ ñoowir es na nuun, yaam refee yee kalal ke nu njegna um waaƭaa, ndaa xa mem nuun sax. Refee yee xa ƥiy axe mbaru o saakanaa paap ke den ñoowir, ndaa paap ke mbarun o mbi’an a den.

¹⁵Mi o mat, xam jaɓ o jiriiñoor ke jeguuma fop, too xam ɓoxot a nuun a xoox es yaam xa laaw nuun. Ndax ne fextuuma a nuun neene xan a tax o mbeq nuun fa mi a wañoox?

¹⁶Xan nu njaɓ boog ee reeƭiim a toq a meɗu took nuun. Xeƈa kaam ƴiƴ, dam a nuun fo mbooƴ, ne da laytuuna na mi.

¹⁷Ndi kaa um damloox no leng no we luliiduuma me nuun, ta ƴiƴit a nuun.

¹⁸Mi o mat heblu a Tiit me nuun fo o pog oxe yoonna fo ten. Ii, Tiit o mat kaa mos o nax a nuun? Xeƈa boog kaa Yiif leng le ɗoxee a in na ƭat a leng kut ale?

¹⁹Kaa nu miñ o nqalaataa yee kaa i njofandataa a qoox in mbaambir nuun. Kaa koy, mbaambir Roog i laytaa keene fop na pexey Kiristaa, nuun qaariit ke ndalna na qeeñ in bo, kaa i mbug o njok a nuun kam o ngim onqe.

²⁰Mi de, kaam diidaa rek o ñak o soƥ a nuun ne bugtuuma, nuun oo, nu nqetoortaam ne nu mbugteerna, yaam ke um soƥiidaa: Qasir fo ciisir fo puuxir fo ngendandoor fo layir paaxeer fo ñu’ir fo o nga’atinax fo o samar ole fi’na yook.

²¹Kaam saɗaraa sax ee um fadiidangaa, xan Roog es a toroxandahinaam yaam nuun. Pexey es fop a refkaa rek um loolaa took no we miñna o mbakaadaa, too a mbañ o ndicoox qoolaƭaru ke fo ceeq ne fo caasaay ne da ñoowtaa.