Read NQAARIIT NE ROOG 2 Korint 2 Bible Online

2 Korint 2 - NQAARIIT NE ROOG bible

2 Korint 2

¹Hebooxaam ee um nomtooxiidangaa me nuun gooyandkatiim a nuun.

²Yaam naqad nuun a inoorangaa na mi, kaa andiim no xe um jegitkaa o ɗaay, a refangee no xe naqadiluuma.

³Nu nanangaa um bind a nuun o leetar oleene, kaam bug’u um fadiidangaa, jegitkiim naqad no we mbaraxama o ci o ɗaay. Jeg’aam a koolax a maak na nuun ee ke refna o ɗaay es refu o ɗaay nuun, nuun fop.

⁴Kam coono magnu fo xeeñ ŋaƭe, may fo xa kooniit bo, bindit’um a nuun, refee koy ee ndax nu naqadiloox, ndaa ndax nu and o mbeq o njegee hap onqe jeguuma na nuun.

⁵A soƥangaa yee kaa jeg’u oxaa naqadiloogna, refee yee mi a naqadilu, ndaa nuun fop. A refa o ndik na nuun oo, yaam ndik ta ref ƥaaɓaatin na mi.

⁶A qaw ale moƴ-o-jaak we na nuun a ndoonna o kiin oxeene a deya.

⁷A moƴa faax ndiiki koy, nu mbaasanin, yaalin, ndax moƴkee o mudnoox no njakad.

⁸Mexe xeɗaa a nuun, nu lalit ee nu njega o mbeq no ten.

⁹O ɗeetloox a nuun boo and ndax nu maadaxam o nananaa soom tax’u um bind a nuun.

¹⁰Oxuu nu mbaasanna, waasanaanum itam. Ke waasantuuma, a soƥangaa yee a jega, nuun o mat taxun mbaambir Kiristaa,

¹¹ndax Saytaane ci’kaand o gom olaa ta jegitna doole took in, yaam pexey um fo a pi um mo’ee o leng na in.

¹²Ye fadiiduuma Torowaas, ɓisiid Yegil mbaax ne Kiristaa, ke o Yaal oxe a halanaxama a ƭat ake fop oo,

¹³no laaw o xaƭa reeƭum, yaam ne ga’eeruuma a Tiit fee o pog es. Ten taxu layaam a den ee: «Yoqyo fa jam, mexe suuraa Makedoni.»

¹⁴Yaasam Roog a simatel, ten oxe na ɗoxaa in kili, in we mbogna na qaaj ale maafna na pexey Kiristaa. Ten na fexeyaa boo i mbaag o andnooraa gon um, nen tuñ pelu kaa pictooxna muu refna.

¹⁵Kaa i ndef nen cuuraay faa Kiristaa a ɓoxotna a Roog, ndefin na Roog kam wiin we njegna a muc ale fo no we na saŋkooxaa.

¹⁶Ta ref no leng-leng we tuñ no qon oxaa na ɓisaa na fa nqon, soo no lakas we ta ref a qeeñaan o ñoow olaa na ɓisaa no ñoow ole. Oxum o kiin waagu o fadin calel nandu neene?

¹⁷Yaam in o mat, i ndefee nen wiin mayu we na njula’aa fa lay fee Roog. Kaa koy, kaa i ndef waa na laytaa a qool qac kaa farna na Kiristaa mbaambir Roog, yaam Roog o mat lulu a in, i ndef faɗ Kiristaa.