Read NQAARIIT NE ROOG 2 Korint 8 Bible Online

2 Korint 8 - NQAARIIT NE ROOG bible

2 Korint 8

¹Fog we, kaa i mbug o andnoor a nuun ne yirmande fee Roog a feeñitna kam pokatax ke no gimu we no jegel ole Makedoni.

²Gimu we kaa ƭeetloox’el kam coono maak kaa ndal’ina a den, ndaa o ɗaay den kaa magin’u lool, boo a tax da lalit o laabiir den, ke da ñak’ina ñak fop oo.

³Mexe andnooraa a nuun ee a ci’ta ke da mbaagna fop, boo sax no kaa da mbaageerna. Den fa qoox den

⁴a nqeɗa a in, too a saƭik teen bo, ndax da mbaag o ci’el a mbog no calel keene refna ref o ndimle no tedu we ngenna kam Yudee.

⁵Keene koy hup’u yaakaar in lool, yaam kaa eet o ƥoxot a qoox den o Yaal oxe, cinj kaaga da ƥoxotoox na in, ne Roog a bugtuuna.

⁶Ten taxu i nqeɗa a Tiit ta gar me nuun, a muuk ke ta fer’ina, ndax ta dimle a nuun, nu mbadand calel paaxu keene.

⁷Ne nu njegna halal no fop, ta ref o ngim onqe fo fa lay fee fo o and ole fo o jaflax no fop fo o mbeq onqe nu njegna na in, neene itam nu mbaru o ngoorgoorlooxit no calel paaxu keene.

⁸Refee yee kebil um cooxaa a nuun, ndaa kaam lalaa a nuun o jaflax ole lakas we a njegna, ndax o mbeq o ndiindigil onqe nuun a waag o ɗeetaqinel.

⁹Yaam nu anda yirmande fee no Yaal in Yeesu Kiristaa. Ten fee jeg’ina halal bo, a fi’ooxa o ndool yaam nuun, ndax nu njegit halal na pexey o ñak um.

¹⁰Kene refu a maƭax es fa nuun: Ke faaxna na nuun refu nu njeem o mbadin ke nu mber’ina no hiid ole faafna, yaam nuun ndefu we eetna o mbug o mbi tig, too nuun ndefu we adooxna no we mberuuna.

¹¹Ndiiki koy, mbadatinyo o lac oleene. Fat nu mbug o mbadnitin ne nu ngeboortuuna, too fat a ref fo ke nu njegna.

¹²Yaam boo hebooxoona o ci’it, yaaga xan Roog a jaɓ ke ci’toona no ke jegoona, soo a fañ o ɓaal ke jegeeroona.

¹³Refee yee kaam bug o ɓek a nuun no ñak, soo difi lakas we, ndaa kaam bug nu mbodir.

¹⁴Ke nu ngupitna a den o jeg ndiiki, a ref ƈufginoor den, ndax den oo, boo da ngupiɗna a nuun o jeg, ta ref ƈufginoor nuun. A reftangaa neene, yaaga ngupatir leng jegkee,

¹⁵ne a Pind a Tedu ke a laytuuna yee: «Oxe hurid’ina mayu, hupiɗ’ee, too oxe hurid’ina o ndik, dangiɗ’ee.»

¹⁶O ngidim a hela a Roog, ten oxe ɓekna kam xeeñ le Tiit o jaflax o leng kut ole i njegna na nuun.

¹⁷Tiit a jaɓa o xoy ole in, too a fidaan lool, boo ta garan a xoox um me nuun.

¹⁸In we yoonandtan o pog o cegu o niwel kam pokatax ke no gimu we yaam Yegil mbaax ne ta waare’aa.

¹⁹Kaa jolna keene sax, pokatax ke no gimu we njilun, ndax ta yoon fa in yaa i ƥisaa o ndimle nqeene i ngadneena, yaam o ndam no Yaal oxe. Neene i laltitaa itam ne i mbugitna o ndimle lakas we.

²⁰Kaa i mbootooxaa o njeg gon ɓaal yaam sadax magnoodu ke i ndoxondeena.

²¹Yaam refee yee mbaambir no Yaal oxe soom i mbaaƭtaa ke faaxna. I mbugaan itam mbaambir no wiin we.

²²I yoonanda fa den o pog in oxe andoona yee i nga’a no ten o jaflax o maak no tig mayu, too a moƴahinin o lalit no jaf leeke, yaam a koolax ale ta jegna na nuun.

²³Tiit o mat, kaa ref o yoon es oxaa na jalaa fa mi yaam o njiriiñ nuun. Fog in weene koy, kaa ndef we pokatax ke no gimu we a lulna, too kaa njalaa ndax Kiristaa a ɓoxoteel o ndam.

²⁴Lalityo boog kam pokatax ke no gimu we yee nu mbexa a den, ndax ke i mbakooritna a nuun mbaambir den a ref ndigil.