Read NQAARIIT NE ROOG 2 Korint 9 Bible Online

2 Korint 9 - NQAARIIT NE ROOG bible

2 Korint 9

¹Soxla’atee sax um bindahinaa a nuun kaa farna no ndimle nqe wareena o lultiid we mbogna na xeet fee Roog,

²yaam andaam a kebax nuun ale kañoortuuma no Maamakedoni we yee: «Fog we ndefna kam Akayi a ngebooxa boo a ƈut no hiid ole fagun faak.» O jaflax nuun a yo’na moƴ-o-jaak we fop.

³Kaa koy, mexe luliidaa fog weene, ndax a tagas ake layuuma na nuun ndefkee kasaara. Yaakaaraam ndigil ee no keene xan a soƥ waaj nuun a ƴut, ne laytanuuma.

⁴Kaam xof yaam ndik Maamakedoni a yooniid fa mi me nuun, too a soƥ waaj nuun ɓelee, soo fakax felaan leene a suptoox gaci na in, yaam ne’katiim sax fee na nuun.

⁵Kaam bug’u boog o xeɗoox fog we, da adooxiidaam me nuun, soo a topatoox ci’it ne nu ndegit’ina yaaga, ndax refkee na nuun ci’it no kiin o batu ndaa fo o fud o letu.

⁶Fat nu and kene: Oxe duufna o ndik, o ndik rek a saxadkaa, ndaa oxe duufna mayu o mat, mayu a saxadkaa.

⁷Fat oxuu refna a ci’it ke dalna no xeeñ um, too baa ref fo a tagid a ŋooɓu, baa ref itam fo a yiif-a-ƭak, yaam oxe na ci’taa fo o ɗaay soom Roog a bugu.

⁸Roog a jega katil faa ta mayƭanditna a nuun fo paax kuu ndefna, nu ngen no njegaa kili ƭaxir soxla nuun fop, boo ta yoq kaa waagna o jal paax,

⁹yaam a Pind a Tedu ke a laya yee: «Kaa mos kam, a ci’aa rool we, too o cofel um xan a maadaa boo faw.»

¹⁰Oxe na cooxaa o tuuduuf oxe ax, soo a ci’in mbuuru ñoowir, xan a las a nuun, a mayƭand ax nuun, too xan a moƴ o mayƭand xa tim o cofel nuun.

¹¹Meene nu ndeefkaa njegaa halal tigi na waxtu fuu refna, ndax nu mbaag o laltaa o laabiir nuun na pexey ci’it nuun ke i ndaawnitaa, ndax Roog a ɓoxotel o ngidim.

¹²O ndimle nqe no sadax ke nuun refee ƭaxir coxla no gimu we soom, ndaa kaa ref sax a cur a cookir a njal a Roog.

¹³Nu kañtange calel keene, xan a simat a Roog yaam ne nu mbeejlitna yee nu nanana Yegil mbaax ne Kiristaa soo lalit o laabiir ole nu mbogna fa den no fop.

¹⁴Ne nu sooɓna a den koy, xan a nqeɗanaa a nuun yaam yirmande fa ngupu fee Roog a picitna took nuun.

¹⁵Yaasam Roog a ɓoxotel o ngidim yaam ci’it ne ten jegeerna nand.