Read NQAARIIT NE ROOG Galati 3 Bible Online

Galati 3 - NQAARIIT NE ROOG bible

Galati 3

¹Cey, Gaagalati ñaku xoox we! An laxadu a qoox nuun? Nu mbetandooxe a paax ne Yeesu Kiristaa a warit’eena na kurwaa boo kaa fi’at sax nen kaa nu maadin.

²Keeke soom bugum nu layaam: Ne nu ndeefaa kebil ke taxu nu ndaaw Yiif le Roog, ndi ne nu nanna Yegil mbaax ne too ngimin?

³Ndax neene nu ñaktu a qoox? Ye nu mberitna no Yiif le Roog boo ƈut, ndax kaa nu mbugin o muukit na doole qoox nuun?

⁴Ndax ke nu ƭeetlooxeena fop, kasaara a refkaa? Ha’aa o mat, refkiran.

⁵Oxe ci’na a nuun Yiif um too a fi’aa a pi katil a mayu a ndeer nuun, ndax kaa fi’an yaam ne nu ndeefaa ke kebil ke a layna, ndi yaam ne nu nanna Yegil mbaax ne too ngimin?

⁶Kene refu ke a Pind a Tedu ke a layna na Abraham: «Abraham a gim’a na Roog, too ten taxu Roog a ɗeet’aan nen o cofu.»

⁷Yaaga koy, fat nu and xil ee we njegna o ngim ndefu xa taan Abraham tigi.

⁸A Pind a Tedu ke a laya yaaga yee xan Roog a ɗeet we ndefeerna Yaawuur nen jofu yaa da ngimna. Ten taxu Roog a yegna a Abraham yegil mbaax ne, ye ta layna yee: «Qeet ke fop na wo a mbarke’itkeel.»

⁹Neene boog, we ngimna, a mbarke’e nen a Abraham, o kimu xe.

¹⁰We na njeemaa o ndeef kebil ke, ndax da ƭeetel nen jofu mbaambir Roog, a salooxe, yaam a binde yee: «Oxuu reefeerna ke bindeena no safe le no kebil ke fop, a fañ o ñoowit ne ta jangnituuna, a salooxe.»

¹¹A woora yee mbaambir Roog, o leng jofandkaand, yaam ne ta fi’aa ke kebil ke a layna, yaam a binde yee: «Oxuu Roog a ɗeetna nen o cofu yaam ne ta gimna, xan a ñoow.»

¹²Kaa koy, fat nu and ee kebil ke mbaqaqooree no ngim onqe. A Pind a Tedu ke kaa lay ee: «Oxuu fi’na kene mbaat kaana, xan a ñoow yaam ke ta fi’na.»

¹³Kiristaa a wata a in na salax ale no kebil ke, ye ta salooxeena, ten fa xoox um yaam in, ne ta bindteena yee: «Oxuu rengeena took a teex, a salooxe.»

¹⁴Neene we ndefeerna Yaawuur a ndaawtaa na Kiristaa Yeesu barke fee Abraham a barke’eena, too in itam, i ngimangaa, xan i ndaaw Yiif le Roog regteena.

¹⁵Fog we, ndiiki kaam bug o lay kaa andoona yee oxuu refna a andaan: Boo wiin a njofoorna no tig mbaambir no seede, o leng waagatiran o laaf, too o leng waagatee o ɓaat teen tig.

¹⁶Ke regteena koy, Abraham fo o ndaan um njegun, yaam a Pind a Tedu ke layee yee «fo xa taan um» nen yaa ta jeg’ina xa taan xa mayu, ndaa o leng kut a ne’oogu, ye ta layna yee «fo o ndaan of», ta ref Kiristaa.

¹⁷Keeke um ne’aa: Njofoor naa Roog a fi’na yaaga, waagaand o laaf. Yaaga koy, ke regteena, a ref meen boo a jeg xa kiid teemeed nahik fo xa kiid qarɓeen tadik, waagaand o laaf yaam kebil ke ndeefanuuna.

¹⁸A soƥangaa yee lam ne no kebil ke a reefande, yaaga ndegit ne waagee o tax o kiin a daawin, too naaga a reeƭit’u a ndeer Roog fa Abraham.

¹⁹Xar taxu kebil ke boog? Kaa ndoon’el teen, ndax da lal wiin we yee kaa ƭapaa ke Roog a bugna boo neene o ndaan onqe jegna ndegit ne a garu. Kebil keene, o ndok-a-ndeer eet’un o daawit no malaaka ke, soo a daawnin wiin we.

²⁰O ndok-a-ndeer koy, a ndeer no ɗik a mosu mos o refaa. Roog o leng oo. Yaaga koy, o ndok-a-ndeer soxla’aand.

²¹Yaaga koy, ndax kebil ke kaa nguutatir fo ke Roog a regitna? Ha’aa kañ! Kebil kaa mbaagna o tax o kiin a jeg o ñoow a cooxit’ange, yaaga oxuu na fi’aa ke kebil ke a layna, Roog a ɗeetkoogaan nen o cofu.

²²A Pind a Tedu ke a lalta yee fop owe na bakaad, ndax ke regit’eena a cooxel we ngimna na Kiristaa.

²³Kaa koy, ye jamaane fee no ngim onqe a fadiidafuleerna, kaa i mbeg’el, soo kebil ke a yetaa a in boo neene o ngim onqe war’eena o feeñil a fadiidu.

²⁴Yaaga koy, kebil ke kaa ndeeƭu o ƭooɗox in, ndax da ƥis a in maa Kiristaa boo i mbaag o ƭeetel nen jofu mbaambir Roog yaa i ngimna.

²⁵Ye jamaane fee no ngim onqe a fadiidna, kebil ke ndefatee o ƭooɗox in.

²⁶Nuun fop, xa ƥiy Roog nu ndefu yaam ne nu ngimna na Kiristaa Yeesu.

²⁷Nuun fop, nuun we mbatiise’eena ndax nu mbog na Kiristaa, nu ndokooxaan.

²⁸Jegatee njektir ndeer o Yaawuur fo o tefee o Yaawuur, ndeer o paɗ fa jaambuur, ndeer o koor fo o tew, yaam nuun fop, o leng nu ndefu na Kiristaa Yeesu.

²⁹Kiristaa a jegangaa a nuun koy, xa taan Abraham nu ndefu, too yaaga xan nu lam ke Abraham a regeena.