Read NQAARIIT NE ROOG Galati 4 Bible Online

Galati 4 - NQAARIIT NE ROOG bible

Galati 4

¹Too sax o mat, a mbanuu o lam oxe a maadna o refaa o njaaƈ, kaam lay ee jektiree fo o paɗ na dara, ke ta refna o yaal halal fee fop oo.

²Wiin saqun, a ƭoxan, too waagee o fi dara na halal fee, a refangee jamaane fee faap fee a hapna fadiidu.

³Neene a reftu na in itam. Ye a yiif in a ndeyafuleerna, kaa i ndeeƭu faɗ na ƭat ale in no mbaax onqe na adna fee.

⁴Ye hap fee a fadna, Roog a luliida o Ƥeem na adna fee, o tew a rimin, ta refat o Yaawuur oxaa warna o reef kebil ke Roog.

⁵A gara, ndax ta wat we ndeeƭna faɗ no kebil ke, too a fi a in xa ƥiy Roog.

⁶Ne nu ndefna xa ƥiy xa time taxu Roog a luliid Yiif no Ƥeem kam in. Yiif leene koy na falalooxaa yee: «Aba[1], Faap!»

⁷Yaaga koy, refatiro o paɗ ndaa o ƥiy o ndime, too o refangaa o ƥiy, Roog a doonaang o ref o lam no ke regteena.

⁸Yaaga nu andafulee a Roog, kaa nu mbaɗooxoogu kaa refeerna Roog.

⁹Ndiiki koy, ye nu andna a Roog boo ƈut mbaat ye Roog a andna a nuun, nam nu mbugu o nomtoorit na ƭat ale na adna fee jegeerna o njiriiñ, ndax nu ndakoox o ndef faɗ den?

¹⁰Kaa nu ƥaalaa ñaal ke fo a qool ake fo camaane ke fo xa kiid axe, tee kaa nu mbadnaa o mbaax onqe.

¹¹Kaam diidaa sax, ndik ke jalanuuma a nuun fop a ref kasaara.

¹²Fog we, ngela nandandooraamoo, yaam nandataam fa nuun we ndefeerna Yaawuur. Nu mos’iraam o mbi kaa ɗomaxama, ndaa ndiiki nuun we mbi’an.

¹³Nu anda a paax ee jir tax’u um yegnaa a nuun pitik Yegil mbaax ne.

¹⁴Ke jir’uuma fop oo, nu sibiraam, nu mbasnooxiraam, too nu mbaag’aan o mbi. Kaa koy, nu mbi’iran, ndax ngenartaam nen malaaka Roog, nen a Kiristaa Yeesu fa xoox um.

¹⁵Kaa koy, ndi xar xewu? Ne nu sawarit’ina moos! A wooraxam ee nu mbaag’angaan, nu luqitkooga a kid nuun, cooxaam a den.

¹⁶Ndax ndiiki kaa nu mbi’aam o pañ nuun, yaam ndigil ne layuuma a nuun?

¹⁷We mbugna o supit Yegil mbaax ne, kaa njeemaa fa doole den fop, ndax nu mbog na den, ndaa koy ke da mbugna faaxee. Kaa mbug o mbaf a nuun na xa ƥay in, ndax nu mbaag o ndamoox na den a paax.

¹⁸A refkooga ngiin lool, yaa andoona yee kaa nu njaflax no tig paax na waxtu fuu refna. Too keene koy, baa ref yaa refuuma a ndeer nuun soom.

¹⁹Xa ƥees, xam dak o yegaa coono nen xa ƭomel gaaj yaam nuun, boo yaa nu nandkaa fa Kiristaa.

²⁰Kaam bug’u i njasnoor boo um waag o lal a nuun me ta fodaxama. Kaam jaaxiɗ lool yaam nuun!

²¹Nuun we mbugna o ndeef kebil ke Roog ndax nu muc, layangaamoo koy, ndax kaa nu nanee ke kebil ke a layna?

²²Kaa dee: Abraham, xa ƥiy xa ƭaq a jeg’u. O eetaand oxe, o paɗ um o tew a jegit’un, soo o ƭikandeer oxe, ta jegin fo o teem.

²³O ƥiy onqe Abraham a jeg’ina fo o teem, kaa gar’u, ndax ke Roog a regit’ina a fadnoox. Kaa koy, o ƥiy onqe o paɗ oxe a rim’ina, jektir’ee dara fo lakas we ndimeena na adna fee.

²⁴Ii, keene koy o horooxangaan a paax, tig ƭik a tektu, yaam rew weene, kiɓoor ƭik oo. O leng oxe, xa ƥeem a ndimeena kam mbaƭ refu Agaar, too ten fa xoox um kaa ref nen o Joong olaa Sinayi.

²⁵O Joong olaa Sinayi no saax laa Arabi refu Agaar. A nanda fa Yeerusaleem fee ndiiki refna no mbaƭ, ten fo xa ƥeem.

²⁶Yeerusaleem faa took koy, refee o paɗ, too ten refu ya in,

²⁷yaam kaa layel kam a Pind a Tedu ke yee: «Wo fee o timar, felakinooxi! Wo fee jegeerna o ƥiy, too ñimiro xa ƭomel gaaj, fecooxi too ƴeel a maak! Xa ƥiy axe no tew oxe waaseena na moƴkaa o may xa ƥiy axe no xe xaadeerna a tolax.»

²⁸Yaaga koy fog es, xa teɓandoong Roog nu ndefu no ndegit ne, ne Isaak a refit’uuna.

²⁹Oxe o rimel um a jektir’eerna dara fo o rimel ole no lakas we ndefna na adna fee, kaa ñagadiloogu oxe Yiif le Roog a regit’ina, too neene a maadu o reftaa boo ndiik.

³⁰Xar a Pind a Tedu ke a layu? Kaa dee: «Raxi o paɗ oxe fo o ƥeem, yaam o ƥiy no paɗ lamandoorkee fo o ƥiy jaambuur.»

³¹Fog we, yaaga koy i ndefee xa ƥiy no paɗ, ndaa xa ƥiy caambuur.