Read NQAARIIT NE ROOG Galati 5 Bible Online

Galati 5 - NQAARIIT NE ROOG bible

Galati 5

¹Kiristaa kaa wokit a in, ndax i njeg a qoox in. Saƭakinooxyo boog, too ba nu nomtoox no mbaƭ ne.

²Mi Pool, mexe layaa a nuun ee boo nu ndeefna kebil ne layna yee oxuu refna a wara xucoox yaam Roog, Kiristaa ɗaxkee a nuun dara.

³Kaam bug o ɓaat o maƭoox a nuun ee oxuu xucnoorna a xoox um yaam Roog, a wara reef kebil lakas ke Roog fop.

⁴Nuun we na ndeefaa ke kebil ke a layna, ndax Roog a ɗeet a nuun nen jofu, nu nqaaje fa Kiristaa, too nu ñaka yirmande fee Roog itam.

⁵In koy, i yaakaara yee xan Roog a jofandit a in o ngim. Keene i cungaa no Yiif Tedu le Roog.

⁶No we ngimna na Kiristaa Yeesu, xucoox fo o ñak o xucoox mbodu, too ƭaxee dara. O ngim onqe o mbeq a ñoownaa soom jegu o njiriiñ.

⁷Nu mber’a o ndeefaa a Yeesu a paax. An ƴiƴtu a nuun boo a tax nu nananatee ndigil ne?

⁸Keene o mat hatee na Roog fee xoyna a nuun.

⁹O ndik no poɗaxnir kaa taxaa nqiiw ne fop a foɗax.

¹⁰A wooraxam ee no Yaal oxe nu njegkee a qalaat a lakas akaa njektirna fo we nu eetna o njeg. Kaa koy, oxe na jom’andaa a nuun, oxuu ta waagna waag o ref, xan Roog a xawin.

¹¹Fog es, boo maaduuma o waare’aa yee o kiin a wara o xucel, soo a sogkaa o jeg a muc, yaaga xar taxu um ñagadileel boog, yaam a reeƭit’angaa neene, ke um waare’aa na Kiristaa fee rengeena na kurwaa feƭarkoogatee wiin we?

¹²We na njom’andaa a nuun fo nquc, ne’iim soom da nday no nqucir, ndaa fat a ƥujir.

¹³Fog we, nu sute no mbaƭ ne nu ndeeƭna, ndaa baa a sutax aleene a tax nu ñoowaa no ke cer ke nuun a yaawaa. Yaaga boog, fat o mbeq onqe a tax nu ndagooraa.

¹⁴Yaam kebil ke Roog fop, no ɗelem o leng kut a mbadnooru, ta ref o ɗelem olene: «Fat o fex o kend of nen a xoox of.»

¹⁵Kaa koy, boo nu nandna fo ƥaaɓaan kaa na ŋatraa, a ŋolraa, mbootooxyo yaqir.

¹⁶Mexe layaa boog ee nqaƴyo Yiif le Roog a ɗox o ñoow nuun, too yaaga nu mbi’kee ke cer ke nuun a yaawaa.

¹⁷Ke cer ke nuun a yaawaa fogree fo ke Yiif le Roog a bugna, too ke Yiif le Roog a bugna a guutatira fo ke cer ke nuun a yaawaa. Mbaagraƭar neene refna a ndeer ke cer ke a yaawaa fo ke Yiif le Roog a bugna taxu nu naangee o mbi’aa ke nu mbugkoogna o mbi,

¹⁸ndaa koy, a refangaa yee Yiif le Roog na ɗoxaa a nuun, nu ndefee faɗ no kebil ke.

¹⁹Ke cer ke yaawaa koy a ande a paax. A pi ake den ndefu: Ceeq fo qoolaƭaru fo caasaay

²⁰fo a cuur pangool fo pan. Kaa taxaa itam wiin we a mbaagraƭar, a nqasraa, a mat a qeeñ, a mbuuxanraa, a ngendandooraa, a nqaajooraa, soo a mbi’aa fo mbokatax fo sayooxu.

²¹A naanga o siisraa itam, too a yeraa a yer a maamu, a ñaamaa kupu, a mbi’aa lakas kaa nandna fo keene. Mexe layaa a nuun ne layit’anuuma a nuun yaaga yee: We na mbi’aa tig nandu neene lamkee Maat ne Roog.

²²Kaa koy, ke Yiif le Roog a rimaa no kiin refu: O mbeq fo o ɗaay fa jam fo o muñ fo o laabiir fo o paaxel. Kaa taxaa itam i ngore,

²³ƥuuɓ, too ndamoox. Keene koy, kebil leng xañtiran.

²⁴We na ndeefaa a Kiristaa Yeesu a mbara ke cer den a yaawaa fo ke da nqememaa.

²⁵A soƥangaa yee Yiif le Roog cooxu a in o ñoow, fat i nqaƴin ta ɗox a in boog.

²⁶Ba i mbaaƭanaa a qoox in o ndam o njegee xoox. Ba i tooñraa mbaat i yaawaa tig no lakas itam.