Read NQAARIIT NE ROOG Galati 6 Bible Online

Galati 6 - NQAARIIT NE ROOG bible

Galati 6

¹Fog we, nuun we andoona yee kaa Yiif le Roog a ref na nuun, a soƥangaa yee nu mbeta o kiin ta fi’aa kaa jageerna, fat nu lalin a ƭat yoonandtin o ɓuuɓ. Kaa koy, fat nu mbootoox a paax, yaam nuun oo nu mbaaga yenkaa na bakaad.

²Ba nu ñak o ndoxondooxanraa toq ke nuun. Nu mbi’angaan, xan nu ndeef ke Kiristaa a hebilna.

³A jegangaa oxaa na foogaa yee ten fa xoox um o kiin o maak oo, too refee dara, xoox um rek a naxaa.

⁴Oxuu refna, a pi um a waru o horooxaa. A soƥangaa yee no ke ta fi’aa a jega kaa waaguuna o ɗaayand, fat a liiƥoor fa xoox um, a waas a jaambuur.

⁵O kiin oo kiin koy a jega ke ta warna o gadooxan a xoox um.

⁶Oxuu na jangneel Yegil mbaax ne fat a coox oxe na jangnan o ten tig oo tig paax ke ta soxla’na fop.

⁷No kene koy, ba nu nax a qoox nuun: Roog naagee o ŋasteel, too itam ke o kiin a duufna, ten a saxadkaa.

⁸A soƥangaa yee kaa duufaa ke cer um a yaawaa, fa nqon rek a xotitkaa teen, ndaa koy boo ta duufaa ke Yiif le Roog a bugna, o ñoow o fagkeer ole a saxadkaa.

⁹Baa o fi paax a fas a in. I yapatilangee a pi a paax, i ñakkee o saxad muk, yaa hap fee a fadiidna.

¹⁰Yaaga boog, ye i maadna o njegaa o daaw, fat i mbi’anaa oxuu refna paax. We i mbarna o moƴ o mbi’anaa paax sax ndefu fog in no ngim onqe.

¹¹Nu nga’a ne a pind ake no leetar ole bindtuuma a nuun o ɓay es a magnitna.

¹²We andoona yee kaa mbaaƭaa o mbaagir fo wiin we, na seraa a nuun nquc. Keene da mbi’aa fop, kaa mbañaa wiin we a ñaatland a den, yaam ne da ngoolooxna a Kiristaa fee rengeena na kurwaa.

¹³We na sertaa nquc sax naangee o ndeefaa kebil ke Roog. Maa da mbakoorna, yaa nu mbi’na ke da seraa a nuun soom, a mbaaƭaa.

¹⁴Mi o mat, a refangeerna a kurwaa le no Yaal in Yeesu Kiristaa, bugiim o fakoor lakas. Ke yaawooguuma na adna fee fop, yaawatinum, yaam kaam nand nen oxaa xonna, too a kurwaa le Kiristaa soom taxun. Ñoowtatiim ne adna fee a ñoowtaa, too adna fee ñoowtee ne um ñoowtataa.

¹⁵Xucoox fo ñak o xucoox mbodu. Ref mbindel nqas jegu o njiriiñ.

¹⁶Yaasam jam fa yirmande a ngar took no wiin we na ndeefaa o ga’ooƭ oleene, took xeet fee Roog a watna.

¹⁷Koo jaf le na garaa, ba o leng a taxat um jaaxiɗ, yaam a aak ake ndefna no cer es fop, Kiristaa taxun.

¹⁸Yaaga koy fog es, yaasam yirmande fee no Yaal in Yeesu Kiristaa a ref fo a yiif nuun. Amiini.