Read NQAARIIT NE ROOG Efees 1 Bible Online

Efees 1 - NQAARIIT NE ROOG bible

Efees 1

¹Mi Pool fee refna apootar Kiristaa Yeesu ne Roog a bugtuuna, na bindaa a nuun o leetar oleeke, nuun gimu tedu we na Kiristaa Yeesu ngenna Efees.

²Yaasam Roog Faap in fo o Yaal oxe Yeesu Kiristaa a ci a nuun yirmande fa jam!

³Yaasam Roog Faap fee no Yaal in Yeesu Kiristaa a simatel! A barke’a a in, in we mbogna fa Kiristaa, ye ta ci’na a in barke-yiif fuu refna na asamaan.

⁴Na Kiristaa Roog kaa jil a in, yaaga sakafulee adna fee, ndax i ted too ñak sik mbaambir um. Kam o mbeq um,

⁵Roog kaa yuuɓ’u yaaga yee xan a fi a in xa ƥeem ŋaƈit na pexey Yeesu Kiristaa. Keene kaa reeƭu ke ta bugna fo ke feluuna.

⁶Yaaga boog, fat i simat a Roog yaam yirmande um fee ta ci’na a in no fud o letu no Ƥeem onqe ta fexna fex.

⁷Yaam na pexey fo’oy le Kiristaa i mbate no paaxeer, soo tooñ ke in a mbaasanel. Neene boog, Roog a lala a in o yaajel ole na yirmande um

⁸fee ta ci’na a in bo ta dey sik, ye ta daawinna a in o and o deyu sik fo o jeg-yiif.

⁹A andnoora a in kunpa fee ta ɗaapna, too ta yuuɓ’un yaaga, ndax ta fadnin na Kiristaa.

¹⁰Yuuƥ neene, Roog a fadandkaa yaa hap fee a fadna, refu ta fokat fop ke refna na asamaan fo took lanq ke, da mbog o aa-adax o leng kut, ta ref Kiristaa.

¹¹Roog a ci’a a in itam na Kiristaa a las ale refna ref a muc ale ne ta yuuɓit’uuna fo ne ta fosooxit’uuna yaaga, ten fee na fi’aa fop ke ta hebooxna fo ke ta bugna.

¹²Fat i simat boog o magnel ole Roog, in Yaawuur we ndoonna yaakaar in na Kiristaa yaaga garafulee.

¹³Nuun we ndefeerna Yaawuur itam, boo nu nan-gilooxna fa lay fee no ndigil ne, refna Yegil mbaax ne ɓisiidna a nuun a muc ale, nu ngima na Kiristaa. Neene, Roog a fi’a na nuun o ñaas olaa lalitna yee no ten nu mbogu, ta ref Yiif Tedu le ta cooxna a nuun too ta regit’un.

¹⁴Yiif Tedu le kaa ref a ƭegeer njigand no paax ke Roog a geekanna a in. Kaa woornaa a in ee xan i pokoox keene fop, yaa a bat ale in a fadnooxkaa. Neene, xan o ndam onqe Roog a simatel.

¹⁵Ten taxu mi itam, ye nanuuma o ngim nuun no Yaal oxe Yeesu a layteel, nan itam wiin we a layaa o mbeq onqe nu njegna no we mbogna na Roog fop,

¹⁶kaam gen no gidmaa a Roog yaam nuun, wetandooxaa a nuun na qeƭ es.

¹⁷Kaam xeɗaa a Roog fee no Yaal in Yeesu Kiristaa, a Faap fee jegna o ndam, ndax ta coox a nuun Yiif le na andnoorkaa a nuun, too a feeñil a nuun a Roog, ndax nu andin.

¹⁸Yaasam ta xooland a qeeñ nuun, ndax nu and yaakaar ne taxna Roog a xoy a nuun, and itam ke refna halal fee no paax cegee sik ke ta geekanna we mbogna no ten.

¹⁹Kaam xeɗaa itam, ndax nu and ke refna katil maak njegee hap ne ta jegna na in, in gimu we. Katil neene refu sax ke Roog a lalitna fa doole fa mbagkatar,

²⁰ye ta xontooxnoorna a Kiristaa a ndeer no xon we soo a moofnin na ñamaak um kam asamaan.

²¹Maaga, na asamaan, Kiristaa kaa dalnel took sañ-sañ fuu refna fo maat nuu refna fa katil fuu refna fo ngelfa nuu refna. Kiristaa kaa dalnel itam took gon lakas luu waageena o ne, refee soom na adna fene, ndaa no camaane ke na ngaraa itam.

²²Roog kaa doon tig kuu refna na caf Kiristaa, soo a ci’in ta ref xoox le no fog ole no gimu we fop.

²³O fog ole no gimu we refu cer ke Kiristaa. No ten Kiristaa a genu bo ta dey, ten fee mayƭandna ke sakeena fop.