Read NQAARIIT NE ROOG Efees 5 Bible Online

Efees 5 - NQAARIIT NE ROOG bible

Efees 5

¹Nuun we ndefna xa teɓandoong Roog axaa ta fexna, laaleenoo no keene.

²Fat nu ñoowaa no mbeq, ne Kiristaa a fexitna a in, boo a ɓoxot o ñis um yaam in. O mbeq onqeene na Kiristaa kaa ref nen a su’nit fa sadax faa ɓoxoteena a Roog too a felin.

³Nuun, na xeet fee Roog nu mbogu. Ten taxu nu ndeyee o moof, layeel kaa jofna no ceeq mbaat no caasaay mbaat na yuxum a paaxeer.

⁴Ba nu layaa fa lay fa njegee xoox mbaat a ƭelem a cednooxu mbaat a caaxaan. Kaa nu mbar o ƥoxotaa a Roog o ngidim kañ.

⁵Fat nu yeg fo and ee oxe na seeqaa mbaat oxe na saasaayaa, jegkee muk a las no Maat ne Kiristaa, refna ne Roog. Oxe fexna xaaliis deyaand o ne, yaam o fex xaaliis refu faɗooxaa ke refeerna Roog.

⁶Ba o leng a nax a nuun fo fa lay fa njegee xoox, yaam tooñ nandu neene na taxkaa fuux le Roog a dal took no we mbañuuna o nanan.

⁷Yaaga boog, ba nu mbog fo wiin weene a las a leng.

⁸Yaaga, kaa nu ndeeƭu kam o niɓaan ole, ndaa ndiiki nu ndefata kam a qoolaand ale, yaam ne nu mbogna no Yaal oxe. Ten taxu, ñaaƴityo nen waa mbogna na qoolaand ale.

⁹Yaam a qoolaand ale o mat, kaa rimaa o paaxel oluu refna fo o cofel fo ndigil.

¹⁰Ngoorgoorlooxyo o njekit ke felna o Yaal oxe.

¹¹Ba nu njeg a las a leng na pi a cegee njiriiñ ake no we ndefna kam o niɓaan ole, ndaa nguyityo a den.

¹²O moof laytaa ke wiin weene a mbi’aa na kunpa sax kaa sednoox.

¹³Kaa koy, boo andoona yee a qoolaand ale a naaga dañ took a pi akeene, xan da mbeej fo ne da nandna fop.

¹⁴Yaam kuu feeñleena a qool qac, a qoolaand a refataa. Ten taxu ta layeel ee: «Yokooxi, woxe na ɗaanaa, inoox a ndeer no xon we, too xan Kiristaa fee a xoolandong.»

¹⁵Mbootooxyo a paax boog na ñaaƈnooƭ nuun. Ba nu ndef nen waa ñakna o and ndaa nen jegu o and.

¹⁶Njiriiñoorityo o daaw oluu nu njegna, yaam jamaane fee i ndefna felee.

¹⁷Ten taxu ba nu ndef ɗof, ndaa andyo o bug ole no Yaal oxe.

¹⁸Ba nu mbayaa fa biiñ, yaam o luubax soom a ɓekkaa a nuun, ndaa mayyo fo Yiif Tedu le.

¹⁹Naangyo saƭakinraa a ndeer nuun fo a kim a tedu, nqaananaa a Roog, mbi’tin itam a kim akaa inoorna no Yiif le Roog. Kaam ee ngimanyo o Yaal oxe, too simatin fo a qeeñ nuun fop.

²⁰Na waxtu fuu refna fo no kuu refna, ngidimyo a Roog Faap fee no gon no Yaal in Yeesu Kiristaa.

²¹Njaɓaniryo a ndeer nuun, yaam ne nu niwna a Kiristaa.

²²Nuun rew we, fat oxuu refna na nuun a jaɓan o kor um ne nu njaɓanitna o Yaal oxe.

²³Yaam o kor refu kelfa no teem, ne Kiristaa a refitna kelfa no fog ole no gimu we. Kiristaa fee fa xoox um refu o Muumucil oxe no gimu we ndefna cer um.

²⁴Neene, o tew oxuu refna a wara o jaɓan o kor um no kuu refna, ne o fog ole no gimu we a jaɓanitna a Kiristaa.

²⁵Nuun gor we, fat oxuu refna na nuun a fex o teem, ne Kiristaa a fexitna o fog ole no gimu we boo a ɓoxotanin o ñis um.

²⁶Kaa fi’it neene, ndax ta tedlandin a cinj ye ta xoolandtuuna foofi fo fa lay,

²⁷yaam kaa bug’u o feeñil mbaambir um o fog ole no gimu we kam o mosel um fop, a bug ta xool, a ñak sik, too jegkee gak leng.

²⁸Neene boog, o kor oxuu refna a wara o fex o teem, ne ta fexitna cer um. Oxe fexna o teem, xoox um sax sax a fexu.

²⁹O leng mosee o sib cer um, ndaa kañ kaa ñoowdandan, soo a topatooxan, ne Kiristaa a fi’antan cer um ke ndefna o fog ole no gimu we.

³⁰Kaa refee yee in ndefu a seek ake no cer ke ten!

³¹Ten taxu a Pind a Tedu ke a laya yee: «Fat o koor a xaƴ a faap um fa ya um, a hiɓoor fo o teem, too den ɗik xan a ndefat njer leng kut.»

³²Keene ndigil kunpa’u yoo naa jegna o njiriiñ, too a feeñlel kam a pind akeene. Na las es koy, ga’aam ee leng kut oo a ndeer Kiristaa fo o fog ole no gimu we.

³³Kaa koy, a wara na nuun itam: O kor oxuu refna a wara o fex o teem, ne ta fexitna a xoox um, too o tew oxuu refna itam a wara o niw o kor um.