Read NQAARIIT NE ROOG Filip 3 Bible Online

Filip 3 - NQAARIIT NE ROOG bible

Filip 3

¹Fog es, mbelakinooxyo no Yaal oxe. Dapatinaa leng kut ke no leetar oleeke xijliraam, too ten na saƭakinaa a nuun.

²Mbootooxyo a cuut akeene, jaajal faaxeer weene na sertaa nquc yaam Roog.

³We nqucooxna tigi ndefu in we na mbaɗoortaa a Roog Yiif le ten, in we a tagas in a refna na Kiristaa Yeesu, in weeke ndooneerna yaakaar in no cer.

⁴A dey’angaa o fi’el, mi itam waag’aam o doon yaakaar es no cer. A jegangaa oxaa foogna yee a waaga o doon yaakaar um no cer, andaam ee mi moƴun o waag o ten,

⁵mi fee xuceena yaa jeguuma ñaal ɓetuu tadik, ref o ƥiy Isra’el no kurcala le Bensame, ref o Hebre, Hebre a ndimaam. O Farisiya reeƭum, reefaa kebil ke,

⁶damoox na den fo o mbeq boo ñagadilaa we ngimna na Yeesu. No cofel ole kebil ke a ndalinna um ñak ƥanjel.

⁷Keene fi’’uuma ke moƴna, ndiiki kaam fi’in kasaara yaam Kiristaa.

⁸Refee keene soom koy. Kaam ɗeetat fop nen kasaara yaam ke moƴna o jeg o njiriiñ no fop, ta ref o and a Kiristaa Yeesu fee o Yaal es, taxna um fes lakas ke fop a cinj. Lakas keene, kaam ɗeetaa a den nen a siind, ndax um waag o jeg a Kiristaa.

⁹Neene, xam soƥel no ten, refee koy fo o cofel ole na hataa no reef kebil ke Moyiis, ndaa fo o cofel ole o ngim na Kiristaa a cooxtaa, o cofel ole na daawteel na Roog na pexey o ngim.

¹⁰Neene o mat um anditkaa a Kiristaa fa doole a qontax um, waag o fog no coono um, nandat fo ten nen oxaa xonitna nen o ten,

¹¹boo yaa fadiiduuma na qontax a ndeer no xon we, yaa waaganuuma.

¹²Refee koy ee kaam daaw a laay ale boo ƴut mbaat um fad no ñak-sik, pokin ne Kiristaa a pokit’axama.

¹³Fog es, ɓekiim no xoox es ee pokaanum boo ƴut, ndaa a jega koy kaa um fi’aa: Kaam fañ o ɓek yiif es no ke daawuuma o fes a cinj, soo ɗoftaa o daaw ke fodaxama mbaambir.

¹⁴Kaam eetatireel kañ, ndax um waag o jang a laay ale took, taxna Roog a xoy a in na Kiristaa Yeesu.

¹⁵Yaaga boog, in fop we ñakna sik, fat i mbog xalaat fa leng kut feene. A soƥangaa itam ee kaa nu njeg maa xalaat a guutatiritna fa feene, xan Roog a xoolandanin a nuun.

¹⁶Me i mbodna ndiiki, fat i yoon, ñaaƴ mbaambir.

¹⁷Fog es, nuun fop, laalakinooxaamoo, ndoon a kid nuun no we na ndeefaa xa caf in.

¹⁸A jega mayu waa na ñaaƴaa, a ndef waa mbugeerna o nan paru na kurwaa le Kiristaa. Layaam a nuun a caf a mayu kaa jofna na den, ndiiki itam, um dakooxin o layaa fo xa kooniit.

¹⁹A saŋkax na cungaa a den. O fud refu Roog den, o ndam den da ƥekin no ke na gaci’nooraa a den. Tig adna soom a nqalaataa.

²⁰In we asamaan a refna mbaafaap in koy, in we cungaa o Yaal in Yeesu Kiristaa fee refna o Muumucil in, na inooriidkaa maaga.

²¹Ten feene o mat na supitkaa cer neewu doole ke in, da nandat fo cer o ndam um, a fi’tin sañ-sañ fee ta jegna boo a waag o garit fop took.