Read NQAARIIT NE ROOG Filip 4 Bible Online

Filip 4 - NQAARIIT NE ROOG bible

Filip 4

¹Ten taxu koy, nuun fog es we fexuuma fex, nuun we sooɓaxama, ndef o ɗaay es fo o ndip es, koo saƭikyo no Yaal oxe, ngen na saƭik aleene.

²Bugaam o as a Ewodi, as a Sintik da mbog xalaat fa leng kut no Yaal oxe.

³Wo itam, wo fee o yoon es o kore’u xe, koo dimle’i rew weene, yaam kaa ngomrel bo, nen a mi yaam Yegil mbaax ne, fa Kelemaa fo lakas we um yoontaa no calel ke, too a kon den a mbindel no safe le no ñoow ole.

⁴Naangyo o mbelakinooxaa kili no Yaal oxe, kaam ee naangyo o mbelakinooxaa!

⁵Fat wiin we fop a and o lewet nuun. O Yaal oxe a matiida!

⁶Ba nu nqalam dara! No kuu refna, ndiisyo a Roog coxla nuun, nqeɗaa, nqeɗooxaa, too ngidman itam.

⁷Yaaga xan jam fee Roog hupna o and oluu refna a xoxit a qeeñ nuun fo a yiif nuun na Kiristaa Yeesu.

⁸Ndiiki koy, fog es, fat a qalaat nuun a njagin no fop ke refna ndigil fo kuu deyeena o niw fo kuu faaxna fo fop ke xoolna, a deyel o fex, a warel o jaɓ, a faax, a deyel o tagas.

⁹Ke nu njangna, ndaawin, nantin na mi, nga’in na mi, ngayeenoo. Yaaga xan Roog fee na ci’taa jam a ref fa nuun.

¹⁰Jegaam o ɗaay o maak no Yaal oxe kam xeeñ es, yaam ne nu umbatinna o mbeq nuun fa mi. Andaam koy ee nu miñaan o mbosoox, o daaw rek nu njeg’afuleeru.

¹¹Refee koy ee soxla es taxu um lay keene, yaam jangaam boo waagat o sawar no ke refuuma.

¹²Waagaam o ñoow no ñak, waagaam o ñoow no jeg tigi. Muu refna fo no kuu refna, jangaam o ñaam boo giñ, jang o xeexel, ta ref no jeg tigi mbaat no ñak.

¹³Waagaam fop yaam oxe na dif’axam.

¹⁴Kaa koy, nu mbi’a paax, ye nu nqaajirna o lorax es.

¹⁵Nuun Fiifilip we, nu anda sax tigi yee, ye Yegil mbaax ne a sogeena o waare boo um ret Makedoni, mbokatax no gimu leng sax cooxiraam ƭaxir soxla, a refangee ne nuun.

¹⁶Nuun soom lasaxam no ke nuun, boo ye um refaa Tesalonik sax, nu ƥisnitiidaam a caf a ƭak kaa ɗaxtuuma soxla es.

¹⁷Refee koy ee um gindaa ci’it keene. Ke um waaƭaa kañ refu xa tim xa mayu xa paax axe na sutooraa no ñoow nuun.

¹⁸Daawaam fop boo mexey no jeg tigi. Jegaam itam bo ta dey sik, ye daawtuuma na Epaforodit ke nu lultaxama. A refa ref na mi nen sadax fa mbelu tuñ mbaambir Roog.

¹⁹Roog es koy, xan a ɗaxit coxla nuun fop halal um fo o ndam um na Kiristaa Yeesu.

²⁰Yaasam Roog Faap in a ɓoxotel o ndam bo na moos boo moos. Amiini.

²¹Simnanaamoo we mbogna na xeet fee Roog fop na Kiristaa Yeesu. Fog we ndefna meeke fa mi itam owe simnaa a nuun.

²²We mbogna na xeet fee Roog fop, too a ndef mene, owe simnaa a nuun, moƴtaa sax we no mbind Kesaar fee.

²³Yaasam yirmande fee no Yaal oxe Yeesu Kiristaa a ref fo a yiif nuun.