Read NQAARIIT NE ROOG Kolos 3 Bible Online

Kolos 3 - NQAARIIT NE ROOG bible

Kolos 3

¹Nu nqontooxa fa Kiristaa, mbaaƭyo boog ke refna took, maa ta moofna na ñamaak Roog.

²Fat a qalaat nuun a nqot no ke took, a mbaas ke refna took lanq ke,

³yaam kaa nu nqon, soo o ñoow nuun a fokatel fa Kiristaa na Roog.

⁴Yaa Kiristaa fee refna o ñoow nuun a feeñkaa, nuun itam, xan nu mbeeñ fo ten no ndam.

⁵Ten taxu nu mbara o mbañ cer nuun a ñoowaa no ceeq fo no nqoolaƭar fo na yuxum a paaxeer fo no bug halal, yaam kaa ref xaƴ a Roog fa ndiindigil fee, soo reefaa lakas.

⁶Keene o mat na taxaa fuux le Roog a dal took we nanaƭarna.

⁷Neene o mat nu ñaaƴtoogu yaaga, ye nu maadna o ñoowtaa bakaad.

⁸Ndiiki koy, mbesyo keene fop ndiiñ, mbañ fuux fo mbañir fo coxod fo a ben fo fa lay fa mbaaxeer a sutooraa na nuun.

⁹Ba nu maaɓraa itam, yaam nu mbolooxa no ngiin bakaad ne yaaga, ten fo a pi um.

¹⁰Ndiiki koy, nu ndokooxa ngiin nqas ne na jib’atintaa no nand Roog fee sakuuna, ndax ta fadnoox no andin tigi.

¹¹Jegatee njektir leng ndeer o Keegeres fo o Yaawuur mbaat ndeer o qucooxu fo o haat. Jegatee o yokooxeer, jegatee o kiin o naaku[1], jegatee o paɗ, jegatee jaambuur: Kiristaa kaa ref fop, a ref no fop.

¹²Neene itam, nen waa Roog a jilna nu mbog no ten, ta fex a nuun, fat nu mbof yirmande fo o paaxel fo a neewandax fo o ɓuuɓ fo o muñ.

¹³Naangyo muñanraa. A soƥangaa koy ee o kiin na nuun a saqana o lakas tig, fat nu mbaasanir. Fat nu mbaasanritaa, ne Kiristaa a waasanitna a nuun.

¹⁴Kupu keene fop, mbapooryo o mbeq, yaam o mbeq refu ngumoor ne na ñaknaa a nuun sik.

¹⁵Fat jam fee Kiristaa, nu nqoyteena, ndefik njer leng, a gar na qeeñ nuun, nu njeg o ngidim.

¹⁶Fat fa lay Kiristaa a gen na nuun, a may muut. Naangyo o njangniraa, maƭooraa no and fo na kim a tedu fo na kim a inooru no Yiif le Roog, nqaananaa a Roog, simatan fo a qeeñ nuun yaam yirmande um fa nuun.

¹⁷Kuu nu mbi’aa itam mbaat nu layan, fat a ref no gon no Yaal oxe Yeesu, soo ngidmaa a Roog Faap fee no gon um.

¹⁸Nuun rew we, fat oxuu refna na nuun a jaɓan o kor um, ne ta waritna no Yaal oxe.

¹⁹Nuun gor we, fat oxuu refna na nuun a fex o teem, a fañin o fofan o njaaku kam.

²⁰Nuun mboƥ ne, fat nu nanan we ndimna a nuun no kuu refna, yaam a refa kaa felna o Yaal oxe.

²¹Paap ke, nuun itam ba nu njumband kam na xa ƥiy nuun, yaam ndik da ngooy na nuun.

²²Nuun faɗ we, nananyo yaal pind nuun no kuu refna na adna fee. Keene koy, baa ref soom na kid den nen waa na mbaaƭaa kaa felna wiin we. Fat nu mbi’an fo xeeñ galagee dara lakas, a refangee o saɗar o Yaal oxe.

²³Ke nu mbi’aa fop, fat a ref fo xeeñ letu, mbi’anan o Yaal oxe, too baa ref yaam wiin we.

²⁴Andyo yee xan o Yaal oxe a coox a nuun ndabid ne refna ref lam ne. Kiristaa refu o Yaal oxe nu ndagooxaa.

²⁵Oxe na fi’taa njofaƭar, xan a daaw njofaƭar um, too keene, o leng paykee teen o lak.